Kor1 11
11
1 #
Kor1 4.16; Fili 3.17 Ka ma lɛn zɔɔ̃, ka ma dinmaa bɛ́ *Krita lɛn zoɛ̃ lɔn.
Giĩ laanka lɔ bɛ́ màn mɛn lɛa Dɛnaa yɔrɔ-a
2Man ka tɔ bǐɛ̃ pii, a giala, mà ka á n yiri koɛ masɛ li sii din tumaa gɔ́ɔ̃ nɛ. Ma ka daraa siin mɛnɛn dɔn ganaa, ka ǹ koe bɛn tumaa lɛ. 3Sɛnɛ, ma tá li máa ka kɛ dɔ dɔ̃: Giĩ tumaa a mìilandɛnaa n ka Krita nɛ, lɔ a mìilandɛnaa n ka giĩ ni, Krita a mìilandɛnaa n ka Lawa nɛ. 4Bɛ ganaa, giĩ mɛn tumaa bɛ́ Lawa nyankoe, hinlaa Lawa a boo gii diɛ ka màn nə́ kuməə ne a mìi ganaa, bɛ ǹ Krita puusə koe. 5Sɛnɛ, lɔ mɛn tumaa dɔ bɛ́ Lawa nyankoe, hinlaa Lawa a boo gii diɛ ka a mìi kooro ne, bɛ ǹ giĩn puusə koe. A giala, a n goon ká a na á n mìi kɔɔ̃. 6Bɛ̀ lɔ mɛn ba tapara kumii a mìi ganaa wa, a n mìi ka dɔ kukuru goon lɛa! Sɛnɛ, mìi ka kukurii, hinlaa a kɔɔ̃ bɛ́ sìi diɛ lɔ ganaa, a doamaa nɛ a màn kuməə a mìi ganaa. 7#SGK 1.26-27 Giĩ sɛ ba kɔnboe a màn kuməə a mìi ganaa wa, a giala, a n Lawa a kɔnboe lɛa, á n Lawa a gugurubaa nyɛɛ. Sɛnɛ, lɔ n giĩ a gugurubaa lɛa. 8A giala, ǹ bie ǹ nə giĩ bɔ lɔ-n ma, sɛnɛ, lɔ na á bɔ giĩ ni. 9#SGK 2.18-23 Ǹ bie ǹ nə́ giĩ zɛnaa ǹ nə́ kɔ lɔ la wa, sɛnɛ, maǹ nə́ lɔ zɛnaa ǹ nə́ kɔ giĩ la. 10Bɛ lɛ nɛ, lɔ n kɔnboe a màn kuməə a mìi ganaa, a nyaa mà a n giĩ gòã li, lon a dia dí-a wolen nə dɔ̃ mà a n giĩ wɔ lɛa. 11Sɛnɛ, Dɛnaa yɔrɔ-a, lɔ ba n toɛ̃ kɔn ka giĩ-n doɛ̃ wa, giĩ dɔ ba n toɛ̃ kɔn ka lɔ-n doɛ̃ wa. 12A giala, ta maǹ nə́ lɔ bɔ giĩ ni ǹ nə́ zɛnaa, giĩ dɔ n yii lɔ la, sɛnɛ, ǹ tumaa n boe Lawa li.
13Ka dinin nə ga a ganaa: Á siĩni lɔ goã ka a mìi kooro ne Lawa nyankɔ biikoo li? 14Wɔ a doɛ̃ wɔ dinin li, bɛ̀ giĩ mìi ka sɔsɔrɔ kɔ á la yii ni, a sìi diɛ wa? 15A da yaa, mìi ka a sɔsɔrɔbaa n lɔ tɔ golebaa ǹ sii lɛa. A giala, lɔ bɛ́ kɔnboe a màn mɛn kuməə a mìi ganaa, maǹ nə́ mìi ka sɔsɔrɔ kɔ la bɛ lɛ taman yii gɔrɔ. 16Bɛ̀ min tá zoɛ̃ maa boo kɛa liere kɔ li, ǹ dɛnaa dɔ̃, mà wɔsɛn laanka Lawa a sɔmɔ kɔ́n ba landa kɔsɔ doɛ̃ Lawa guguru kɔ biikoo li wa.
Dɛnaa a màn-bii sonbore kɛ boo
17Ma bɛ́ die kaa siin mɛnɛn ganaa kanna, ma a ka tɔ bǐɛ̃ pii ka bɛn nɛ wa. A giala, ka bɛ́ lɛsɔkɔnɔn mɛnɛn zɛnɛɛ, bɛn ba n doe ka lɛ wa. Maǹ ka laadoo ziziɛ̃. 18Dinin bɔrɔ, ǹ nə́ pɛ ma nɛ, mà bɛ̀ ka á lɛsɔkɔn gole zɛnɛɛ, mà nana-kɔn nə ka bii. Má golee boo lɛ tɛn a taãnbaa li. 19A n siĩn dinin nana-kɔn yɛ ka bii, min mɛnɛn bɛ́ min peperen lɛa, wɔ tɔn boo la wɔ bɛn dɔ̃.
