Mateo 9

Jix Waꞌxi Can Scꞌul Jun Winaj Sicbꞌinaj El Smimanil

(Marcos 2:1-12; Lucas 5:17-26)

1Catuꞌ jix octoj Naj Jesús yul jun barco tuꞌ, catuꞌ jix kꞌaxbꞌon ecꞌ yibꞌan jaꞌ. Jix ecꞌ apnoj bꞌey junxa skꞌaxepal jaꞌ bꞌey sconobꞌ. 2Ey jun winaj sicbꞌinaj el smimanil, Jix iꞌletej naj scꞌatan Naj Jesús, bꞌatxbꞌil oc yu ebꞌ sat sweyubꞌ. Jix yilon oc Jesús tuꞌ xin, tol chi yaoc ebꞌ yin scꞌul, ebꞌ inen oc naj tuꞌ tol oj waꞌxoj can scꞌul naj yu Jesús. Yuxan jix yal Naj tet naj sicbꞌinaj el tuꞌ jaxca tiꞌ:

—Jaach wuẍtaj, akꞌ tzalabꞌoj ja cꞌul. Jix akꞌle mimancꞌulal yin ja penail, ẍi Jesús tet naj tuꞌ. 3Ey jaywan ebꞌ cuywam yin sley Moisés eyecꞌ tituꞌ xin, jix snaꞌ ebꞌ yul scꞌul yin Jesús jaxca tiꞌ: “Jaꞌ jun winaj tiꞌ, bꞌuchwal kꞌane chi yun yin Dios yu tzet jix yal tuꞌ,” ẍi ebꞌ. 4Jal Naj Jesús xin, jix yotajne el tzet chi snaꞌoc ebꞌ yin, yuxan jix yal tet ebꞌ jaxca tiꞌ:

—¿Tzet yuxan pena tzet chi ecꞌ yul je cꞌul tuꞌ win an? 5¿Bꞌeytet junoj yel subꞌo yali che naꞌ? Ta cu chi jaxca tiꞌ: “Tol jix lawi can ja penail,” ma jaꞌ, “aan waanoj, bꞌeyan”. 6Jaꞌ tinaniꞌ xin, oj jin txꞌox je yilaꞌ, tol jaꞌ jain Akꞌbꞌil Wopiso xol ebꞌ ket animail yu Dios chi cꞌal skeꞌ wu wakꞌon can mimancꞌulal yin spenail ebꞌ ánima yul yibꞌankꞌinal tiꞌ, yutol oj waꞌxoj can scꞌul naj, ẍi Jesús tet ebꞌ.

Jix lawi tuꞌ xin, catuꞌ jix yalon tet naj sicbꞌinaj el smimanil tuꞌ jaxca tiꞌ:

—Aan waanoj, iꞌa ja weyubꞌ, paxan bꞌey ja na, ẍi Jesús tet naj. 7Jix a waan naj tuꞌ, catuꞌ jix too naj bꞌey sna. 8Jaꞌ yet jix yilon ebꞌ yaman ecꞌ tituꞌ tzet jix yun xin, jix xiwa ebꞌ. Catuꞌ jix yalon watxꞌ kꞌane ebꞌ tet Dios yutol miman yipalil jix yakꞌ tet ebꞌ ánima.

Yawtebꞌal Naj Mateo Yu Jesús

(Marcos 2:13-17; Lucas 5:27-32)

9Jix el Jesús bꞌey jun lugar tuꞌ. Catuꞌ jix yilontoj yin jun winaj chi yij Mateo. Jaꞌ jun winaj tuꞌ, chotan ey stejon el toolabꞌal tet ebꞌ ánima, catuꞌ jix yalon Jesús tet naj jaxca tiꞌ:

—Ocan cꞌal tzajan cuywoj wintaj an, ẍi Jesús tet naj. Catuꞌ jix too xacꞌal naj yetoj Jesús yet jun txolan tuꞌ. 10Jaꞌ yet jix ey chotan Naj Jesús low yetoj ebꞌ scuywom bꞌey sna naj Mateo tuꞌ, catuꞌ ecꞌal ebꞌ tejom el toolabꞌal* cꞌal ebꞌ pena sbꞌeybꞌal jix julecꞌ low yetoj Jesús yin meẍa. 11Jix cꞌal yil ebꞌ Fariseo* jaxca tuꞌ, catuꞌ jix skꞌanlen ebꞌ tet ebꞌ scuywom Jesús tuꞌ jaxca tiꞌ:

—¿Tzet yuxan chi low je cuywam tiꞌ yetoj ebꞌ tejom el toolabꞌal cꞌal yetoj ebꞌ pena sbꞌeybꞌal? ẍi ebꞌ Fariseo tuꞌ tet ebꞌ. 12Jix cꞌal yabꞌ Jesús jaxca tuꞌ xin, catuꞌ jix takꞌwitoj tet ebꞌ, jix yalon jaxca tiꞌ:

—Cꞌam yopiso junoj anwam yu ebꞌ watxꞌ scꞌul, asan ebꞌ yaꞌey, jaꞌ ebꞌ tuꞌ ey yopiso yu. 13Asiꞌwej, otajnewej el tzet chi yal yeloc apnoj jun kꞌane yul An Juun Tzꞌibꞌebꞌilcanoj* bꞌey chi yal jaxca tiꞌ: “Chi woche tol chi okꞌ je cꞌul yin je yet animail. Man asanne oj xaambꞌal chi woche,” ẍi yul An Juun tuꞌ.#Oseas 6:6. Man yu oj wawten ebꞌ watxꞌ sbꞌeybꞌal snaꞌoni, yuxan jix jin jul an, jix jin jul yu wawten ebꞌ chi yotajnen el sbꞌa tol penawom ebꞌ, /yet watxꞌ chi snaꞌ sbꞌa scꞌul ebꞌ yin spenail,/ ẍi Jesús tet ebꞌ.

Chi Yal Jesús Yin Yet Chi Yijle Nocha Sbꞌa Ánima

14Jix apni ebꞌ scuywom naj Juan Bautista scꞌatan Jesús, catuꞌ jix skꞌanlen ebꞌ tet Naj jaxca tiꞌ:

—¿Tzet yuxan cꞌam chi yijle nocha sbꞌa ebꞌ ja cuywom? Jal jon jaon tiꞌ jon, chi kijle nocha cu bꞌa jon. Quey pax tuꞌ ebꞌ Fariseo, chi yijle pax nocha sbꞌa ebꞌ,* ẍi ebꞌ tet Jesús. 15Jix takꞌwi Jesús tuꞌ tet ebꞌ jaxca tiꞌ:

—Kꞌinaloj ta ey junoj nupil chi oc tinaniꞌ. Jaꞌ ebꞌ awtebꞌil bꞌey jun nupil tuꞌ, ¿tumi oj skeꞌ tol man oj low ebꞌ yet eyecꞌ naj lalan snupi tuꞌ yetoj ebꞌ? Jaꞌ yet manxa eyoj ecꞌ naj, jaꞌ yet tuꞌ, cꞌamxa chi low ebꞌ, ẍi Jesús tet ebꞌ.

Cꞌam Chi Ẍaꞌle Sbꞌa Icham Bꞌeybꞌale Yetoj Scuybꞌanil Jesús

(Marcos 2:18-22; Lucas 5:33-39)

16Cꞌam junoj jon chi cu lotꞌel niꞌoj cu acꞌ pichil catuꞌ chi kaon oc snipiloj junoj xil pichile. Ta ey bꞌey queytuꞌ chi kute xin, chi ketne el an acꞌ tuꞌ. Yetoj pax oj, man watxꞌoj chi yun can an xil tuꞌ yu an acꞌ tuꞌ. 17Yetoj pax oj, cꞌam mac chi aon ey vino tol to chi waꞌxi yul junoj icham neet tzꞌuum,#9:17 Jix stzꞌisey stzꞌuumal noꞌ ebꞌ sneetal oj vino. Jaꞌ yet chi chꞌibꞌa vino tuꞌ, catuꞌ chi paabꞌi aoj, catuꞌ chi nicꞌcha wan icham neet tuꞌ yu, yutol caw ey yip, yuxan asanne acꞌ tzꞌuum chi skꞌan ebꞌ yetoj acꞌ vino. yutol jaꞌ yet chi chꞌibꞌa jun vino tuꞌ, chi nicꞌchatoj noꞌ neet tzꞌuum tuꞌ yu. Catuꞌ tucꞌal chi etex el vino tuꞌ, cꞌal noꞌ tzꞌuum tuꞌ. Yuxan, asan yul acꞌ tzꞌuum chi ey wan vino tol to chi waꞌxi tuꞌ, yet watxꞌ cꞌam cꞌal junoj tucꞌal chi etex eloj, ẍi Jesús tet ebꞌ.

Ix Scutzꞌin Naj Jairo, yetoj Jun Ix Ix Jix Mitxꞌon Stiꞌ Spichil Jesús

(Marcos 5:21-43; Lucas 8:40-56)

18Jaꞌ yet lalanto yalon Jesús wan tiꞌ tet ebꞌ, catuꞌ jix apni jun yaawil ebꞌ Israel scꞌatan Naj. Jix ey kaan naj sattaj yajan Jesús, catuꞌ jix yalon jaxca tiꞌ:

—Tuxa chi cam ix jin cutzꞌin an. Toon wetoj an, catuꞌ chi too ja bꞌatxbꞌan oc ja kꞌabꞌ yibꞌan ix yet watxꞌ chi waꞌxi can scꞌul ix, ẍi naj tet Jesús. 19Catuꞌ jix too Jesús tuꞌ yetoj naj xin. Jix too pax ebꞌ scuywom Naj yetoj ebꞌ. 20Jaꞌ xol ebꞌ ánima tzajan yintaj Jesús tuꞌ, eyoc jun ix ix caw yaꞌey. Eyxa lacawebꞌ abꞌil ian cꞌal chi cam ix yu stzꞌilal ix chi eyi. Yuxan jix yakꞌ yip ix sjitzontoj sbꞌa yintaj Jesús, catuꞌ jix oc mitxꞌan ix yin stiꞌ spichil Jesús. 21Yutol jix yal ix yul scꞌul jaxca tiꞌ: “Tol oj waꞌxoj can jin cꞌul an, tane chin mitxꞌ stiꞌ spichil Naj Jesús tuꞌ,” ẍi ix yul scꞌul. 22Jix meltzotoj jacan Jesús tuꞌ yintaj, jix oc tꞌanan yin ix. Jix yalon Naj tet ix jaxca tiꞌ:

—Txo ix, tzalaan tinaniꞌ. Tol jix waꞌxi can ja cꞌul wu an, yu jix jin ja waoc yin ja cꞌul an, ẍi Jesús tet ix.

Yet xacꞌal jun txolan tuꞌ jix waꞌxi can scꞌul ix yin junelne. 23Jaꞌ yet jix apni Jesús bꞌey sna naj yaaw tuꞌ xin, jix yiloni tol lalan xuꞌle wan jaxca yili chirimia, catuꞌ caw chi wekꞌekꞌi ánima yokꞌi. 24Yuxan jix yal Naj tet ebꞌ ánima jaxca tiꞌ:

—Elanwejtoj stiꞌ na tiꞌ. Jaꞌ ix unin tiꞌ, man camnaj oj ix, tucꞌal chi wey ix, ẍi Naj tet ebꞌ. Caw tucꞌal jix tzeele Naj yu ebꞌ. 25Jix lawi yujtele eltoj ebꞌ stiꞌ na yu Naj xin, catuꞌ jix octoj Naj bꞌey eyecꞌ ix kꞌopo ix unin tuꞌ. Catuꞌ jix oc mitxꞌan Naj yin skꞌabꞌ ix tuꞌ, catuꞌ jix a waan ix. 26Masanil ebꞌ ánima bꞌey jun lugar tuꞌ jix abꞌen skꞌumal jun tzet jix yun tuꞌ.

Jix Ilwi Can A Cawan Winaj Cꞌam Cꞌaltaꞌ Chi Ilwi Yu Jesús

27Jix el Naj Jesús bꞌey tituꞌ xin. Lalan stoo Naj yul bꞌe, catuꞌ jix tzajlo cawan winaj cꞌam chi skeꞌ yilwi yintaj Naj. Jix awitoj ebꞌ tet Naj yin ipal jaxca tiꞌ:

—Jaach yicꞌaal naj David* ¿cꞌam mi chi okꞌ ja cꞌul kin? ẍi ebꞌ. 28Jaꞌ yet jix apni Jesús bꞌey na tuꞌ, jix sjitzon xacꞌaltoj sbꞌa ebꞌ scꞌatan Naj. Jix skꞌanlen Jesús tet ebꞌ jaxca tiꞌ:

—¿Chim je yaoc yin je cꞌul tol chi skeꞌ wu tzet che kꞌan ey jin tuꞌ an? ẍi Jesús tet ebꞌ.

—Jaꞌton Mamin, chi kaoc yin cu cꞌul jon tol chi skeꞌ ja wu, ẍi ebꞌ. 29Catuꞌ jix sbꞌatxbꞌan oc skꞌabꞌ Naj yin sbꞌakꞌ sat ebꞌ tuꞌ, catuꞌ jix yalon tet ebꞌ jaxca tiꞌ:

—Yutol jix je yaoc yin je cꞌul, yuxan, yun ojabꞌ tzet jix je yaoc yin je cꞌul tuꞌ, ẍi Jesús tet ebꞌ. 30Catuꞌ jix jajcha can sat ebꞌ, chi xa skeꞌ yilwi ebꞌ xin, catuꞌ jix cam yalon Jesús tet ebꞌ jaxca tiꞌ:

—Manche je yalel jun tiꞌ tet ebꞌ ánima, ẍi Jesús tet ebꞌ. 31Asan xin, jato cꞌal chꞌan yeltoj ebꞌ, catuꞌ jix cꞌoli yalon el ebꞌ tet masanil ebꞌ bꞌey jun lugar tuꞌ tzet jix yun Jesús.

Chi Kꞌanabꞌ Can A Jun Winaj Cꞌam Cꞌaltaꞌ Chi Skeꞌ Skꞌanabꞌi

32Jaꞌ yet lalan yeltej ebꞌ tuꞌ xin, catuꞌ jix iꞌletej jun winaj scꞌatan Jesús. Jaꞌ jun winaj tuꞌ, cꞌam chi skeꞌ skꞌanabꞌi, yutol eyoc jun pena espíritu* yin. 33Jix cꞌal ujtele el jun pena espíritu tuꞌ yin naj yu Jesús xin, catuꞌ jix kꞌanabꞌ a naj. Masanil ebꞌ ánima jix ilon jun tiꞌ, caw jix qꞌueya scꞌul ebꞌ sicꞌlebꞌil, yuxan jix yal ebꞌ jaxca tiꞌ:

—Cꞌamto bꞌey chi kil junoj tzetyetal jaxca jun tiꞌ cu xol jaon Israel jon tiꞌ, ẍi ebꞌ. 34Jal ebꞌ Fariseo xin, jix yal ebꞌ jaxca tiꞌ:

—Jaꞌ jun winaj tiꞌ, chi taꞌ skeꞌ yiꞌon el pena espíritu yin ánima, yutol jaꞌton syaawil ebꞌ pena espíritu tuꞌ eyoc yetoj naj, ẍi ebꞌ Fariseo tuꞌ.

Jix Okꞌ Scꞌul Naj Jesús Yin Ebꞌ Ánima

35Jix ecꞌ Jesús yul-laj masanil conobꞌlaj cꞌal yul-laj aldealaj, catuꞌ jix cuywa can yul-laj snail sculto ebꞌ Israel. Jix yalel watxꞌ kꞌane yu tzet chi yun yoc Dios Yaawiloj ebꞌ ánima. Jix yakꞌ pax can waꞌxoj scꞌul ebꞌ ánima yin yal cꞌal tzet yaꞌbꞌilal chi ioni. 36Jaꞌ yet jix yilon ebꞌ ánima Naj Jesús, jix cusa scꞌul naj yin ebꞌ. Yutol laan yili ebꞌ jaxca junoj bꞌulan noꞌ meꞌ cꞌam yilomal. Eoc ebꞌ yin somcꞌulal cꞌal yin syaꞌtajilal jix yil Naj. 37Yuxan jix yal tet ebꞌ scuywom jaxca tiꞌ:

—Jaꞌ ebꞌ ánima tiꞌ, stiempoal yiꞌle a ebꞌ tinaniꞌ, jaxca ixim tiriw stiempoal xa scꞌuplei. Caw yel caw listo cꞌal yeoc ebꞌ, asan xin, jaywanne pax mac lalan smulna xol ebꞌ. 38Yuxan, txalanwej tet naj a mulnail tiꞌ, yet watxꞌ tol chi ẍejtej ebꞌ smulnawom xol ebꞌ, ẍi Jesús tet scuywom.

Selectat acum:

Mateo 9: knj

Evidențiere

Împărtășește

Compară

Copiază