ගීතාවලිය 34
34
දෙවියන් වහන්සේගේ යහපත් බවට ප්‍රශංසාව
අබිමෙලෙක් වෙතින් නෙරපනු ලැබූ පසු දාවිත් ගැයූ ගීතයකි.
1 #
1 සාමු 21:13-15
හැම වේලේ ම හිමිතුමාණන්ට මම ප්‍රශස්ති ගී ගයමි.
එතුමාණන්ගේ ගුණ වැණුම් මා මුවින් තොර නොවෙයි.
2මම එතුමාණන්ගේ ගුණ වර්ණනා කරමි.
නිහතමානී අය ඒ අසා තොස් වෙත්වා;
3මා සමඟ හිමිතුමාණන් වර්ණනා කරන්න;
අපි එක් වී එතුමාණන්ගේ නාමය පසසමු.
4මම හිමිතුමාණන් සොයා ගියෙමි;
එතුමාණෝ මට පිළිතුරු දී හැම බියෙන් මා මිදූ සේක.
5එතුමාණෝ දෙස බලන්නා ප්‍රීතියෙන් බැබළෙන්නේ ය.
ඔහුගේ මුහුණ කවදාවත් ලජ්ජාවෙන් අඳුරු නොවන්නේ ය.
6හිමිතුමාණන්ට කන්නලව් කළ එක් අසරණයෙක් විය;
එතුමාණෝ ඔහුගේ බස් අසා,
සියලු දුක් ගැහැටවලින් ඔහු මිදූ සේක.
7හිමිතුමාණන්ගේ දූතයා දේව බය ඇති අය වට කර,
කඳවුරු බැඳ, ඔවුන් මුදා හරියි.
8 #
1 පේදු 2:3
හිමිතුමාණන් ගුණවත් බව ඔබ ම අත්දැකීමෙන් දැනගන්න;
එතුමාණන්ගේ රැකවරණය ලබන තැනැත්තේ ආසිරි ලබයි.
9එතුමාණන්ගේ සැදැහැවතුනි, එතුමාණන්ට ගරුබිය දක්වන්න;
මන්ද, දේව ගරුබිය ඇති අයට අගහිඟයක් නැත.
10ධනපතීහු#34:10 මුල් පිටපත්වල සිංහ නාම්බන් යනුවෙන් සඳහන්ව ඇත. පවා කෑම නැති ව සාගින්නෙන් පෙළෙති;
එහෙත්, හිමිතුමාණන් සරණ යන අයට යහපත් දෙයින් කිසි අඩුවක් නැත.
11දරුවෙනි, මට සවන් දෙන්න.
සමිඳුන්ට ගරු කිරීමට මම ඔබට උගන්වන්නෙමි.
12 #
1 පේදු 3:10-12
සැප ජීවිතය භුක්ති විඳීමට යම් කෙනෙක් කැමැති ද?
දිගායු වළඳා සුව සම්පත් රස විඳීමට කැමැති ද?
13එසේ නම්, ඔහු නපුරු කතාවෙන් ද මුසාවාදයෙන් ද වැළකී සිටිය යුතු ය.
14නපුර හැර දමා යහපත කරන්න;
සාමය සොයා ඒ අනුව යන්න.
15හිමිතුමාණන්ගේ දෙනෙත දමිටුන් දෙසට ද එතුමාණන්ගේ දෙසවන ඔවුන්ගේ කන්නලව්වට ද යොමා ඇත.
16පව්කම් කරන අය පොළොවෙන් අමතක වී යන ලෙස හිමිතුමාණෝ ඔවුන්ට විරෝධය දක්වන සේක.
17දැහැමි අය අයැදුම් කළහ;
හිමිතුමාණෝ සවන් දී සියලු දුක් වේදනාවලින් ඔවුන් මිදූ සේක.
18හිමිතුමාණෝ බිඳුණු සිත් ඇත්තන්ට ළං ව සිටින සේක;
තැළුණු හදවත් ඇත්තන්ට පිහිට වන සේක.
19දමිටුන්ට බොහෝ ආපදා ඇතත්, හිමිතුමාණෝ ඒ සියල්ලෙන් ඔවුන් මුදා හරින සේක.
20 #
ජොහ 19:36
එතුමාණෝ ඔවුන්ගේ ඇඟේ එක ඇටයකුදු නෑර ඔවුන් රක්නා සේක;
ඉන් එකක් වත් බිඳෙන්න නොහරින සේක;
21දුෂ්ටයා නපුරෙන් වැනසෙයි.
දැහැමි අයට දෙස් තබන්නෝ දඬුවම් ලබන්නෝ ය.
22හිමිතුමාණෝ සිය මෙහෙකරුවන් මුදන සේක.
එතුමාණන්ගේ රැකවරණය සොයන කිසිවෙක් දඬුවම් නොලබන්නෝ ය.
දැනට තෝරාගෙන ඇත:
ගීතාවලිය 34: SNRV
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්‍රවේශ වීමට අවශ්‍යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න