Matéus 18
18
Mut a lóohán lí ɓɛ́ lí ǹcɛ́ŋ á Ékombo-lóō
(Mlk 9.33-37; Lúk 9.46-48)
1Múŋ á yéŋ eceg, ɓayége bí Yésus bú sīŋglé nyɛ ɓɛɓɛ, bú ɓāt nyɛ nɛ́: «Ɓaá nzáá a lóohán lí ɓɛ́ lí ǹcɛ́ŋ á Ékombo-lóō é?» 2Váŋ nɛ̄ a yáŋá mɔɔ́n ntɔ́ga, ɔ tɛ́ɛ́yɛ́ nyɛ á m̀mím wáɓá, 3ɔ lāgá nɛ: «La mbálɛ mag laga ɓɛ́nɛ nɛ́, kíyáɓɛ́nɛ manáh veŋe ɓé bílɛ̄m, maná yaán kaa ɓɔɔ́n ɓátɔ̄ga, m̀ɓá, miní ŋgá kɛ ɓé lí níŋgi á Ékombo-lóō. 4Nyɔ́ a ŋga súhɛ hɔ́ nyɛ́-mɛ̄n, a tímān kaa nyɔ́ mɔɔ́n ntɔ́ga, nyɛ́ nɛ́ a lóohán lí ɓɛ́ lí ǹcɛ́ŋ á Ékombo-lóō. 5Tɔ nzáá a lɛ́glé mɔ́ɔ̄n kaa nyɔ́ á jóō jáma, ɛnɛ mā-mɛn nɛ́ a lɛ́gle.»
Yésus ag ɓéhyɛ ɓayége ɓɛ́ɛ́
(Mlk 9.42-48; Lúk 17.1-2)
6Yésus aá la ɓɔ́ nɛ́: «Ndí tɔ nzáá a ŋga kɛ́ li ɓɛ́ lí njɔm miɓé nyí ntɔ́ga wāhwa vá á ɓá bí byɛ́ɛ́ ŋyéɓé la ma, ɛ́ lɛ́ nsɛ́ŋ nɛ́ bí tiŋ nyɛ́ lísūŋ lí ŋgɔg á cíŋ, bí léé nyɛ́ á m̀mím á túwɛ. 7Eɓéé-nyúū la ɓot bí ŋkɔŋ-á-sí ányúū víŋ ɔbul ví míɓē! Ákaa ɛ́sɛ nɛ́, mam mí ŋga óm ɓot lí ɓɔŋ lí áɓē mí ŋgá súú ɓé. Ndí eɓéé-nyúū la mut a ŋga kɛ́ li ɓɛ́ lí njɔm nyí míɓē mí ɓáŋá! 8Kíyáɓɛ́nɛ wɔ wɔ́ɔ tɔ akoo wɔ́ɔ bí lɛ́ njɔm aɓé wɔ́ɔ, sɛ́m byɔ́, ɔ léé byɔ́ énɛŋɛ́; átɔm nɛ́, ɛ́ lɛ́ wa nsɛ́ŋ nɛ ɔ níŋgí á éniŋ éɓem la wɔ wá tɔ la akoo wá, li loo nɛ́ bí léé wa la mɔ mɔ́ɔ míɓáa tɔ la mikoo mɔ́ɔ míɓáa á éɓēl-nzáan nyí ɛ ŋgá dím ɓé á éɓem la eɓem. 9Nlemlem á jam, kíyáɓɛ́nɛ diíh jɔ́ɔ lí lɛ́ njɔm aɓé wɔ́ɔ, túú jɔ́, ɔ léé jɔ́ énɛŋɛ́; ɛ́ lɛ́ wa nsɛ́ŋ nɛ ɔ níŋgí la diíh já á éniŋ éɓem, li loo nɛ́ bíg léé wa la miíh mɔ́ɔ míɓáa á éɓēl-nzáan nyí ɛ ŋgá dím ɓé á éɓem la eɓem!»
