යෙසායා 1:1-4

උස්සියා, යෝතාම්, ආහාස් හා හෙසකියා යන යූදාහි රජවරුන්ගේ පාලන දවස්වලදී යූදා හා යෙරුසලම ගැන ආමෝස්ගේ පුත්‍ර යෙසායා දුටු දර්ශනය ය. එම්බා අහස් තලයෙනි, මේ අසනු! එම්බා පොළොව, සවන් දෙනු! මන්ද ස්වාමින්වහන්සේ කතා කළ සේක: “මම දරුවන් හදා-වඩා, ඇතිදැඩි කළෙමි. එහෙත් ඔවුහු මට එරෙහිව කැරලි ගැසූහ. ගොනා උගේ හාම්පුතා ද බූරුවා උගේ හිමිකරුගේ ගාල ද දනියි. එහෙත් ඉශ්‍රායෙල් දන්නේ නැත; මගේ ජනයා වටහා ගන්නේ නැත.” අහෝ, පව්කාර ජාතියක් ද අයුතුකමෙන් බර ජනතාවක් ද දුෂ්ටකම් කරන්නවුන්ගේ පැටවුන් ද දූෂිතයට ගැති දරුවන් ද වන ඔවුහු ස්වාමින්වහන්සේ අත්හැරියහ. ඉශ්‍රායෙල්ගේ ශුද්ධ තැනැන්වහන්සේ හෙළා දුටු ඔවුහු, උන්වහන්සේට තම පසු පස හැරවූහ.