යෝබ් 16:9-17

උන්වහන්සේ ස්වකීය කෝපයෙන් මට පහර දී මා ඉරා දමන සේක්; මා ගැන දත්මිටි කන සේක; මගේ එදිරිවාදියා මට ඔරවන්නේ ය. මිනිස්සු මට පරිභව කරන්නට තම මුව විවර කළෝ, පරිහාසයෙන් යුතු ව මගේ කම්මුලට ගසා, මට එරෙහිව එක් රොක් වෙති. දෙවියන්වහන්සේ නපුරු මිනිසුන් අතට මා පත් කළ සේක; දුදනන්ගේ ග්‍රහණයට මා හෙළූ සේක. සියල්ලෙහි දී මම යෙහෙන් සිටියෙමි; එහෙත් උන්වහන්සේ මා විසුණු කළ සේක; උන්වහන්සේ මා බෙල්ලෙන් අල්ලා, පොඩිකර දැමූ සේක. උන්වහන්සේ මා ඉලක්ක කර ගත් සේක. උන්වහන්සේගේ දුනුවායෝ මා වට කොට සිටිති; අනුකම්පාවක් නැතිව උන්වහන්සේ මගේ වකුගඩු පසාරු කර, මගේ පිත බිම ඉහිරවන සේක. නැවත නැවතත් උන්වහන්සේ මා පිට කඩා පනින සේක්; රණවිරුවකු සේ විගස මා වෙත එන සේක. “මම ගෝණි රෙදි මසා මගේ ගත වසා, මගේ අඟ දූලියෙහි හෙළා සිටිමි. වැලපීමෙන් මගේ මුහුණ රතුවී ගොසිනි; මගේ ඇස් වටා ගන කළු ලප මතු වී ඇත. එනමුත් මගේ දෑතෙහි සැහැසිකම නැත; මගේ යාච්ඤාව පවිත්‍ර ය.