MATEU 21
21
Uniaj Yeesu Jerusalem
(Mar 11.1-10; Lúk 19.28-40; Joŋ 12.12-16)
1Bi bu kë wokan bi Jerusalem, a bu kë niaj untab wi kanjaka wi Betëfage, di kajara untunda #21.1 Mëoliwa: Apënëni tsi përim Oliveira. Aci bëlon bëko di Israel, ba naam bi bunguen, a buu pënan msiiti mi kanjaka munk msiiti oliweraMëoliwa, a Yeesu yël bafets, batëb; 2aja bukul: “Nda tsëpan untab wi tsi bërun ind. Uband ind, din ndë tsënk ubúuru ukaats un tana wi; aci ni ubuk; ndë paci, ndë tsijiin ngul. 3Uci ñaanja ind ko, ndë jaul Ajug afier ngul; din uyëk umënts në wëtani ngul.” 4A undola wink ci përim pi nayëlia ro pi ja kee pa ci, përim pëmënts ci pun pi:
5 #
Sak 9.9
“Nda jaan bañaan përaasa Sion:
‘Nda teenan-e, nasien ind ka bi ink tsi ind,
awelan beenul, arija ubúuru ukaats,
arija ubuk-ubúuru, ubuk uncaam uyuunts.’”
6A bafets tsëp, a ba ro ko wi na ja wi bukul. 7A ba tsiji ubúuru ukaats, ni ubuk-ubúuru. A ba paf iŋi-bëtiem bukul tsi ngul, a Yeesu tsoar tsi yul. 8A bañaan kandënd bacumal mak liap iŋi-bëtiem bukul tsi bëga; a balon fali ina mko ee liap tsi bëga. 9#Iya 118.25,26A indënd bañaan, i yër yi Yeesu bërun, ni indukaul yi tsi ufets, kë lië a bu kë ja: “#21.9 Osana: aci përim tsi ulíingu Uyebëreu. Ko wi, wi pa pac wun: Buerani!Osana, abuk Dawid! Ni kan bi ink tsi katim Ajug, na jaaran-ngëwar! Osana ri tsëko tsan pe tsi pëci ri ruets!” 10Bi Yeesu niaj bi Jerusalem, a përaasa gëbulër bëlieng, a bu kë yepar koo ja: “Yën ci-un namëntsi?” 11A indënd bañaan kë yankës bukul koo ja: “Namëntsi ci-un Yeesu, Nayëlia, Kanpënë-ni-nasaret, di Galileeya.”
Yeesu tsëp kato-kayëman
(Mar 11.15-18; Lúk 19.45-48; Joŋ 2.13-22)
12Yeesu a niaj kato-kayëman, a na ruaki rul bawaap ni baweel bëlieng; a na kuutës ngëntabul batsëtsëlan uncaam, ni itsoari bawaap ngëtuuba. 13#Isa 56.7; Jer 7.11A na ja bukul: “Ko wi picana wun, kato nji ka ci kato-kayëman, maa ind, nda ro kul tsëko kambeku bakiej.” 14A bakuel ni balab tsëp di nul di kato-kayëman, a na yësan bukul. 15Maa bawiak-bajakan, ni bapican-ulua win ngëko bawitsa ngi Yeesu ro ngi; a upäts kë liënddi kato-kayëman koo ja: “Osana, abuk Dawid!” Bi ba win bi ngëmënts ngan, a ba riabats; 16#Iya 8.3a ba yeparul aja: “M te aatsum ko wi upäts biki kë ja wi-a?” A Yeesu yankës bukul, aja: “Ee-e! A nda jukats koon këjúk përim pan picana pink-a? ‘M pënanaa-ni ubëndan tsi mtum upäts uties, ni ba wama biki ka buat.’” 17A Yeesu ruk bukul, a na pëni di përaasa atsëp Betaania ee fër rul.
Bëfíigu ban bukats bi
(Mar 11.12-14,19-24)
18Bi Yeesu kë kaki bi përaasa bëfa búŋ, a na bonats. 19Tsi kambaŋ bëga, a na win bëlon bufíigu, a na tsëp awok bul; maa winats ko di bul, aci ito ijënts. A na ja bul: “M katse kë buk yaas!” Ucar umënts wun a bëko kay. 20Bi bafets win bi ko wan, a ba pikra a ba ja: “A bufíigu bi ro um a ba kay ucär umënts wun?” 21#Mat 17.20; 1Kor 13.2A Yeesu yank bukul, aja: “Mán leents ind ucär: Uci nda ka uwak a nda tsijënats ngëwejats ngëtëb, cits undola wink bufíigu bi wi ndë yëlan wun përo rin; maa ŋal ndë ja untunda wi: ‘dëtaan kë yër di bërëk,’ u roaa bi nda ja bi. 22Ko wi nda yep wi ba këyep tsi bëñaan, a nda mob tsi uwak, ndë wëlaa.”
