Malakiya 1
1
Lirando la Txizimu ka Israyeli
1Dipswi da Mkoma do lamula Israyeli, di nga wombwa ngu Malakiya.
2Ani ni mi randile, kuwomba Mkoma:
Aniko anu mi khanu:
U komba ngu txani ti to u hi randile kani?
Ina Esawu hi nga mwanawe wa Jakobe kani?
Kuwomba Mkoma; hambi keto ni randile Jakobe, 3#Wona ni ka: Var. 9:13. ni nyenya Esawu; mimango yakwe ni yi mahile marumbi, aniko ni ningete thomba yakwe ka maxolwa#1:3 Mwendro: Timbwa ta txiwulani. a txiwulani.
4Hambi ku ngako Edhomi a txo womba a txi khene: Hi mahilwe sisiwana, ngu mhaka yeto, hi na tshumela hi aka marumbini, a womba tiya Mkoma wa Mabutho a Tiyimbi: Vona va na aka, aniko ani ni na hoxota, se va na va dhana ku Ditiko da Wubihi, ni Vathu vale Mkoma a nga va henyela ngu ha ku si gwitiko.
5 # Wona ni ka: Isa. 34:1-17; 63:1-6; Jer. 49:7-22; Eze. 25:12-14; 35:1-15; Amo. 1:11-12; Obha. 14. Maso anu ma na ti wona, se mi na khanu:
Mkoma a na kuliswe, kukhukhela mihinganoni ka Israyeli.
Txizimu txa sola vaphaxeli
6Mwanana wa mfana a na thava tate wakwe, ni txithumi txi na thava nyamne wa txona; se, ngako ani ni di tate, txi hayi txithavo kwangu kani? Ngako ani ni di Mkoma, ku hani kuthavwa kwangu kani?
Kuwomba Mkoma wa Mabutho a Tiyimbi kwanu, anu vaphaxeli, mi txhipisako ditina dangu, mi txi khanu: Hi di txhipisisa kutxani ditina dako kani? 7Mi ningela sakudya sa nzabwa ka txiluvelo txangu, se mi txi khanu: Hi ku nyenyezisile ngu txani kani? Ka ti mi wombako mi txi khanu: Meza ya Mkoma ya eyiseka. 8#Wona ni ka: Dhewut. 14:21. Nguko mi txi tisa txihari txi i ku dibhofu, kasi ku ta phaxa ngu txona, kha ta biha! Ni ku ngako mi txi ningela txo limala, mwendo txo lwala, kha ta biha! Se u txi txi ningela ka mthangeli wako, a na kutsakela kani? Ni ku mwendo a na kuamukela kani? Kuwomba Mkoma wa Mabutho a Tiyimbi.
9Konkuwa koko, kombelani ka Txizimu, se txona txi na hi pfela wusiwana; atiya ti tile ngu manzani kwanu, ene a na mi tumela kani? Kuwomba Mkoma wa Mabutho a Tiyimbi.
10I mani akuho kambe hagari kwanu, waku a nga seka matimba, kasi ku mi si dhiveli walo mndilo txiluveloni kwangu kani? Ani kha ni tsakiswi ngu nganu, kuwomba Mkoma wa Mabutho a Tiyimbi, kambe kha ni na mbi amukela mphaxo wa manzani kwanu. 11Se kukhukhela wutxani, kala mswa-ditambo, ditina dangu di na va da hombe hagari ka matiko, aniko ka otshe makhalo, ku na ningelwa dibaselo ni mphaxo wo sawuleka ditinani kwangu; nguko ditina dangu di na va da hombe hagari ka matiko, kuwomba Mkoma wa Mabutho a Tiyimbi. 12Aniko anu ma di nyenyezisa, ngako mi txi khanu: Meza ya Mkoma yi nyenyezile, ni siya sa yona, sakudya sa kona, sa eyiseka. 13Se mi khanu: Wonani kunemela ka tona! Se mi ti ningete kutxhipiswani, kuwomba Mkoma wa Mabutho a Tiyimbi; anu mi ningela so piwa, so limala, ni so lwala; se mi mahisa eto miningelo; si amukelwa soneso sa kuta ngu manzani kwanu kani? Kuwomba Mkoma. 14Sekoko a na rukwe mkanganyisi wule waku, a di ni txihari ka mtxhambi wakwe, wa thembisa, kambe e ningela ka Mkoma tximaha txo soleka; nguko ani ngani Mfumeli wa hombe, kuwomba Mkoma wa Mabutho a Tiyimbi, ditina dangu di na maha do thisa hagari ka matiko.
දැනට තෝරාගෙන ඇත:
Malakiya 1: BEC2016
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
A Bíblia em Txitxopi © Bible Society in Mozambique, 2016.