Anihiburu 3
3
Ijeesu o huna Imosiisi nị
1Ẹwụ nịnị anda ayị, Ohomorihi ọ sị wụ nịnị nyị tụ́ irenyi yị ẹngụ anị. Ọ rẹ hị́ wụ nịnị ka wa nyị tụ́ ịdị anị ẹbẹẹba. Agụvị avọọ ro ịrẹyị Ijeesu nịnị ana vị odeyi ọnịrị ohirẹsụ ọbanyị irehi Ohomorihi ayị. Ọnị ị dọ wụ́ nị. 2#Ịrị 12.7Ộ nyị ịzẹyịza hi Ohomorihi ana nyị ọ ka ọ̀ va mẹ̀ ụkọrọ yị ọnị, anka Imosiisi ọnị mẹ̀ rẹ nyị ịzẹyịza ịnị ụkọrọ ọnị ọ mẹ ịnị akakana avaba aza Ohomorihi. 3Ọza ana da irehi ọ nyị ụbanyị huni irehi ọnị ọ dà nị. Avọọ Íjeesu mẹ̀ nyị ụbanyị huni Imosiisi ẹtẹẹtẹrẹ nị. 4Yáa yẹ ka avaba irehi saka-saka ọza ọ dàa nị. Ama Ohomorihi ọ mẹ avaba ịsa nị. 5Imosiisi ộ nyị ịzẹyịza ịnị ụkọrọ ọnị ọ mẹ ịnị akakana avaba aza Ohomorihi. Ama ozi ahụ kẹnẹ ọ vị nị. Ộ sị zụ̀ ịsị Ohomorihi vaa kà ị́rẹma ụhwọọ. 6Ama Ikirisiti ọnị vị ozi. Ộ nyị ịzẹyịza tụ́ ini eehi Ada anị. Ẹya vị aza anị ọnọọ nị, yaa nyị ọtụtụrụma, dị ị sị ịrajẹ sị eyi tụ́ ịnị ịsa ọnị yee zi eyi pooro nee tù ẹtẹ nị.
Asị ọza na mẹ akamawụ
7 #
Ahẹ 95.7-11
Ụhwẹ Ọnịnị ọ́ọ kà a ka: Ajịnị, wàa wụ́ ọngwẹ Ohomorihi nịnị, 8asị ụ na mẹ ayọkatẹngụ nịnị anka óhiku awụ nịnị mẹ̀ mẹ ịnị ụmẹ ẹnẹ ẹ sị mẹ akamawụ hi Ohomorihi ịnị ụnọmị. Ẹnịnị ẹ rẹ zama a re. 9Ohomorihi ọ̀ kà a ka: Ohiku awụ nịnị ệ zama ọnị re ẹtẹẹtẹrẹ ịnị ụnọmị ịyẹẹyẹ, ẹnịnị ê re ịsị ọnị mẹ mẹ ịrayị ẹbẹẹva. 10Agụvị avọọ ayị aza ẹnẹẹ ệ kụ́ ọnị, dị ọnị kà a ka ẹnịnị vị anaā sịị ayị ẹnịnịị nyeeyi pooro, ệ mā zẹẹ ka ẹnị ẹ̀ saasa ọda anị. 11Dị ayị kụ́ ọnị, dị ọnị hị́ eku ka ẹ yị vaa ngụ ịdị anịị tụ́ ụhwọ́ paa nị. 12Agụvị avọọ, anda ayị nịnị, sị eyi pe ẹngụ awụ nịnị oo. Asị a na nyị ọza ịnya ịnị awụ nịnị ana na nyị ayị odivi ẹnẹ ẹ̀ yị ma dọ wụ́, dị ọ sị há hụrị oze Ohomorihi ana yára. 13Agụvị asị a nyị ọza ene vene ịvị na mẹ ka ayị anị ọ̀ katẹngụ, wee hú ẹngụ ụvọ nịnị eyinị-eyinị m màa yịị kà a ajịnị aanị. 14Oyitureyi ọnị ị nyị ịpaapa, yàa yị sị ụvọ zaa pooro ne tù ẹtẹ, ị vaa nyịị tụ́ ịnị ịsa Ikirisiti. 15#Ahẹ 95.7,8Â maanị kà a tụ́ ini Iwe Ohomorihi ka: Ajịnị, wàa wụ́ ọngwẹ Ohomorihi nịnị, asị ụ na mẹ ayọkatẹngụ nịnị, anka ohiku awụ nịnị mẹ̀ mẹ ịnị ụmẹ ẹnẹ ẹ sị mẹ akamawụ hi Ohomorihi. 16#Ịrị 14.1-35Ẹnẹ vavọọ wụ́ ọngwẹ Ohomorihi dị ẹ mẹ akamawụ? Aanị ka ẹ yị vị aza oni Imosiisi kụ́ jịnẹ hụrị Ijipiti? 17Ẹnẹ vavọọ mẹ ayị kụ́ Ohomorihi pooro mẹ ịrayị ẹbẹẹva? Ẹnịnị ẹ vị avaba aza ana mẹ ịvị, di e sú hi ịnị ụnọmị nị. 18Ene Ohomorihi rẹ hị́ eku ka ẹ yị vaa ngụ ịdị anị vaa tụ́? Aza ẹnẹ ẹ̀ yị rẹ sị ayị tụraa yọ nị. 19Agụvị avọọ, yée re ka ẹnịnị ẹ yị zụ ngụ, agụvị ka ẹnịnị ẹ yị sị ayị tụra Ohomorihi.
දැනට තෝරාගෙන ඇත:
Anihiburu 3: EBTP
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Ebira First Bible © Bible Society of Nigeria, 2014.