MATEU 27
27
Yeesu apënanda pëtsëp di Pilaatus
(Mar 15.1; Lúk 23.1-2; Joŋ 18.28-32)
1Ujënts unu, bawiak-bajakan ni bawiak Bajudeu bëlieng baar pëloole tsi uleka Yeesu pë pëfiŋa. 2Bi ba tanul bi, a ba tsëpandul ee gutsarul Pilaatus, nan tsij-ni-pëboos.
Judas afiŋar
3 #
Ngë 1.18,19 Bi Judas, nul nan gutsuli, win bi Yeesu lacana, din a na ru yaar ibats, a na kakan bawiak-bajakan ni bawiak Bajudeu, ngëntaaja ngëwaants ngun, ngi uncaam-utsak; 4a na ja: “Ma ndo ujuban, par ma n tsu na lacätsi pa na fiŋa.” Maa a ba yankul aja: “Mtúm wund we tsul? Wi ruka un m me!” 5A Judas guts uncaam umënts wun di kato-kayëman, a na pën atsëp ee ŋaaŋar acäts. 6A bawiak-bajakan coonts uncaam, a ba ja: “Níiranaatsa pëkakan di tsëgaangi uncaam uyëman, par aci-uncaam pëñaak.” 7A ba ñakan abaar pëloole, a ba jej uncaam umënts wun aweelëna irig naniew itsukar, pa përo unguran batsooŋ. 8Wul ka wun irig umënts yun kë jaka irig pëñaak, te ntsari. 9#Sak 11.12,13Ko wi tsu prim Jeremias nayëlia pa ci ucär, bi na ja bi: “Bu jej ngëntaaja ngëwaants uncaam-utsak, un ci wi përes pi balon tsi babuk Israel tsurul pi; 10a ba welna irig naniew itsukar, bi Ajug ro bi tsuin pëja.”
Yeesu tsi bërun Pilaatus
(Mar 15.1-15; Lúk 23.1-25; Joŋ 18.28-40; 19.1-16)
11A Yeesu natsana tsi bërun na tsijëna-ucaak. A na tsijëna-ucaak yeparul, aja: “Wi ci-un nasien bajudeu-a?” A Yeesu yankul, aja: “Bi m ja bank.” 12Maa kaats ko wi na ja wi tsi uleka ngi bawiak-bajakan ni bawiak Bajudeu, tumtsarul ngi. 13Din a Pilaatus na tsijëna-ucaak jaul: “M teets ngi ba jaaru ngank bëlieng-a?” 14Maa Yeesu yankatsul nin përim pëloole; a u pikran mak na tsijëna-ucaak.
Yeesu alacana pa pëfiŋa
(Mar 15.6-20; Lúk 23.13-25; Joŋ 18.38—19.16)
15Na tsijëna-ucaak Baroman awakëtsa pëja tsi Ufesta në wëtan narica naloole ni kandënd bañaan yepi. 16Bu ro ka nalon narica na mee-e mak, ka jaka #27.16 Barabas: oo Yeesu BarabasBarabas. 17Bi ba júk bi, a Pilaatus ja bukul: “Naom ni nda ŋal un n doon ka wëtandar ind, Barabas, oo Yeesu nul ni ka n jakee Këristu?” 18Par nul ame u ci-undo mankocar ka wun ba gutsariul Yeesu. 19Bi Pilaatus tsoar bi di kato kawat-pëleents, a aarul wëtaniul përim aja: “Tsë tsu mtumu di ko niints namabal ni, par ntsari ma noor mak tsi utsaafi, ujaraul.” 20A bawiak-bajakan ni bawiak Bajudeu, tsu kandënd bañaan ba yepul Barabas, Yeesu ka tsua na fiŋa. 21A na tsijëna-ucaak jej uñakan, a na ja bukul: “Naom tsi batëb biki ni nda ŋal un nji pëwëtandar ind?” A ba yankul aja: “Barabas!” 22A Pilaatus ja bukul: “A we wi n du do wun Yeesu, nul ni ka n jakee Këristu?” A ba yank bëlieng aja: “Na rieŋaan di Kërúus!” 23Maa a na tsijëna-ucaak ja: “Wee na ro wun, u waraatsa wi?” A ba ru pe këpe pëlië mak, koo ja: “Na rieŋaan di Kërúus!” 24#Ulú 21.6-9Bi Pilaatus win bi na nayëlants ko tsul, a mangëbulër kë watsësar, a na jej mlik, a na ñaw iñan tsi bërun kandënd bañaan, a na ja: “Iñan nji jënts tsi katul pëñaak namëntsi. Ind ka teen bukun.” 25A bañaan-ucaak yankul bëlieng aja: “Pëñaakul pa kakari wund ni upäts wund!” 26Din, a Pilaatus wëtandar bukul Barabas, a na tsu a Yeesu tucana; a uu ba, a na gutsarul përieŋa di kruus.
