Zaã 18
18
Yezu a kũ boo
(Mat 26.47-56; Mar 14.43-50; Luk 22.47-53)
1Bɛa boon lɛn diɛ kio, Yezu kiɛ̃ kun ka a kialandɛnan nɛ, ǹ nə́ Sedrɔn tà gòã kuru ǹ nə́ woo a kio. Dù gɔrɔ kɔ́n goã walan, á wɔ bɛ-n kun ka a kialandɛnan nɛ. 2A da yaa, Zudaasi mɛn bɛ́ we a zɔ́ɔn gɔn, bɛ dɔ á bɛa bǎã lɛ doɛ̃, a giala, Yezu goã bɛ̀ a da kun ka a kialandɛnan nɛ walan gunyin damata. 3Bɛ lɛ nɛ, Zudaasi mɛ Rɔmu sɔraasi kuru kɔ́n nyɛɛnɛ, á woo dù gɔrɔ lɛ nɛ; Lawa a wúlu-bɔlen goledɛnan laanka *Fariziɛ̃n nə́ garadin dia kunun ǹ ni. Ǹ nə́ woo ka zia da ǹ mànan nɛ, ka bolonən ne, ka làpaa tɛn nɛ. 4Sii mɛn tumaa bɛ́ re Yezu yii a bɛ́ a yii doɛ̃, á nɔmaa á woo n da ǹ lɛ á pɛ ǹ nɛ: «Ka ǹ giɛ die li?»
5Ǹ ná a lɛ si mà Nazarɛtin Yezu.
Yezu tɔ́n pɛ ǹ nɛ: «Ma din lɛ-n ke.»
Bɛ á zɛnɛɛ, Zudaasi mɛn bɛ́ we a zɔ́ɔn gɔn, bɛ̀ bɛ lɛ á kunun ǹ ni. 6Yezu bɛ́ á pɛ ǹ nɛ lɔn mà asɛ din lɛ-n ke, ǹ nə́ woo ka ǹ kio ne ǹ nə́ bɔ ǹ nə́ kaa. 7Yezu wusoo á nɔ̀n da ǹ la mà maǹ giɛ die li?
Ǹ ná a lɛ si mà Nazarɛtin Yezu.
8Yezu tɔ́n pɛ ǹ nɛ: «Má pɛ ka nɛ máa ma din lɛ-n ke. Bɛ̀ ka ǹ giɛ ma din li, ka kɛn toa walan ǹ woo.»
9A bɛ́ á goã á pɛ mà asɛ a Díi min mɛnɛn kɔ asɛ la, mà asɛ toa ǹ kɔ́n bɔ̀n baa wa, bɛa boo lɛ a lɛ pã ǹ gɔn nɛ ka bɛ nɛ.
10Simɔn Piɛrɛ sɛ, gɔya sa kɔ́n goã bɛ gɔn. Á woɛ̃ á bɔ a kii ni, á wúlu-bɔlen kiã a dí-nyali a gusin a too na nɛ. Bɛa dí-nyali lɛ tɔ mà Malkusu. 11#Mat 26.39; Mar 14.36; Luk 22.42 Yezu tɔ́n pɛ Piɛrɛ nɛ: «N gɔya lɛ wɔ a kii ni! Maa Díi nɔmaa mɛn kɔ ma la, ma n taasɛ mà maa die lɛ koe bɛ-a wa?»
Maǹ woe ka Yezu ni wúlu-bɔlen kiã a piɛ
12Sɔraasi kuru lɛ laanka ǹ goledɛnaa nɛ ka Zuifun garadin lɛn nɛ, ǹ nə́ Yezu kũ ǹ nə́ yii, 13ǹ nə́ woo ne wúlu-bɔlen kiã zizi Anɛ a piɛ bɔrɔ. Kayifu mɛn bɛ́ wúlu-bɔlen kiã lɛa bɛa lɛ̀ lɛ-a, bɛ lɛ dàãgiĩ-n ka bɛa Anɛ lɛ nɛ. 14#Zaã 11.49-50 A din Kayifu lɛ na á pɛ Zuifun pàãdɛnan manɛ mà á soɛ ǹ ganaa, min goon gã min tumaa a lɛa.
