1 සාමුවෙල් 31:1-4

තවද පිලිස්තිවරු, ඉශ්‍රායෙල්ට එරෙහිව සටන් වැදුණහ. ඉශ්‍රායෙල්වරු ඔවුන් ඉදිරියෙන් පලා ගොස්, ගිල්බෝව කන්දේදී මැරුම් කා, වැටුණහ. පිලිස්තිවරු, සාවුල් හා ඔහුගේ පුතුන් පසු පස දැඩි ව ලුහුබැඳ ගොස්, සාවුල්ගේ පුතුන් වූ යොනාතාන් ද අබිනාදාබ් ද මල්කී-ෂුවා ද මරා දැමූහ. සටන සාවුල්ට එරෙහිව බිහිසුණු විය. දුනුවායින් ඔහුට හමු විණ. දුනුවායෝ බරපතළ ලෙස ඔහුට තුවාල කළහ. එවිට තම ආයුධ දරන්නාට කතා කළ සාවුල්, “නුඹේ අසිපත ඇද, මා පසාරු කර ගෙන යෑමට මට අනිනු! නැතහොත් මේ චර්ම-අඡේදිතයන් අවුත්, මට ඇන, මට අවනම්බු කරනු ඇතැ” යි පැවසී ය. එහෙත් ආයුධ දරන්නා එසේ කළේ නැත. මන්ද ඔහු අතිශයෙන් භයපත් ව සිටියේ ය. එබැවින් සාවුල් තම අසිපත ගෙන, ඒ මත වැටුණේ ය.