Basondaari ci tsi përiat Yeesu
(Mar 15.16-26)
27A basondaari na tsijëna-ucaak tsëpand Yeesu di bametsu kato-pësien; a ba jukëlën kandënd basondaari bëlieng, afayul. 28A ba tiemësul iŋi, a ba kulul ni kapantu kajankal caw, 29a ba sier ucape iyu com wi pësien apaful tsi been, a ba mobanul pëndog pëkëpats tsi kañan kariir; a uu ba, a ba jintëla tsi bërunul, a bu kë riatul, koo ja: “Ciin tsi pëfac, nasien Bajudeu!” 30A bu kë tújarul, a ba yankënul pëndog pëkëpats, a bu kë kobënul pul tsi been. 31A ba riatul a uu ba, a ba pënanul kapantu, a ba kakan iŋi-bëtiemul awaanul, a ba tsëpandul pii rieŋ di kruus.
Yeesu arieŋa di kruus
(Mar 15.21-32; Lúk 23.26-43; Joŋ 19.16-27)
32Bi ba pën bi pëtsëp, a ba jëk ni nalon niints nan pënë-nii Sireeni, katimul Simon; a ba forsaarul na lap kruus Yeesu. 33Bi ba band bi tsëko tsi ka n jaka tsi Golgota, un ci wi tsëko kankunkaloŋ, 34#Iya 69.22a ba tsu Yeesu përaan pëwat pan gëbëlëna pi ni ko uwaayal; maa bi na mel bi pul, a ŋalats përaan pul. 35#Iya 22.19A ba rieŋul di kruus a uu ba, a ba júgats afaar iŋi-bëtiemul, 36a ba tsoar a bu kë waayul. 37A përim picana apiban ko un ka wi na lacana, a pa tsua tsi ruets been Yeesu; iink di pa ja run: “NAMËNTSI ACI YEESU, CI UN NASIËN BAJÚDEU.” 38A ngëfët ngëtëb rieŋa ni nul, nalon tsi kariir, nacints tsi kamay. 39#Iya 22.8; 109.25A biki kan par biki tsul kë karul, a bu kë siints iyeen 40#Mat 26.61; Joŋ 2.19koo ja: “Wi ni kan gari kato-kayëman, kë kakan kul ka niew tsi ngënu ngëwaants, buerani-e beenu! Uci bi m ci bank Abuk Nasien-batsi, welee di kruus!” 41A bawiak-bajakan, ni bapican-utaua, ni bawiak Bajudeu kë riatul buts, a bu kë ja: 42“Abueran balon, a yëlants pëbueran beenul! Aci nasien Israel ank, na welee-e di kruus, din nja ka fiaarul! 43#Iya 22.9Awatsaraan tsi Nasien-batsi, Nasien-batsi na bueraniul-e inkri, uci na ŋalul; par aja: ‘Nji n ci-un Abuk Nasien-batsi.’” 44A ngëfët nga dieŋa ngunk ni nul di kruus kë karul koo ja ank buts.