Piɛrɛ a piã ka Yezu a kialandɛnaabaa-n boo
(Mat 26.69-70; Mar 14.66-68; Luk 22.55-57)
15Simɔn Piɛrɛ laanka ǹ miã kialandɛnaa lɛ goon nə́ kɔ Yezu kio lɛ. Wúlu-bɔlen kiã tá bɛa kialandɛnaa lɛ doɛ̃; bɛ lɛ nɛ, Yezu bɛ́ we wúlu-bɔlen kiã a sumu gɔ́ɔ̃ nɛ ǹ mɛn waáraa, a dɔ wɔ kun ni, 16sɛnɛ, Piɛrɛ sɛ golee kiɛnlɛ-a kanaa. Bɛa kialandɛnaa kɛ lɛ wúlu-bɔlen kiã n doɛ̃, bɛ lɛ soo, lɔ mɛn bɛ́ kiɛnlɛ lɛ lɛduĩ, á boo da ka bɛ nɛ, á tɔ́n Piɛrɛ kũ á wɔ-n sumu gɔ́ɔ̃ nɛ. 17Lɔ lɛ kiɛnlɛ lɛduĩ, bɛ́ tɔ́n pɛ Piɛrɛ nɛ: «N dɔ goã giĩ kɛ lɛ a kialandɛnaa goon lɛa wa?»
Piɛrɛ mà a ganaa, mà asɛ ba a lɛa wa dɛ!
18Dí-nyalin laanka garadin nə́ tɛ koa, ǹ nə́ goã n gɔ̀nɔn wɛ̃ a ganaa, a giala, nyan na á goã boe. Piɛrɛ dɔ́ goã ǹ li n gɔ̀nɔn wɛ̃.
Wúlu-bɔlen kiã nɔ̀n mɛn da Yezu la
(Mat 26.59-66; Mar 14.55-64; Luk 22.66-71)
19Wúlu-bɔlen kiã bɔ á mɛ la, á nɔ̀n da Yezu la a kialandɛnan wɔ gɔn la ka a daraa wɔ a paǹ dɔ nɛ. 20Yezu tɔ́n pɛ-n kɛnɛn: «Má boo da min tumaa-n foaãnɛ; biikoo woo biikoo, lɛsɔkɔn kionən mɛnɛn laanka Lawa a kion mɛn bɛ́ kaa lɛsɔkɔn bǎãn lɛa, má minin daraa bɛn nɛ. Ma boo kɔ́n da má duru ka la wa. 21Wàa na á baa n tá nɔ̀n diɛ ma la? Ma màn mɛn pɛ, min mɛnɛn nə ma, nɔ̀n da bɛn la. Ma màn mɛn pɛ ǹ tá doɛ̃.»
22Bɛa boon lɛn nə́ bɔ Yezu lɛ-n lɔn, garadi lɛ mɛn bɛ́ a genli, bɛ nə́ n gɔn tɔ a para-n, bɛ̀ á n pii ni mà a wúlu-bɔlen kiã lɛ si ǹ gɔn nə ke koɛ?
23Yezu tɔ́n pɛ nɛ: «Bɛ̀ má boo baraa da, maa boo lɛ a paǹ mɛn bɛ́ baraa, bɛ nyaa. Sɛnɛ, bɛ̀ á daa yaa má boo sonbore da, wàa na á baa n tá ma dii?»
24A bɛ́ miɛ̃, Anɛ Yezu toa yii ni á dia wúlu-bɔlen kiã Kayifu la.
Piɛrɛ a wusoo a piã ka Yezu-n boo
(Mat 26.71-75; Mar 14.69-72; Luk 22.58-62)
25Bɛ á zɛnɛɛ, bɛ̀ Simɔn Piɛrɛ á tɔn tán n gɔ̀nɔn wɛ̃ tɛ ganaa. Ǹ nə́ nɔ̀n da la mà a dɔ́ bie giĩ lɛ a kialandɛnan lɛn goon lɛa wa ya?
Piɛrɛ nə́ n piã, á pɛ mà asɛ ba a lɛa wa dɛ!
26Piɛrɛ min mɛn too kuru, bɛ lɛ dɔɔ̃n kɔ́n na á goã wúlu-bɔlen kiã a dí-nyalin lɛn goon lɛa, bɛ́ tɔ́n pɛ Piɛrɛ nɛ mà asɛ yɛ dù gɔrɔ lɛ-n kun ni wa ya?
27Piɛrɛ wusoo á n piã doo. A din biikoo lɛ li gɔrɔ, koo sa goon wuu pɛ.
