LUKE 2
2
Jesu pianna
1Huleh hulaiin hichi ahung hi a, Kaisar Augusta in khovel pumpi min gelh diing thu a pia a. 2(Huleh hichu Syria gam a Cyrenea gam optu ahih lai a mingelhna masapen ahi). 3Huleh mi zousiah chu mingelh diingin amah uh gam chiat ah a chiah va. 4Huleh Joseph zong Galili gam a Nazareth khua a kipanin Judia gam a David khopi Bethlehem a chih vah a chiah tou a; (David innkuante leh a haah a mi ahih jiahin). 5Mari, a ji khaam gaai saanlai toh, min gelh diingin. 6Huleh hichi ahi a, hutaha a um laiun a nauneih ahung hunta a. 7Huleh a tapa masa chu ahung neikheta a, huleh puannem in a tuam a, amahuh diing a zinbuuh a mun a um louh jiahin gankuang ah a sial hi.
Belaampute paahtawina
8Huleh hu gam mah ah belaampute a belaamte uh chinga jan a gam a giah a um va. 9Huleh, ngai in, Lalpa angel khat a kawmvah a hung a, Lalpa loupina in a kiimvel uh a taanvaah a; huleh amah uh chu a lau mahmah uhi. 10Huin angel in a kawmvah, Lau sih unla, ngai un, mi chin a diingin thupha kipaahhuai mahmah nanguh ka hung puaah hi. 11Ajiahchu tuniin nanguh diingin David khua ah. Hundampa a piangta, Khrist Lalpa chu. 12Huleh hikhu nanguh diingin chiamchihna ahi diing, Naungeeh puannema tuam, gankuang a lum chu na mu diing uhi, a chi a. 13Huleh thakhatin hu angel kawmah vaan mipite a hungkhawm va, Pathian a phat va, 14Tungnungpen ah Pathian loupitahin um henla, leitung a a kipaahpih mihingte lahah lemthu leeng heh, chi'n. 15Huleh hichi ahung hi a, angelte’n vaan a, a paisan tahun belaampute’n chu, Tuin Bethlehem khua tanpha in i chiah diing a, Lalpa’n thu ahung hilh hung tung chu i va en diing uh, a kichi va. 16Huleh kintahin a hung va, Mari leh Joseph leh gankuang a lum naungeeh chu a va mu uh. 17Huleh a muh zohun hi naungeeh tungtaang thu amah uh heetsah a um chu a soithangta uhi. 18Huleh a jakha taphot in hu belaampute thusoi chu limdang a sa chiat uhi 19Hizongleh Mari in hi thu zousiah a lungtangah a vom zinga, a ngaihtuah zingta hi. 20Huleh belaampute chu amah uh kihilh bang ngeia sil zousiah a jah va a muh jiahun Pathian paahtawia phat kawmin a kiihkiitta uhi. 21Huleh a zehtanna diing ni giat ahung chinin hu naungeeh chu a min diingin suul a, a um ma daih a angel in a phuaahsa Jesu a sata uhi.
Pathian biahinn a Jesu kilatna
22Huleh Mosi daan dungjui a amahnu kisuhsiang ni ahung tunin, amah chu Jerusalem ah ahung pui va, Lalpa ma a lat diingin. 23(Tapasal suul hong photmah chu Lalpa diingin siangthou a kichi diing ahi chih, Lalpa daanthua a gelh dungjuiun;) 24Huleh Lalpa daanthua kisoi dungjuia vakhu kopkhat aha, vapaal nou nih aha kithoihna a laan diingin.
