Mateo 11

Jaꞌ Naj Juan Jix Ẍejtoj Wan Scuywom Scꞌatan Jesús

(Lucas 7:18-35)

1Jaꞌ yet jix lawi yalon wan chejbꞌanil tiꞌ Naj Jesús tet ebꞌ lacawan scuywom tuꞌ xin, catuꞌ jix toi. Catuꞌ jix ecꞌ yul-laj conobꞌlaj bꞌey jun lugar tuꞌ. Jix ecꞌ yalon el skꞌaneal cꞌal scuywa tet ebꞌ ánima. 2Jaꞌ yet jun tiempoal tuꞌ, eyoc naj Juan Bautista yul preso. Jix yabꞌ naj tzettaj yetal lalan yunen Naj Cristo. Yuxan jix ẍejtoj wan scuywom bꞌey eyecꞌ Jesús. 3Jix skꞌanlen ebꞌ tet Jesús jaxca tiꞌ:

—¿Jaach tiꞌ, Cristo Jaach, jaꞌton Naj lalan kechbꞌanen sjuli, ma ey junojxa chi kechbꞌane sjul jon xin? ẍi ebꞌ tet Jesús. 4Jix takꞌwi Jesús tet ebꞌ jaxca tiꞌ:

—Paxanwejtoj bꞌey naj Juan tuꞌ, catuꞌ che yalon yabꞌ naj Juan tuꞌ wan che yabꞌ tiꞌ, cꞌal wan che yil tiꞌ. 5Che yal tet naj tol ey ebꞌ cꞌam cꞌaltaꞌ chi skeꞌ yilwi, chi xa ilwi ebꞌ tinaniꞌ. Jaꞌ ebꞌ cꞌam cꞌaltaꞌ chi skeꞌ sbꞌeyi, chi xa bꞌey ebꞌ tinaniꞌ. Jaꞌ ebꞌ eyoc lepra yin jix waꞌxi can scꞌul ebꞌ. Jaꞌ ebꞌ cꞌam chi yabꞌe, jix yabꞌ can a ebꞌ. Ey pax ebꞌ camnajxa jix pitzcꞌu can aoj. Catuꞌ lalan yabꞌen watxꞌ kꞌane yet colbꞌanile ebꞌ mebꞌa.#Isaías 35:4-6. 6Caw watxꞌ yet ebꞌ cꞌam chi somcha can el scꞌul win an. Queytuꞌ che yute je yalon tet naj Juan tuꞌ yet chex apni, ẍi Jesús tet ebꞌ. 7Jaꞌ yet lalan spaxcantoj ebꞌ chejabꞌwom tuꞌ, jix yalontej Jesús yin naj Juan tuꞌ tet ebꞌ ánima jaxca tiꞌ:

—Naꞌwejtej, tzet jix bꞌet je yil bꞌey cusiltaj txꞌotxꞌ tuꞌ. ¿Jam junoj teꞌ aa chi bꞌilwi yu kaꞌeꞌ jix bꞌet je yilaꞌ? 8Ta man jaꞌ oj, ¿tzet jix bꞌet je yil xin? ¿Ma jaꞌ junoj winaj watxꞌ spichil jix bꞌet je yilaꞌ? Je yotaj xa tol jaꞌ ebꞌ watxꞌ spichil tuꞌ, jaꞌ bꞌey sna ebꞌ yaaw eecꞌ ebꞌ. 9Ta manaj wan tuꞌ xin, ¿tzet jix bꞌet je yilaꞌ? ¿Ma jaꞌ junoj yalomal el skꞌane Dios jix bꞌet je yilaꞌ? Yalomal ton el skꞌane Dios jix bꞌet je yil tuꞌ. Jaꞌ naj Juan tuꞌ, man asanne oj ẍejabꞌ Dios tuꞌ yopiso. 10Yutol jaꞌton skꞌaneal naj Juan tiꞌ, yalnaj can Dios yul An Juun Tzꞌibꞌebꞌilcanoj, bꞌey chi yal jaxca tiꞌ:

Oj jin chejtoj jun jin chejabꞌ, oj bꞌabꞌojtoj ja sattaj. Jaxca chi yun swaꞌxi junoj bꞌe, jaxca tuꞌ, oj yute waꞌxoj sbꞌeybꞌal ebꞌ ánima yu, yet cꞌamto chach juli, ẍi yul An Juun tuꞌ.#Isaías 40:3.

