Matiye 28
28
Yeesu fintii
(Marku 16:1-10, Luka 24:1-12, Yuhaana 20:1-10)
1No nyalaane siwteteene yawti, alal subaka, Mariyama Magadalaajo e Mariyama oo to dawi, yahi daaroygo yanaane nen. 2Ɗon de woore, leydi dimmii e semme. Malaykaajo Joomiraawo jippii diga dow kammu, talli hayre mawne nen, jooɗii dow mayre. 3Oo jalbitoo hande maƴƴere, gineeji makko e rawni hande malamalluuje. 4Reenuɓe ɓen huli faa e diwna, ɓe laatii hande maayɓe. 5Malaykaajo wi'i rewɓe ɓen: «To on kulee onon! Mii anni Yeesu tigganooɗo dow leggal palaaŋal nun daartoton. 6O walaa ɗo, o fintii hande no o wi'unoo on. Garee daaree to o fukkinoo. 7Tinnee lallaw, batee aahiiɓe makko o fintii diga e maayde. O na'on heɗii on Galili, on ji'an mo ton. Ka goodumi mi bata on nun ɗon.»
8Rewɓe ɓen yawti law diga to yanaane nen, go kulol e seyo waɗi ɓe sanne. Ɓe doggi ɓe batoy aahiiɓe makko habaru on. 9Ɗon maa ɗon, Yeesu fotti e maɓɓe, wi'i ɓe: «Mii sanna on!» Ɓe ɓattii mo, ɓe kappi koyɗe makko, ɓe cujidani mo. 10Den Yeesu wi'i ɓe: «To on kulee! Jahee, batee banniraaɓe am, ɓe jaha Galili. Ton nun ɓe ji'atammi.»
Ka reenuɓe yanaane seedii
11Wakkati rewɓe ɓen yanti laawol, soogeeji deenuɗi yanaane nen goɗɗi mum naati e genni, e bata hooreeɓe *liimaamiiɓe ko waɗi fu. 12Hooreeɓe liimaamiiɓe, e *dottiiɓe waɗi hawriine, ɓe baddi, ɓe kokki soogeeji ɗin ceede ɗuuɗɗe, 13ɓe bi'i ɓe: «Bi'ee aahiiɓe makko nun wari jemma, tawi oon ɗaani, wujji ɓannu makko. 14To hooreejo leydi nanii ka, menen nun anni ka batata mo, men burtina on e toora fu.»
15Soogeeji jaɓi ceede mum, waɗi no wi'aa. Hande non haala kan sankitorii caka *Yahuduuɓe faa warugo hanne.
Yeesu hollitanake aahiiɓe mum
(Marku 16:14-18, Luka 24:36-49, Yuhaana 20:19-23)
16Aahiiɓe sappo e go'o ɓen yahii Galili, dow waanne ne Yeesu tintinnoo ɓe ɓe jaha. 17No ɓe ji'i mo, ɓe cujidani mo, amma woɓɓe maɓɓe waɗii seko. 18O ɓattii, o wi'i ɓe: «Mi hokkaama baawɗe dow kammu e leydi fu. 19Gam majjum jahee, gaɗee himɓe lenyi fu aahiiɓe am. Gaɗee ɓe *batisi e inne Baaba e Ɓiɗɗo e Ruuhu Ceniiɗo. 20Janŋinee ɓe ɓe tokka ko batumi on fu. Annee, mii wondi e mooɗon nyalaane fu, faa timmoode duuniyaaru.»
දැනට තෝරාගෙන ඇත:
Matiye 28: BFB
සළකුණු කරන්න
බෙදාගන්න
සසඳන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Bible Fulfulde Bénin © SIM International 2015, 2024.