යෙසායා 41වෙතින් ජනප්‍රිය බයිබල් පද

බෙදාගන්න

එබැවින් භය නො වන්න. මන්ද මම ඔබ සමඟ සිටිමි. නො කැලඹෙන්න. මන්ද මම ඔබේ දෙවියන්වහන්සේ ය. මම ඔබ ශක්තිමත් කර, ඔබට උපකාර කරන්නෙමි. මගේ දමිටුකමේ දකුණතින්, මම ඔබ උසුලන්නෙමි.

මන්ද ඔබේ දෙවියන්වහන්සේ වන ස්වාමින්වහන්සේ මම ය. මම ඔබේ දකුණතින් අල්ලාගෙන, “භය නො වන්න. මම ඔබට පිහිට වෙමි” යි ඔබට කියන්නේ මම ය.

ඔන්න, ඔබට එරෙහිව ප්‍රකෝප වන සියල්ලන් ලජ්ජාවටත්, වියවුලටත් පත් වනු ඇත. ඔබට විරුද්ධ ව ක්‍රියාකරන්නන්, නැත්තට නැති වී, විනාශ වී යනු ඇත.

පොළෝ අන්ත වෙතින් මම ඔබ ගත්තෙමි. එහි ඈත සීමා වෙතින් මම ඔබ කැඳවා ගත්තෙමි. “ඔබ මගේ සේවකයා ය; මම ඔබ තෝරා ගතිමි; මම ඔබ ඉවත නො දමමි” යි ඔබට කීවෙමි.

ඔබ, ඔබේ සතුරන් සොයා යන නමුදු, ඔබට ඔවුන් හමු නො වේ. ඔබට එරෙහිව යුද වදින්නන්, නිකමුන් වැන්න.

භය නො වන්න. එම්බා යාකොබ්, ගැඩ පණුව, එම්බා ඉශ්‍රායෙල් මිනිසුනි, ඔබට පිහිට වන තැනැත්තා මම යැයි ස්වාමින්වහන්සේ ප්‍රකාශ කරන සේක. ඔබේ මිදුම්කරුවාණන් ඉශ්‍රායෙල්ගේ ශුද්ධ තැනැන්වහන්සේ ය.

එහෙත් නුඹ, ඉශ්‍රායෙල් මගේ සේවකය, යාකොබ් මා තෝරාගත් තැනැත්ත, මා මිත්‍ර ආබ්‍රහම්ගේ වංශය

මුඩු කඳු මුදුන්හි ගංගා ද මිටියාවත් මධ්‍යයේ දිය උල්පත් ද මම පැන නංවන්නෙමි. කාන්තාරය දිය පොකුණක් ද වියළි දේශය දිය උල්පත් ද කරන්නෙමි.

දුප්පතුන් හා හිඟකම් ඇති අය ජලය සොයා යති. එහෙත් බිඳකුදු එහි නැත. පිපාසයෙන් ඔවුන්ගේ දිව් වියළී යයි. එහෙත් ස්වාමින්වහන්සේ වන මම ඔවුන්ට පිළිතුරු දෙමි. ඉශ්‍රායෙල්ගේ දෙවියන්වහන්සේ වන මා, ඔවුන් අත්හරින්නේ නැත.

පටන් ගැන්මේ සිට පරම්පරාවලට හඬ ගසමින්, මෙය ඉටු කළේ කවරෙක් ද? එය මුදුන් පත් කළේ කවුරු ද? මම ය. ස්වාමින්වහන්සේ ය. පළමු වැන්නා ය. මම අන්තිමයන් සමඟ ද වන්නෙමි. මම උන්වහන්සේ ය.

මම වනාන්තරයේ දේවදාර, අකේෂියා, මරඳ හා ඔලීව ගස් හටගන්වන්නෙමි. කාන්තාර බිමෙහි සයිප්‍රස්, පයින් හා තෂ්ෂූර් ගස් ද එකට ඇති කරන්නෙමි. එසේ කරන්නේ, ස්වාමින්වහන්සේගේ හස්තය, මෙය කළ වගත්, ඉශ්‍රායෙල්හි ශුද්ධ තැනැන්වහන්සේ මෙය නිර්මාණ කළ වගත් ඔවුන් දැක, එය දැනගන්නා පිණිස ය; ඒ ගැන සිත් යොමා, එක් ව, වටහා ගන්නා පිණිස ය.