20Bɛ̀ ka á n lɛ soekɔn miɛ̃ kun, Dɛnaa a màn-bii kɛ bie ka á bii wa. 21A giala, didie nə n nanaɛ, a din da ka màn-bii mɛn nɛ, á bɛ bii. A nə n zɛnɛɛ miɛ̃, bòo goã kɛa dɛnaa ganaa, bɛ̀ yɔ á kɛa dɛnaa dɔ yii ganaa. 22Kaa kionən manə ǹ banban, ka á màn bii ǹ ni, ka n màn mii ǹ ni wa? Hinlaa ka ǹ zoɛ̃ mà ka Lawa a sɔmɔ lɛ piɛ̃ bɔ, ka sìi da gɔn kooro-an ganaa? Ka nə n yii diɛ mà ma wàa pɛ ka nɛ? Á kɔnboe ma ka tɔ bǐɛ̃ pɛ kɛ a lɛa? Haayii, ma a boe la ma á ka tɔ bǐɛ̃ pii wa.
23A giala, Dɛnaa ma daraa màn mɛn ganaa, má ka dɔn daraa a ganaa, bɛ á ke: Ǹ bɛ́ re Dɛnaa Yezu koe tèlò mɛn nɛ, á buuru saa, 24á barka da Lawa nɛ, á tatala kɔn, á pɛ: «Masɛ din gɔ̀nɔn nə ka kɛ nɛ, ma á koe ka la. Ka dɔn die ka zɛnaa, ka n yiri koa ka masɛ din ni.» 25#BBN 24.6-8; Zer 31.31-34 A din yii goon ne, ǹ bɛ́ ǹ nə́ màn bii ǹ nə́ nya, á paan saa á pɛ: «Paan ke, masɛ din mà na a nɛ, a n lɛ kɔ kɔn la dii lɛa. Bɛ̀ ka á mii lɔn, ka n yiri koa ka masɛ din ni.» 26Sonbore ne, biikoo mɛn tumaa li, bɛ̀ ka á buuru kɛ soɛ̃, ka n màn mii paan kɛ nɛ, ka ǹ Dɛnaa a gɛ̀ laakalɛɛ, yǎa a wusoo a daa li.
27Bɛ lɛ nɛ, min mɛn bɛ́ re Dɛnaa a buuru kɛ soɛ̃, a màn mi paan kɛ nɛ, a gɔ́ɔ̃ ná a *yoreen wa, ǹ dɛnaa n kiri diɛ a din la Dɛnaa gɔ̀nɔn laanka a mà wɔ paǹ li. 28Didie tumaa golee a dinmaa li taãnɛ, a tɔn buuru kɛ sɔ̃ a màn mi paan kɛ nɛ. 29A giala, bɛ̀ min mɛn màn kɛ bii, á màn kɛ mi, a ná a ba n taasɛ, mà asɛ n doa-n kɔn ka Dɛnaa din gɔ̀nɔn nɛ wa, bɛa dɛnaa n kiri koɛ a din ni, ká màn kɛ a bii ni, ká a mii ni. 30Bɛ lɛ nɛ, busulən tá ka bii, ka bɔlɔkan nɛ, ǹ tɛnɛn dinin nə́ gã. 31Bɛ̀ wɔ́ n gɔ́ɔ̃ ti wɔ ga a ganaa, ǹ ba re kiri we wɔ ganaa wa. 32Sɛnɛ, Dɛnaa n kiri we wɔ ganaa, á n wɔ doree, ń giɛ dɔlɔ nyan wɔ kũ kun ka kanaa kɛ a minin ni wa.
33Bɛa yɔrɔ kɛ lɛ la kəni, ma dɔɔ̃nɔn lɛn, bɛ̀ ka á n lɛ soekɔn, ka á màn kɛ bii, ka toa ka n yii da kɔn la. 34Bɛ̀ bòo tá min mɛn ganaa, a màn bii piɛ, ń giɛ kaa lɛsɔkɔn lɛ nyan nə n baa kaa dɔlɔ damala ǹ sii lɛa Lawa gunun wa.
Sii gialakunun kɛn, bɛ̀ ma din daa biikoo mɛn li, ma á re bɛn yɔrɔ boe.
දැනට තෝරාගෙන ඇත:
Kor1 11: SBPE2011
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
San Bible Protestant Edition © Bible Society of Burkina Faso, 2011.