Yeesu aka pëyëlan
(Mar 11.27-33; Lúk 20.1-8)
23Yeesu niaj kato-kayëman, a na ci tsi bëjukan. A bawiak-bajakan, ni bawiak Bajudeu baandi tsi nul, a ba yeparul aja: “Wee m tsënkanaan wun përo ngëko ngi? A yën wëlu un pëtsënkan përo ngul?” 24A Yeesu yepar bukul aja: “Nji buts, man ka përim pëloole pi ndu n yepar ind pi. Uci nda yankin, ka leents ind ko wi n tsënkanaan wi përo ngëmënts ngi. 25Bëmijan Joŋ apënëni tsum? Di Nasien-batsi oo tsi bañaan-bajin?” A ba tseendar ibats aja: “Uci ngë ja, di Nasien-batsi, në jainja: ‘A we ka wun nda fiaaratsul?’ 26Maa uci ngë ja, tsi bañaan-bajin, ngë lal kandënd bañaan, par bëbaaraan pëfiaar Joŋ ci nayëlia.” 27A ba yank Yeesu ajaul: “Wund meets.” A Yeesu ja bukul: “Nji buts, in di ka n leents ind ko wi n tsënkanaan wi përo ngëmënts ngi.
Katib Përim ka naamanaan upäts batëb
28Wee nda ja wun tsul? Aka nalon niints, nan kai upäts utëb; a na tsëp awok nacak, a na jaul: ‘Napäts, yaan ntsari kë leemp di uwoorta mko ubiiñu.’ 29A abukul yankul aja: ‘Nji n ŋalats.’ Maa a na ru yaar ibats, a na tsëp ee leemp. 30A niints tsëp awok abukul natëbantsan, a na jaul përim pëloole pëmënts pun. A namëntsi yankësul, aja: ‘Ee-e, Ajug!’ Maa, tsëpats. 31Naom tsi batëb biki do un uŋal asin?” A ba yankul aja: “Nacäk.” A Yeesu ja bukul: “Mán leents ind ucär: Bayep bëluk-uraasa, ni bakaats batúk-ufuts, bu ka yër ind bërun pëniaj pësien Nasien-batsi. 32#Lúk 3.12; 7.29,30Par, Joŋ abi ee piban ind bëga bëmabal, a nda fiaaratsul. Maa bayep bëluk-uraasa, ni bakaats batúk-ufuts, bu fiaarul; a ind ba win biki umënts wun, nda bitse yaar ibats ndë fiaarul.
Katib Përim ka naamanaan baleemp ba waraatsa biki
(Mar 12.1-12; Lúk 20.9-18)
33 #
Isa 5.1,2 Nda cikëndëni-e pëlon përim pan tiba pi: Aka nalon nawiak kato na yíiri uwoortaul wi mko ubiiñu, a na cag afayësan, a na jëp tsëko tsëpuañi, a na niew tsëko kawaay ayampan. A uu ba, a na rukar bayíil, a na tsëp bëyaas. 34A u band uwal kamar mko, a na yël baleempul di bayíil pii yanki mbuk uwoorta. 35A bayíil mob baleemp bamënts bukun, ba tucan nalon, a ba fiŋ nacints, a ba tapëna nawaajantsan ilaak. 36A na yël kak balon baleemp, ban pe biki bacäk bukun pëcum. A bayíil bi ro bukul pi bacäk bukun. 37Tsi utuami, a na yël abukul di bukul, a na ja: ‘Bu kee ba rispitaar abuk nji.’ 38Maa bi bayíil win bi abukul, a ba jaalër përim pi: ‘Namëntsi ci-un narukanda uwoorta; nda ju ngë fiŋul, din nja ka kaana bërukandaul.’ 39A ba ñaaful apënanul di uwoorta mko ubiiñu, a ba fiŋul.” 40A Yeesu ja bukul: “Bi u ci bank, u baandi ajug uwoorta mko ubiiñu, wee nu ro wun bayíil bamënts bukun?” 41A ba yankul aja: “Ka tsu bajuats-ngëwaas bamënts bukun ba cäts pëcäts pëjuatsal, në rukar balon bayíil uwoorta mko ubiiñu, biki ka wëlul biki mbuk, tsi uwal mul.” 42#Iya 118.22,23A Yeesu ja bukul: “Nda jukats koon këjúk ko un picana wink-a?
‘Pëlaak pi baniew bër pi,
pul bi ci pëcap pëniew.
Ko wan, aci Ajug ro un.
Pa n ja, aci ko un par wi pëjaa.’
43Wul ka wun ndu nja ind: Pësien Nasien-batsi ka pënana tsi ind, pë wëla bañaan biki kando biki ngëko pul. 44Na yëri tsi pëlaak pëmënts pun në gara-gara. A ni pa yërëni, pë nojëlul.” 45Bi Bafariseu ni bawiak-bajakan te bi Yeesu tib irim yan, a ba me u ci uleka bukul wi na ñakanaan wun. 46A bu kë tsas bi bu kë mobul bi; maa bu lal indënd bañaan. Par, pa bañaan, Yeesu aci nayëlia.
දැනට තෝරාගෙන ඇත:
MATEU 21: KPKNT
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Le Nouveau Testament en langue Manjaku © Alliance Biblique du Sénégal, 2020.