TOBITƐ 3
3
Tobitɛ sambala Gale
1'Bako ba zi mi wena, nɛ mi hia, nɛ mi ma ngɔ sambala Gale do 'bako na: 2“Aa NWA, mɔ a wi bɔlɔ zu, mɔ be dia zã 'da mɔ dɛ 'da lɛ, nɛ mɔ dɛ olo nu mɔ hã lɛ dɛa fai. Mɔ a wi gɔnɔ ngbangga 'da owinɔ ngɔ nù gɛ vɛ̃. 3Kɔ mɔ lénggé do mi, nɛ mɔ síkí li mɔ hã mi. Mɔ tɛ ha etumbu hã mi we duzu 'dã mɛnɔ kɛ mi do oyaa mi, lɛ dɛa ni gɔ, tabi we duzu 'dã mɛnɔ lɛ dɛ do mbana gɔɛ ni gɔ. 4Mba gɔ, lɛ bɛ̃a mbula 'da mɔ, nɛ mɔ dɛa na, ogele winɔ wa 'danga mɛnɔ 'da lɛ, nɛ wa kala lɛ do ngbá, tabi wa gbɛ lɛ. Lɛ hɔa Owi gbɔlɔ mɔmu gbali wa, nɛ lɛ fia dɛla ti kɔ̃ onu kɔnggɔ winɔ kɛ mɔ pɛsɛ lɛ dɛ sanga wa ni. 5Mɔ 'bili ngbangganɔ vɛ̃ do bɔlɔ nɛ. Nɛ mɔ hã etumbu hã mi, we duzu 'dã mɛ 'da mi, do kɛnɔ 'da oyaa mi do gbãlã we. Mba gɔ, lɛ dɛ̃ zi mbulanɔ 'da mɔ gɔ, nɛ lɛ bà bɔlɔ wala gbali mɔ gɔ. 6Kɔ mɔ dɛ do mi ɔ nɛ kɛ zã mɔ kɔ̃a ni. Mɔ kɔ̃, nɛ mi fe, nɛ mi fo tɛ mi ngɔ nù gɛ do'do, nɛ kili tɛ mi ma kifi nù dɛ olo nɛ. Fio dia tɛ mi nɛa ngɔ dungu nza, we kɛ mi tɛ fe dɛlanɔ kɛ wa dã do mi gɛ, nɛ mi do 'bako wena. Aa NWA, mɔ fó mi kɔ gã 'bakoe gɛ do'do, nɛ mɔ é mi tɛ fala ɔmɔ tɛ mi kɛ ndɔti nɛ bina ni. Aa NWA, mɔ tɛ sìkì 'do mɔ hã mi gɔ! Mi kɔ̃a fio nɛa ngɔ kɛ na mi dungu do 'bako, nɛ mi zele dɛlanɔ wa dã do mi gɛ ni.”
Wuko wi dɛa toe 'da Sara dã a
7Do kpo kɔ̃ tũi ni, tɛ kɔ le Ekbatanɛ, ngɔ nù Medi, nɛ Sara, be 'da Raguɛlɛ, a fia tɛ mɛ 'bɔ dɛla ti kɔ̃ mbe kpo wuko wi dɛa toe 'da baa a. 8Mba gɔ, Sara kɔ̃a zi wili fala sambo ia, nɛ nde fala kpo kpo dati kɛ na, wi wili mba ngɔ te do a ni, nɛ Asmode, gba sɔ̃ 'dã hi wi ni gbɛ wi wili do'do. Nɛ wuko wi dɛa toe ni tɔ̃a hã Sara na: “Mɔ a mɔ gbɛ owili mɔ. Mɔ kala di ni wili fala sambo ia, nɛ nde mɔ kò mbe bulu be hã wele kpo sanga wa ni gɔ. 9Kɔ gulu kɛ mɔ zɛlɛ tɛ lɛ do mãlã fie 'da wa we ge nde? Mɔ lá 'dɔkɔlɔ wa, nɛ da dɛ kɔ mɔ kó be zã mɔ gɔ!”