Ǹjáŋag á ntómbɛ́
(Lúk 15.1-7)
10«Nyɔŋán lítāt nɛ́ miníh yɔ́lɔ́g ɓé ntɔ́ga tɔ wa vá, átɔm nɛ́ mag laga ɓɛ́nɛ nɛ́, wóŋ á lóō, áŋgɛl yáɓá ɛ́ ɓáág ja ɛ́ tɛ́ɛ ɓɛɓɛ la Etāa wama nyɔ́ a lɛ á lóō. [11] 12Miníg ɔ́ŋɔ láá é? Kíyáɓɛ́nɛ mut a byɛ́ɛ́ eɓógo mitómbɛ́ ndí wá muŋ wá jáŋ, ɓaá a ŋgá yíg ɓé míŋí muúbuu-la-ɛbuu á ɔ́kolá, á lí kɛ lí lí somo lí nyú wá jáŋ é? 13Kí á lá wɔ̄ li kɔt, la mbálɛ, mag laga ɓɛ́nɛ nɛ́, ag kɔn mivag la wɔ́ li loo lí míŋí muúbuu-la-ɛbuu mí máh jáŋ ɓé. 14Jɔ́ nɛ́, Etāa waná nyɔ́ a lɛ á lóō a ŋgá somo ɓé nɛ ntɔ́ga tɔ wa a jāŋ á ɓá bísɛ.»
Ekɔ́ghɛ á póla linyaŋ
15«Kí mɔ́ɔ̄nyɔ̄ŋ a vúhlé wa, kɛ̄n ɛ́n nyɛ́ ɓɛ́nɛ bíɓáa, ɔ páhlé nyɛ́ ɔ́ūn vɔ́ɔ. Kíyáɓɛ́nɛ a ámblé wa, ndí á lēm ɔ́vuha vɛ́ɛ́, ɛnɛ wa tómbánɛ́ nyɛ. 16Ndí kíyáɓɛ́nɛ āh ámble ɓé wa, tɔ li lem lí ɔ́vuha vɛ́ɛ́, nyɔ̄ŋ mut wa tɔ bíɓáa, ɔ tímān nyɛ́ lí ɛ́n, á lí ɓɔŋ nɛ́ miní súgɛ́ nyúŋ ŋkwɛl ɔ́sū ví mbóŋ ɛ́ɓáa tɔ ɛ́ŋháa, kaa Licii-lipúán lí ŋga lága. 17Kíyáɓɛ́nɛ āh ámble ɓé ki ɓɔ́, kɛ̄n la nyúŋ ŋkwɛl á Éɓasɛ. Kíyáɓɛ́nɛ a ɓēn ki li ámble lí ɓot bí Éɓasɛ, nyɔ̄ŋ nyɛ́ kaa mut a ŋga yí ɓé Ɔ́lolómɛ̄ tɔ kaa ŋ̀komanɛ-ŋkuh-á-gɔ́mna. 18La mbálɛ, mag laga ɓɛ́nɛ nɛ́, yé ɛ́sɛ miní ŋga kɛ́ li tiŋ á ŋkɔŋ-á-sí, ɛ́g kɛ li tiŋɓɛ á lóō. Tɔ yé ɛ́sɛ ki miní ŋga kɛ́ li kúhu á ŋkɔŋ-á-sí, ɛ́g kɛ li kúhlɛ á lóō.»
Lí kánɛ lí élɔŋ
19«Mag laga sīg-pɛ ɓɛ́nɛ nɛ́, vá á ŋkɔŋ-á-sí, kí bíɓáa átē wāná ɓá ámblán nɛ bíg kánɛ, tɔ yéé bí ŋga ɓāt Etāa wama nyɔ́ a lɛ á lóō, ag kɛ ɓɔ́ yɔ́ lí tíi; 20átɔm nɛ́, ápah ɓot bíɓáa tɔ bíŋháa ɓá kómān á jóō jáma, mi lɛ élɔŋ la ɓɔ́.»
Elaakɛ átē a linyaŋ
(Lúk 17.4)
21Váŋ nɛ́ Pétlos a sīŋglé Yésus á ŋgwáāg ɔ yó nyɛ nɛ́: «Ɛtáŋɛ, eceg mɔɔ́lyāŋ a vūhlé ma, ɓaá ŋgele yáŋvéé ma nyɛ́ɛ nyɛ li laakɛ é? Tɛɛla ŋgele nzambúwá é?» 22Yésus ɔ pélē nyɛ nɛ́: «Mi ŋgá laga ɓé ma wa nɛ́, ŋgele nzambúwá, ndí tɛɛla muúnzambúwá mí ŋgele náŋ ŋgele nzambúwá.»
M̀ɓat-epíl nyɔ́ a ŋgá yí ɓé ŋgɔ́ɔ́
23Yésus ɔ yó nɛ: «La náŋ, Ekombo-lóō ɛ́ lɛ ja kaa káísa nɛ́ ɛ ŋga somo li yí yé ɓáɓɔŋle ɓɛ́ɛ́ bí byɛ́ɛ̄ nyɛ́ kaa epíl. 24Á míɓōtlé, bú sɔ́la nyɛ́ m̀ɓɔŋle nyɔ́ a ɓɛ́ɛ́la epíl yé ŋgandag ádun á bípah bí kápa. 25Kasig nyɔ́ŋ mut ah ɓɛ́ɛ́la ɓé tɔ jam á lí sála lí epíl yɛ́ɛ́, káísa ɔ kānʼyɛ́ nɛ bí núŋú nyɛ́, bí núŋú ŋ̀gáá wɛ́ɛ̄, ɓɔɔ́n ɓɛ́ɛ́ la byoóm bísɛ a ɓɛ́ɛ́la á lí ɓɔŋ nɛ́ a sálá epíl yɛ́ɛ́. 26Váŋ nɛ̄ m̀ɓɔŋle a kú káísa á sí míkoo, ɔ sɔ́hyé nyɛ nɛ́: ‹Sóon kondyé ma lí ɔ́hánɛ, mag kɛ wa lí sála lí epíl yɔ́ɔ ɛ́sɛ nɛ́ ɓam!› 27Ŋgɔ́ɔ́ yu byée káísa, ɔ mwáhlé nyɛ yéŋ epíl la nyɛ́ ɔ sōɛ́ nyɛ. 28Ɛnɛ́ nyɔ́ŋ m̀ɓɔŋle a ɓógó á mbóg káísa, la nyɛ́ ɔ ɓómán la liwándá jɛ́ɛ́ lí nsɔ́n já, jé a ŋgí ɓāt eɓógo bípah bí kápa, ɔ kég nyɔ̄ŋ yag, ɓɛɓɛ la lí sɛ́m lí nyɛ mvɛɛɓan; ɔ yó nyɛ nɛ́: ‹Sálá ma epíl mi ŋga ɓāt wa.› 29Liwándá jɛ́ɛ́ lí nsɔ́n lú kū nyɛ á sí míkoo, lú sɔ́hyé nyɛ nɛ́: ‹Sóon kondyé ma lí ɔ́hánɛ, mag kɛ wa lí sála lí epíl yɔ́ɔ.› 30Ndí nyɛ́ ɔ pún, la nyɛ́ ɔ vá nyɔ́ŋ á m̀ɓog, á nlaaŋkán nɛ nyɔ́ŋ a sálá nyɛ́ epíl yɛ́ɛ́. 31Náŋ ɔ lóohán lí teeŋgɛ lí míŋí míwāndá máɓá mí nsɔ́n ɛnɛ́ má ɛ́n naŋ; la mɔ́ mú kɛ̄ lí yíhɛ lí káísa yé ɛ́sɛ yá loo. 32Váŋ nɛ̄ káísa yaɓá a óm lí yáŋa lí nyɔ́ŋ m̀ɓɔŋle, ɔ yó nyɛ nɛ́: ‹Á éɓéɓéyɛ m̀ɓɔŋle yé! Ma mwáhlé wa epíl ɛ́sɛ mi ŋga ɓāt wa, ányúū nɛ wa sɔ́hyé ma. 33Ɓaá, wág ɔh mɓɛ́ ɓé nɛ ɔ kɔ̄nlé líwāndá jɔ́ɔ lí nsɔ́n ŋgɔ́ɔ́ ákaa ma ɓɔ̄ŋ la wa é?› 34Múŋ átē a ɔún, káísa ɔ óm nyɛ á m̀ɓog á njɔ́g á nlaaŋkán nɛ nyɛ́g a sálá epíl yɛ́ɛ́ ɛ́sɛ. 35Náŋ nɛ̄ Etāa a lɛ á lóō a ŋga kɛ́ ɓɛ́nɛ li ɓɔŋ, kíyáɓɛ́nɛ wa sig á póla yaná āh laakɛ ɓé mɔɔ́nɛ́sāŋ la m̀mím wɛ́ɛ́ ásɛ.»
දැනට තෝරාගෙන ඇත:
Matéus 18: NTB
සළකුණු කරන්න
බෙදාගන්න
සසඳන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2023, CABTAL