ගීතාවලිය 56

සංගීත අධ්‍යක්ෂක වෙත. “ඈත දේශයේ නිශ්ශබ්ද පරෙවියා” යන තනුවට අනුව ය. දාවිත්ගෙනි. මික්තාම්#56:0 සාහිත්‍යමය හෝ සංගීතමය යෙදුමක් විය හැක කාව්‍යයකි. ගාත්හි දී පිලිස්තිවරුන් දාවිත් අල්ලා ගත් කල.

1මට දයා වුව මැනව, අහෝ දෙවියන්වහන්ස,

මිනිස්සු මා ලුහුබැඳ එති;

ඔවුහු දවස මුළුල්ලේ පහර දීම දැඩි කරති.

2මට අපහාස කරන්නෝ දවස පුරා මා ලුහුබඳිති;

බොහෝ දෙනෙක් උඩඟුකමින් යුතු ව මට පහර දෙති.

3මා බියපත් වූ කල, මම ඔබ තුළ විශ්වාසය තබන්නෙමි.

4මා වර්ණනා කරන වචනය හිමි දෙවියන්වහන්සේට ය.

එම දෙවියන්වහන්සේ තුළ මම විශ්වාසය තබමි; එබැවින් මම බය නො වන්නෙමි;

හුදු මිනිසා මට කුමක් කරන්න ද?

5දවස මුළුල්ලේ ඔවුහු මගේ වචන කණපිට පෙරළති;

හැම විටෙක ම ඔවුහු මට අනර්ථයක් කරන්නට කුමන්ත්‍රණ කරති.

6ඔවුහු රැස් ව මන්ත්‍රණ කරති; රහසේ රැක සිටිති;

මා යන එන තැන් ගැන විපරමින් සිටිති;

මගේ දිවි තොර කරන්නට උත්සුක වෙති.

7ඔවුන්ගේ දුෂ්ටකම නිසා ඔවුනට ගැලවී යන්නට ඉඩ නුදුන මැනව;

අහෝ දෙවියන්වහන්ස, ඔබගේ කෝපයෙන් ඒ ජාතීන් ඇද දැමුව මැනව.

8මගේ විලාපය වාර්තා කර ගත මැනව;

මගේ කඳුළු ඔබගේ සම් බඳුනෙහි රැස් කොට මැන බැලුව මැනව,

ඔබ ඒවා සටහන් කර ගෙන නැති ද?

9එවිට උපකාර ඉල්ලා මා හඬ ගසන කල,

මගේ සතුරන් ආපසු හැරී යනු ඇත;

දෙවියන්වහන්සේ මගේ පැත්තට වග එවිට මම දැන ගන්නෙමි.

10මා වර්ණනා කරන වචනය හිමි දෙවියන්වහන්සේ තුළ,

මා වර්ණනා කරන වචනය හිමි ස්වාමින්වහන්සේ තුළ,

11එම දෙවියන්වහන්සේ තුළ මම විශ්වාසය තබමි; එබැවින් මම බය නො වන්නෙමි;

මිනිසා මට කුමක් කරන්න ද?

12මම ඔබට භාරයක් වුණෙමි, අහෝ දෙවියන්වහන්ස,

මගේ ස්තුති පූජා, මම ඔබට පිළිගන්වන්නෙමි.

13මන්ද ඔබවහන්සේ මරණයෙන් මා ගැලවූ සේක;

පැකිළ වැටීමෙන් මගේ පා වැළකූ සේක;

එසේ කළේ, දෙවියන්වහන්සේ ඉදිරියේ

මා ජීවන ආලෝකයේ හැසිරෙන පිණිස ය.

දැනට තෝරාගෙන ඇත:

ගීතාවලිය 56: SCV

සළකුණු කරන්න

බෙදාගන්න

පිටපත් කරන්න

ඔබගේ සියලු උපාංග හරහා ඔබගේ සළකුණු කල පද වෙත ප්‍රවේශ වීමට අවශ්‍යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න

සිංහල කාලීන පරිවර්තනය පිළිබඳ වැඩිදුර දැනගන්න

ගීතාවලිය 56