ගීතාවලිය 77

සංගීත අධ්‍යක්ෂක වෙත. යෙදූතුන්ට අනුව. ආසාෆ්ගෙනි. ගීතයකි.

1කෑ ගසා මම දෙවියන්වහන්සේට හඬ ගසමි;

උන්වහන්සේ මට කන්දෙන සේක.

2කරදර අසීරුතාහි දී මම ස්වාමින් සෙවීමි;

රැයේදී වෙහෙස නො බලා, මම දෑත දිගු කර ගෙන සිටියෙමි,

එහෙත් මට සැනසිල්ලක් ලැබුණේ නැත.

3අහෝ දෙවියන්වහන්ස මම, ඔබ සිහි කරමින්, කෙඳිරි ගෑවෙමි;

මම ඕනෑකමින් සිතා බැලුවෙමි; එවිට මගේ ආත්ම ශක්තිය පිරිහී යන්නට විය. සෙලා

4නිදන පිණිස දෑස පියාගන්නට ඔබ මට ඉඩ නො දුන් සේක;

මට කතා කරගන්නටවත් නො හැකි විය.

5යටගිය දවස් ගැන මම සිතුවෙමි,

ඈත අතීත අවුරුදු ගැන කල්පනා කළෙමි.

6රැයේදී මම මගේ ගීත සිහි කළෙමි.

මගේ හදින් ඕනෑකමින් සිතා බැලූ මම මෙසේ විමසීමි:

7“ස්වාමින් සදහට ම ප්‍රතික්ෂේප කරන සේක් ද?

යළි කිසි දින එතුමාණෝ කරුණා නො කරන සේක් ද?

8එතුමන්ගේ නොමියෙන පෙම සදහට ම අතුරුදහන් වී ද?

එතුමන්ගේ පොරොන්දු සැම කලට ම ඇනහිටියේ ද?

9දයා පෑමට දෙවියන්වහන්සේට අමතක වී ද?

එතුමෝ කෝපයෙන් තම අනුකම්පාව යටපත් කළ සේක් ද?” සෙලා

10එවිට මම කතා කොට, “මට වේදනා දෙන්නේ මෙය වේ:

මහෝත්තමයාණන්ගේ දකුණත පෙර තිබූ අයුරු නො වේ” යි කීවෙමි.

11 ස්වාමින්වහන්සේගේ ක්‍රියා ගැන මම සිහි කරන්නෙමි;

සැබවින් ම ඈත අතීතයේ ඔබ සිදු කළ හාස්කම් ගැන මම සිහි කරන්නෙමි.

12ඔබ සිදු කළ සියලු දේ මම මෙනෙහි කරන්නෙමි,

ඔබගේ සියලු බලවත් ක්‍රියා කල්පනාවට ගන්නෙමි.

13අහෝ දෙවියන්වහන්ස, ඔබගේ මාර්ග ශුද්ධ ය;

අපගේ දෙවියන්වහන්සේ මෙන් උතුම් අන් කවර දෙවියන් ද?

14ඔබවහන්සේ හාස්කම් කරන දෙවියන්වහන්සේ ය;

ජනයා අතරේ ඔබ, ඔබගේ බලය විදහා දක්වන සේක.

15ඔබගේ බලවත් හස්තයෙන් ඔබ, ඔබගේ ජනයා වන

යාකොබ්ගෙන් ද යෝසෙප්ගෙන් ද පැවත එන්නන් මුදන සේක. සෙලා

16ජල කඳන් ඔබ දුටු විට, අහෝ දෙවියන්වහන්ස,

ජල කඳන් ඔබ දුටු කල ඇඹරුණේ ය;

මහා ගැඹුර ගැහෙන්නට වන්නේ ය.

17වලාකුළු ජලය වැගිරවී ය,

අහස ගිගුරුම් හඬින් රැව් දුන්නේ ය;

ඔබගේ විදුලි, හී මෙන් ඒ මේ අත විහිදිණි.

18සුළි සුළඟ මැද්දේ ඔබගේ හෙණ හඬ ඇසිණ,

ඔබගේ විදුලියෙන් ලොවට ම එළිය විහිදිණ;

පොළොව වෙවුලා දෙදරිණ.

19ඔබගේ අඩි පාර, මුහුද ඔස්සේ විය,

ඔබගේ මාවත මහා සාගර ජලය ඔස්සේ ගිය නමුදු,

ඔබගේ පියසටහන් දක්නට නො විණි.

20මෝසෙස්ගේ ද ආරොන්ගේ ද අත යටතේ බැටළු රැළක් පරිදි,

ඔබ, ඔබගේ ජනයාට මග පෙන් වූ සේක.

දැනට තෝරාගෙන ඇත:

ගීතාවලිය 77: SCV

සළකුණු කරන්න

බෙදාගන්න

පිටපත් කරන්න

ඔබගේ සියලු උපාංග හරහා ඔබගේ සළකුණු කල පද වෙත ප්‍රවේශ වීමට අවශ්‍යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න

සිංහල කාලීන පරිවර්තනය පිළිබඳ වැඩිදුර දැනගන්න