Simeon paahtawina la
25Huleh ngai in, Jerusalem ah pasal khat a min Simeon kichi a um a; amah chu midihtat leh Pathian ngaihsahtah ahi a, Israelte hamuanna diing chu a ngaah zing a; huleh Hagau Siangthou a tungah a um hi. 26Huleh Lalpa Khrist a muh masiah a si sih diing chih Hagau Siangthou in a hesah a. 27Huleh Hagau heetsah in Pathian biahinn ah ahung luut a; huleh naungeeh Jesu chu a nu leh pa in daan ngeina banga hihsah diing a ahung puiluut tahun, 28Ama’n ana aangpom a, Pathian a paahtawi a, 29Lalpa, tuin na suaah chu na thu bang jel a hamuangtah a chiahsah diing na hi; 30Ajiahchu ka mit in na hutdamna chu a muta hi. 31Mi zousiah maai ma a na bawl chu; 32Jentelte salhvaah diing vaah leh, na mi Israelte loupina diing chu, chi'n. 33Huleh Joseph leh a nuin naungeeh tungtaang a thu kisoite chu thumah a sa mahmah uhi. 34Huleh Simeon in amah uh a vangpiah a, a nu Mari kawmah, Ngai in, hi naupang hi Israelte laha mi tampi puuhna diing leh din kiitna diing a guat ahi; huleh chiamchihna niala um diingin toh. 35(Ahi, nangmah ngei lungtang zong namsaau in a sun pailet diing a), mi tampite lungtanga ngaihtuahte a kilat theihna diingin, a chi hi.
Ana kipaahthusoina
36Huleh Aser nam a mi, Phanuel tanu, Ana kichi numei zawlnei khat a um a; amahnu chu teehsia a hita a, a nungaah tawp zousiah a pasal kawmah kum sagih a um a. 37Huleh amahnu chu meithai kum sawmgiat leh li vel mi ahi a, Pathian biahinn paisan louin suun leh janin an ngawl pum a haamteiin Pathian a bia hi. 38Huleh amahnu chu huchih laitahin a hung a, Pathian kawmah kipaahthu a soi a, Jerusalem khua a tatna diing lamen photmah kawmah Jesu tanchin a soi hi.
Jesu naupan lai
39Huleh Lalpa daan dungjuia sil zousiah a bawl zoh un Galili gam ah amah uh khua ngei Nazareth ah a pai kiitta uhi. 40Huleh naungeeh chu ahung khang lian deuhdeuh a, a lungsim ahung haat deuhdeuh a, pilna in ahung dimta a; huleh Pathian khotuahna chu a tungah a um hi. 41Huleh a nulepa chu kum chinin chiahkaan ankuang lui chiangin Jerusalem ah a chiah veu va. 42Huleh amah chu kum sawmlenih ahung hihin ankuang luina daan ngeina in Jerusalem ah a chiahtou va; 43Huleh a nite a chin zoh a ahung kilehkiit laiun, naupang Jesu chu Jerusalem ah a umdenta a; Huleh Joseph leh a nu in hichu a he sih uh. 44Hizongleh amahun a lawi lahva um hina’nte chi'n ni khat lam a paita uh a, huleh a sanggamte uleh a meelheette u’laha hawl uh. 45Huleh a muh louh tahun amah hawl kawmin Jerusalem ah a kinungleh kiitta uhi. 46Huleh hichi ahung hi a, ni thum nungin Pathian biahinn, ah, houtute laha tou a, a thu uh ngaikhia leh, amah uh thu dongin a va mu va. 47Huleh a thu zata photin a heetdan leh a dawndan limdang a sa mahmah uhi. 48Huleh a nulepa in a muh tahun limdang a sa mahmah va; a nuin a kawmah, Bawi, bang diinga hichibang a hung bawl na hiai? ngai in, na pa leh ke'n lungkhamtahin ka hung hawl uhi, a chi a. 49Huin ama’n a kawmvah, Bang diinga hung hawl na hi viai? ka Pa inn a um a, a nna ka toh diing mawng sa lou na hi viai mah? a chi a. 50Huleh amahun a kawmva a thusoi chu a hesiam sih uhi. 51Huin amah uh a juisuh a, Nazareth khua a tungva, a thuthu un a um a; hizongleh a nuin hi sil kisoi zousiah chu a lungtangah a vom zing hi. 52Huleh Jesu chu pilna ah leh tahsa ah ahung khang lian deuhdeuh a, Pathian leh mihing deihsah in a um deuhdeuhta hi.
දැනට තෝරාගෙන ඇත:
LUKE 2: SIMTBSI
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.