11Caw yel chi wal ey jex, tol jaꞌ xol ánima yul yibꞌankꞌinal tiꞌ, cꞌam junoj mactxequel ecꞌbꞌan yeloc apnoj yintaj naj Juan Bautista tuꞌ. Yal cꞌal mactxequel eyoc Dios Yaawiloj, yel ecꞌbꞌan swatxꞌil yet ebꞌ yintaj naj Juan tuꞌ, caxcꞌal cꞌam cꞌal yeloc apnoj ebꞌ. 12Yet tax jix ẍaꞌon el yich yakꞌwi bautizar ánima naj Juan, masantaꞌcꞌal tinaniꞌ ey ebꞌ chi yoche chi el yich jun Yaawilal a satcan yetoj jowal. Ey ebꞌ caw chi yakꞌ yip yoc Dios Yaawiloj ebꞌ. 13Yutol jaꞌ masanil ebꞌ ẍejabꞌ Dios jix aloni, tol oj oc Dios Yaawiloj. Quey pax tuꞌ yal-le can yul sley Moisés.* Jix yalon ebꞌ masantaꞌcꞌal jix jul naj Juan tuꞌ. 14Jaꞌ tinaniꞌ, ta chi skeꞌ che yaoc yin je cꞌul jaꞌ naj Juan tuꞌ, jaꞌton naj Elías, jun albꞌilcan tol oj juloj, jun echbꞌanebꞌil sjuli. 15Jaꞌ wan che yabꞌ tiꞌ, naꞌwejtej sicꞌlebꞌil. 16Jal ebꞌ ánima yet jun tiempoal tiꞌ, oj waltej ey jex tzet utbꞌil yeoc snaꞌbꞌal ebꞌ. Laan ebꞌ jaxca unin tucꞌal chi ecꞌabꞌ txombꞌal. Ey ebꞌ chi yal tet wanojxa yet uninal jaxca tiꞌ: 17“Jix koche chex sajchi ketoj, caw naꞌbꞌacꞌal jix ketne cu bꞌa cu sonli je yu, ma cꞌal pax jex canalwoj. Yetoj pax oj naꞌbꞌacꞌal jix cu bꞌitne wan bꞌit caw cusiltaj xacꞌal yoqui, ma cꞌal pax jex okꞌ ketoj jon,” ẍi ebꞌ. 18Quey cꞌal tuꞌ ye yet jix julecꞌ naj Juan Bautista, yutol jaꞌ sbꞌeybꞌal naj Juan tuꞌ, cꞌam tzet watxꞌ chi yoche chi sloꞌ, cꞌal chi yuqꞌueꞌ. Yuxan chi yal ebꞌ, tol junoj pena espíritu chi etneni. 19Jaꞌ yet jix jin jul xin, jain Akꞌbꞌil Wopiso yu Dios xol ebꞌ ket animail an. Jain tiꞌ, chin lowi, chi wuqꞌue. Chi yal pax ebꞌ win an: “Jaꞌ Jesús tuꞌ, asan cꞌal looꞌ cꞌal uqꞌue vino chi yoche. Yamigo sbꞌa naj yetoj ebꞌ tejom el toolabꞌal, cꞌal yetoj wanxa ebꞌ pena sbꞌeybꞌal,” ẍi ebꞌ win an. Yal cꞌal tzet chi kunne, pena che yal kin. Jal ebꞌ eyoc sjelanil Dios yin, chi txeclo el ebꞌ tuꞌ yin tzet chi el yuneni, ẍi Jesús tet ebꞌ.

Wan Conobꞌ Bꞌey Ma Snaꞌ Sbꞌa Scꞌul Ánima Yin Spenail

(Lucas 10:13-15)

20Jix lawi jun tuꞌ, catuꞌ jix ẍaꞌon el yich Jesús yalontej spenail ebꞌ ánima bꞌey wan conobