Mphattuwelo 2
2
1Commo, cahomala upankiya irimu ni itthaya ni citthu cothene ciriwo. 2Nluku namalihilene uvara miteko cothene caarinawe, nihuku nonasaapa ahomumula. 3Nluku ahoreriha nihuku nonasaapa ni ahottakattifiha, kontha nenno nihuku nno ahomumulela miteko cothene cavanryawe waapattusawe ilapo.
Maphattuwelo o'rimu ni itthaya
4Nnya phi cookhumelela cinttonka ciinryaya woopattusiya irimu ni itthaya, ukati Apwiya Nluku waapattusilyaya itthaya ni irimu. 5Naari nihinamela niphumpulu, ni hata mwiri mmoca mwiilaponi, kontha Apwiya Nluku yaari ahinawaana ipula ilapo yothene yo vathi, ni ciicammo khaariwo ntthu oolima itthaya iyo. 6Maasi yaanacekuwa vathi phimiceraka ilapo yothene.
7Vano Apwiya Nluku yahomuumpa ntthu ni ntthupi no'tthaya ni yahommucelela mphulani iphumu cookumi, ni ntthu ule ahokhala nkumi.#2.7 1 Akorintu 15.45
8Vaavale, Apwiya Nluku yahopanka iluwani yo wEeteni yaari mphantte unkela ncuwa, ni yahomweesa ntthu yaamuumpilyaya. 9Wahoolo, Apwiya Nluku yahomeliha watthayani miri co khula nnanna, coorera wa miithoni ni coociva ulya. Ni wariyari iluwani wahaawo mwiri wookumi ni mwiri nkina uncuweliha yoorera ni yoonanara.
10Wahophattuwa wEeteni mooloko waamicera iluwani. Ni uhoolo nwo waheekawanihaca n'ukhala myooloko micese. 11Mooloko woopacera uyo uneehaninya Pisomi. Uvinre ilapo yothene yo'Havila, uri iwooru. 12Iwooru yo yeeyo ilapo iyo iri yoorera. Ciicammo, wonwo haawo lumpani ni maluku o'fayita. 13Wonayeeli uvinre ilapo yothene yo'Kuusi uneehaninya Kihoni. 14Woneeraru uvinre mphantte unkhuma ncuwa weemelaka ilapo yo wAssiriya, uneehaninya Tikire, ni woneecese uneehaninya Ufarati.
15Apwiya Nluku yahomweesa ntthu iluwani yo wEeteni wiira awehawehe ni alime. 16Vano Apwiya Nluku yahonlamulela ntthu yiiraka: Ulyeke wotthuna waa mihokorokho cothene ciri nluwani mmo, 17nanso uhilye nhokorokho wo mwiri uncuweliha yoorera ni yoonanara, kontha nihuku ninhalaa ulya, khweli unaakhwa.
18Wahoolo, Apwiya Nluku yahoolumaca yiiraka, khawanrera nlopwana ukhala veekha. Kinaampankela oonkavihera wiira amwiiwanane. 19Vano noompilene itthaya ni inama cothene co ntakhwani, ni asaanuni othene ooculu, Apwiya Nluku yahomwiihera nlopwan'ole, wiira amoone caahalawe wiihana, ni wo khula ncina nivahilyawe nlopwana, khula itthu yoomumula, nenno phiri ncina naya. 20Phimaana nlopwan'ole hovaha macina mihuwo cothene, asaanuni ooculu ni inama cothene contakhwani. Nanso Atamu khaaphwannye oonkavihera wiira amwiiwanane.
21Vano Apwiya Nluku yahonvaha ikhove cinci nlopwan'ole, ni ukati waarupawe yahonkumiha niparari nimoca n'uttiya nenno nipuro nno ni ithayi. 22Niparari naakumihiyawe nlopwan'ole, Apwiya Nluku yahompanka nthiyana n'unrweehela nlopwana. 23Vano nlopwana aheera:
Khweli nna nikhuva no makhuva aka
ni ithayi yo'thayi aka!
Ula nohala wiihaninya nthiyana,
kontha khumile mwa nlopwana.
24Phimaana nlopwana naahala waahiya athumwane na anumwane nokoluttana na amwaarawe, ni oyeeli ankhala irutthu imoca.#2.24 Mateu 19.5; Marku 10.7; 1 Akorintu 6.16; Annefesu 5.31
25Nlopwana na amwaarawe yaakhalaca woohiwara nanso khayoonelana ihaaya.
Currently Selected:
Mphattuwelo 2: NNI
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.