Pilati n nɔ̀n diɛ Yezu la
(Mat 27.1-2,11-14; Mar 15.1-5; Luk 23.1-5)
28Bɛ kio, ǹ nə́ soo ka Yezu ni Kayifu a piɛ, ǹ nə́ woo-n gánadɛnaa a piɛ baayɛlɛ yiisoon ne. Ǹ bɛ́ ǹ nə́ woo ne, gánadɛnaa lɛ a tɔrɔ kɔsɔ minbaa lɛ taman yii, ǹ wɔ a sumu lɛ-n wa, màn mɛn bɛ́ toɛ, ǹ baran *gɔ̀ lɔlɔ ǹ dinin ganaa wa, ǹ boo la ǹ *kiɛ̃mala ǹ zɔ́n màn bii; bɛ lɛ nɛ ǹ nə́ zɛnaa miɛ̃. 29Gánadɛnaa Pilati tɔ́n soo á daa ǹ yaa kanaa, á pɛ ǹ nɛ: «Ka ǹ giĩ kɛ lɛ zɛ̀rɛ biɛ wàa mɛn sii taman yii?»
30Ǹ ná a lɛ si, ǹ nə́ pɛ mà bɛ̀ giĩ kɛ lɛ bie sii baraa-zɛnaali lɛa wa, mà bɛ̀ ǹsɛn tá re kuĩ ǹ da kɔ la?
31Pilati tɔ́n pɛ ǹ nɛ mà ǹ dininmaan nə kũ ǹ kiri kuru la a kɔnpɛ ka ǹ dinin landa nɛ.
Zuifun lɛn mà Pilati ganaa mà ǹsɛn bɛ́ pàã mɛn giulun, mà a kɔnpɛ ka bɛ nɛ, mà ǹsɛn doamaa bie ǹ gɛ̀ dɛ wa.
32 #
Zaã 3.14; 12.32 A na á n zɛnaa miɛ̃, màn mɛn bɛ́ toɛ, Yezu boo mɛn da a din a gɛ̀ wɔ ǹ gɔn la bɛ lɛ lɛ pã.
33Pilati wusoo á wɔ kion. Á Yezu bíi, á nɔ̀n da la: «N din ni Zuifun kii lɛa?»
34Yezu ná a lɛ si á pɛ nɛ mà a n bɛ pii a din mìi gialaa hinlaa mà minin man nə́ asɛ boo da nɛ?
35Pilati tɔ́n pɛ nɛ: «Masɛ n Zuifu lɛa ya? N din tɔrɔn laanka kaa wúlu-bɔlen goledɛnan man nə́ daa n wɔ masɛ gɔn! Ma nə́ n wàa la?»
36Yezu tɔ́n ná a lɛ si á pɛ-n kɛnɛn: «Masɛ a kiibaa lɛ bie kanaa kɛ wɔ lɛa wa. Bɛ̀ maa kiibaa lɛ n kanaa kɛ wɔ lɛa, bɛ̀ maa minin kɛn nə́ zia baa, màn mɛn bɛ́ toɛ, ma baran n wɔ Zuifun pàãdɛnan gɔn wa. Sɛnɛ, masɛ a kiibaa lɛ, kanaa wɔ bie wa.»
37Pilati tɔ́n pɛ nɛ mà a n kii lɛa le?
Yezu ná a lɛ si: «N din nə pii mà man kii lɛa. Masɛ n má yɛ má daa sonbore nyaa kanaa gɔ́ɔ̃ nɛ. Min woo min tá sonborebaa ǹ zii tɔ we, bɛa dɛnaa nə n too koe masɛ a boo ganaa.»
38Pilati tɔ́n nɔ̀n da la mà sonbore n wàa lɛa?
Ǹ gɛ̀ dɔlɔ mɛn da Yezu mìi ni
(Mat 27.15-31; Mar 15.6-20; Luk 23.13-25)
Pilati nə n lɛ bɔ bɛa boo lɛ-a lɔn, á soo kanaa doo á woo Zuifun lɛn li, á pɛ ǹ nɛ: «Masɛ yii ba zɛ̀rɛbaa ǹ sii kɔ́n ganaa a wɔ a paǹ li wa. 39Sɛnɛ, a kɔnpɛ ka ka dinin landa nɛ, bɛ̀ kiɛ̃mala ǹ zɔ́n dɔ lɔn, masɛ bɛ́ n kòso nɛ goon diɛ, ka tá li ma Zuifun kii lɛ da ya?»
40Ǹ nə́ nɔmaa ǹ nə́ bɔ ǹ nə́ mɛ la ǹ nə́ n lɛ dɛ mà aba, mà a baran kɛ da wa. Mà a Barabaasi da!
A da yaa bɛa Barabaasi lɛ dɔ n mɛnaa minin la wole lɛa.
දැනට තෝරාගෙන ඇත:
Zaã 18: SBPE2011
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
San Bible Protestant Edition © Bible Society of Burkina Faso, 2011.