ЭхкъечӀун 6
6
1Реббиди жаваб гана:
«Ваз аквада хьи, За фиръавандиз вуч ийидатӀа!
Зи гъилин заланвилик ада ивияр ахъай хъийида!
Зи гъилин заланвилик ада абур уьлкведай чукурда!»
2Аллагьди Мусадиз лагьана: «Зун Ребби я! 3Зун Ибрагьиман, Исакьан ва Якьубан вилик вири алакьдай Аллагь яз атанай, амма „Ребби“ лагьай Зи тӀвар За абуруз малумарначир. 4За абурухъ галаз икьрар кутӀуннай ва абуруз чеб масанай атана ацукьнавай Къенандин чилер гун хиве кьунай. 5Гила Заз мисривийри истисмар ийизвай Исраилдин рухваяр сузадин ван хьана ва а икьрар рикӀел хкана. 6Исраилдин рухвайриз малумара: „Зун Ребби я! За куьн Мисридин есирвиликай хкудна, лукӀвиликай азад ийида! За куьн хилас ийида: За гъил хкажнава ва Зи жазаяр мусибатдинбур я! 7За квекай Зи халкь ийида ва куь Аллагь жеда. Квез чир хьурай, куьн Мисридин лукӀвиликай хкудайди Зун Ребби я, куь Аллагь. 8За куьн Ибрагьимаз, Исакьаз ва Якьубаз гуда лагьана хиве кьур чилерал гъида, ва абурал квекай иесияр ийида. Зун Ребби я!“»
9Мусади идан гьакъиндай Исраилдин рухваяр хабардар авуна, амма абуруз рикӀин ажузвиляй ва кӀвалахдин заланвиляй адаз гьич ябни гуз кӀан хьанач.
10Реббиди Мусадиз эмир гана: 11«Фиръавандин, Мисридин пачагьдин, кьилив алад. Адаз Исраилдин рухвайриз вичин уьлкведай экъечӀна хъфидай ихтияр гунин патахъай лагь!» 12«Заз Исраилдин рухвайри яб гузвачтӀа, – лагьана Мусади, – фиръаванди гьикӀ яб гун лазим я? Зи рахунар магьирбур туш».
13Реббиди Мусадихъни Гьарунахъ галаз рахунар авуна. Ада абуруз Исраилдин рухвайрин ва фиръавандин, Мисридин пачагьдин, кьилив фин эмир гана, – Исраилдин рухваяр Мисридай ахкъудун патал.
Мусадинни Гьарунан дувулар
14Ингье тухумрин бан-бубаяр.
Исраилан сифте хва Рувенан рухваяр: Гьенух, Палу, Гьецран ва Карми. Абурукай Рувенан тухумар арадал атана.
15Шимунан рухваяр: Ямуил, Ямин, Агьад, Яхин, Цагьар ва къенанви папа хайи хва Шаул. Абурукай Шимунан тухумар арадал атана.
16Ингье галай-галайвал Левидин рухвайрин тӀварар: Гершан, Къегьат ва Мерари. Левиди вичи вишни къанни цӀерид йис уьмуьр тухвана.
17Гершанан рухваяр: Ливни ва Шимигь чпин тухумарни галаз.
18Къегьатан рухваяр: Амрам, Йицгьар, Хевран ва Узиял. Къегьата вичи вишни къанни цӀипуд йис уьмуьр тухвана.
19Мераридин рухваяр: Магьли ва Муши.
Ингье галай-галайвал левийрин тухумар.
20Амрама пабвиле вичин эме Яхебет къачуна. Адани адаз рухваяр хана: Гьарун ва Муса. Амрама вичи вишни къанни цӀерид йис уьмуьр тухвана.
21Йицгьаран рухваяр: Къарагь, Нефег ва Зихри.
22Узиялан рухваяр: Мишаил, Элцафан ва Ситри.
23Гьаруна пабвиле Элишеба, Аминадабан руш, Нагьшунан вах, къачуна. Ада адаз рухваяр хана: Надаб, Абигьу, Элазар ва Итамар.
24Къарагьан рухваяр: Асир, Элкъана ва Абиасаф. Абурукай Къарагьан тухумар арадал атана.
25Элазара, Гьарунан хци, пабвиле ПутӀиялан рушарикай сад къачуна. Адани адаз хва хана – Пингьас.
Левийрин тухумрин бан-бубаяр, абурун тухумар гьа ихьтинбур я.
26Им абуруз, Гьаруназни Мусадиз, Реббиди къайдада аваз акъвазарна Исраилдин рухваяр Мисридай ахкъудун патал эмир гун тир.
27Им абур, Гьарунни Муса, Исраилдин рухваяр Мисридай хутахун патал фиръавандин, Мисридин пачагьдин, вилик экъечӀна рахун тир.
Гьарун Мусадин патахъай рахун
28Ана, Мисрида, Мусадихъ галаз рахадай чӀавуз, 29Реббиди адаз лагьанай: «Зун Ребби я! За ваз вуч лугьузватӀани фиръавандив, Мисридин пачагьдив, агакьара». 30«Зи рахунар магьирбур туш, – жаваб гана Мусади. – Фиръаванди заз яб гудани кьван?»
දැනට තෝරාගෙන ඇත:
ЭхкъечӀун 6: ЛезПК
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© Институт перевода Библии, 2010-2024