Pëcäts Yeesu
(Mar 15.33-41; Lúk 23.44-49; Joŋ 19.28-37)
45Pëkur tsi uson unu, te ngëwal ngëwaants, a ucaak karëmts bëlieng. 46#Iya 22.2Uwokan ngëwal ngëwaants, a Yeesu kat përim alie mak, aja: “Eli, Eli, lema sabaktani?” Un ci wi: “Nasien-batsi nji, Nasien-batsi nji, we ka wun m bërin?” 47A balon tsi ban ci biki tsul teul, a ba ja: “Aci tsi përu Eliyas.” 48#Iya 69.22Tsi uyëk umënts wun, a nalon túk ee jej kapoons, a na yuag kul di buneegar añuawan; a na buats kul tsi bujul pëndog pëkëpats, a na colanul na raan. 49Maa a bacints buku n ja: “Wëtan, ngë teen-e ne Eliyas ka bi ank pëbueranul.” 50A Yeesu kaka kat përim alië mak, a na juab. 51#Pëp 26.31-33Uyëk umënts wun, a uridu tsëko-tsëyëman tawee di ruets te di utsia, aro itawar itëb; a utsia siintsar, din a ilaak tawa. 52A ibuk waantsar, a ngëliaf bañaan Nasien-batsi bacumal, bando biki cäts, natsee di pëcäts. 53Bi Yeesu natsee bi di pëcäts, a ba pëni di ibuk, a ba niaj përaasa pëyëman, un ci wi Jerusalem; a ba pibandar tsi bañaan bacumal. 54A bi kapëton basondaari, ni ban ci biki ni nul tsi pëwaay Yeesu, win bi utsia usiintsar bi, ni ngandola ngi, a ba lënk mak, a ba ja: “Tsi ubaaraari, namëntsi ron un ci Abuk Nasien-batsi!” 55#Lúk 8.2,3A u ka rul bakaats bacumal ba natsi biki alawan, a bu kë teeni; bu fetsëni Yeesu di Galileeya, a bu kë këmandul. 56Tsi bukul, aci Maaria kanpën-ni Magëdala, ni Maaria, anin Jakob ni Juse, ni anin babuk Sebede.
Puum Yeesu amooya di pëbuk pëwalu
(Mar 15.42-47; Lúk 23.50-56; Joŋ 19.38-42)
57Uyër pëcaal, a nalon niints narëmb baandi, katimul Juse, apënë-ni Arimateeya. Nul buts, ee ci nafets Yeesu. 58A na tsëp di Pilaatus, a na yepul puum Yeesu. Din, a Pilaatus tsu na wëla pul. 59A Juse jej puum, a na bëb pul ni pëfaal pëjëntsal, 60a na mooy pul di baarul, buwalu, bi nul Juse ro bi tsu a ba jëparaul di bulaak. A uu ba, a na kël pëlaak pëwiak asëts tsi mtum pëbuk, a na pën atsëp. 61A Maaria kanpën-ni Magëdala ci tsul, ni Maaria mcínts; a ba tsoar amabular ni pëbuk.
Basondaari awaay pëbuk
62A unu kë fa, u nek wi unu pëyecisër ngëko, a bawiak-bajakan ni Bafariseu júk, a ba tsëp di Pilaatus, 63#Mat 16.21; 17.23; 20.19; Mar 8.31; 9.31; 10.33,34; Lúk 9.22; 18.31-33a ba jaul: “Ajug! Wund ales natsupalar namënts un ro ja uwal wi na wama wi ci: ‘Upar ngënu ngëwaants, ka n natsee di pëcäts.’ 64Tsuun pëbuk pa waaya te unu uwaajantsan, pa bafetsul përits bi bee ba kiej puum, a uu ba, bu ka ja bañaan: ‘Anatsee di pëcäts.’ Din, kafäl katuami ka pe kacak pëjuats.” 65A Pilaatus ja bukul: “Nda jejan balon bawaay, ndë tsëp ndii waay pul, bi nda ŋal bi.” 66A ba tsëp, a bee ríc pëbuk aliincan, a ba tsu umarëka tsi pëlaak, a ba tsuund bagaarir.
දැනට තෝරාගෙන ඇත:
MATEU 27: KPKNT
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Le Nouveau Testament en langue Manjaku © Alliance Biblique du Sénégal, 2020.