10Sara nɛa we zele ni, nɛ a dɛ 'bako wena, nɛ a kũ dɛ kɔ 'bili tɔa kɛ ma zu tɔa 'da baa a i ni do mili kɔ̃a. Nɛ a kɔ̃a we kpo fɛlɛ gɛlɛ a, takɔ a gbɛ tɛ̃ a do kpo kɔ̃ tũi ni. Nɛ nde a lingga mɔ, nɛ a tɔ̃ do kɔ sila a na: “Mi dɛ́ sɛ ma gɔ. We kɛ mi gbɛ tɛ mi, nɛ wa kɔ'dɔ sɛ baa mi na: ‘Mɔ zi do boko be kɛ mɔ kɔ̃ zi a wena, kɔ mɔ zɔ́, a gbɛa tɛ̃ a we ngamɛnɔ 'da a!’ Nɛ 'bako fie 'da mi ma gbɛ sɛ a iko. Kɔ olo li gbɛ tɛ mi, ma dia fɛ̃ na, mi ala nu mi hã NWA, hã a la mi hã mi fe, nɛ mi zélé sɛ 'bɔ dɛlanɔ gɛ gɔ.”
Sara sambala Gale
11Nɛ Sara siki li a dɛ tɛ li holo tɔa, nɛ a kala kɔ̃ a dɛ ngɔ, nɛ a sambala na: “Aa Gale, mi dɔnggɔ mɔ kɔ sabɛlɛ do sabɛlɛ! E kɔ mɛnɔ vɛ̃ kɛ mɔ dɛa ni, ma dɔnggɔ mɔ fai ndɔti nɛ bina! 12Aa NWA, mi siki li mi dɛ 'da mɔ na, mɔ gálá mi. 13Mɔ dɛ́ na, mi lá nùi gɛ do'do, da dɛ kɔ mi fé 'bɔ dɛlanɔ gɛ gɔ. 14Aa NWA, mɔ ĩ na, mi 'bana be zɔnga, nɛ mi ĩ̀ ti wili gɔ. 15Mi 'dàngà dɔ̃lɔ̃ li 'da mi tabi kɛ 'da baa mi, tɛ ngɔ nùi wa 'dɔlɔ do lɛ gɛ gɔ. Mi a kpo boko be iko, nɛ baa mi do gele be we dungu ngɔ mɛnɔ olo a bina. A 'bɔ do nya a, tabi wi na mɔ a, kɛ a wia we ba mi do wuko, kɔ mi 'bana nza we duzu a ni bina. Owi wili wa fia zu mi fala sambo ia, kɔ gulu kɛ mi nɛ dungu 'bɔ nza fai ni we ge nde? NWA, fala kɛ mɔ kɔ̃̀ na, mi fe gɔ, nɛ mɔ lengge do mi, nɛ mɔ dɛ na, mi tɛ fè 'bɔ dɛlanɔ wa dã do mi gɛ gɔ.”
NWA tumba anzɛ Rafaɛlɛ we gala Tobitɛ do Sara
16Sambala 'da Tobitɛ do Sara ma gbua zala Gale, nɛ a kɔ̃a gɛnɛ nɛ do ti. 17Nɛ a tumba anzɛ Rafaɛlɛ na, a nɛ we kpasa wa bɔa nɛ. A tumba a hã Tobitɛ na, a fó fɛ̃a mɛ ngɔ li a ni do'do, kɔ a zɔ 'bɔ mɔ. Nɛ a tombo 'bɔ a hã Sara, be 'da Raguɛlɛ na, a fó Asmode, gba sɔ̃ 'dã hi wi ni kɔ a do'do, nɛ a ba a do wuko hã Tobi, be 'da Tobitɛ. Mba gɔ, Tobi zi kuti wi kɛ a wia we ba Sara, sanga ogele wanɔ kɔ nu fɛlɛ kula 'da wa ni vɛ̃.
Do kpo 'da fala kɛ Tobitɛ yula tɛ li fanda, kɔ a tɛ le dɛ kɔ tɔa 'da a i ni, nɛ Sara yolo tɛ mɛ 'bɔ kɔ 'bili tɔa kɛ ngɔ i, nɛ a ma ngɔ zĩlĩ dɛ nù nga.
Currently Selected:
TOBITƐ 3: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.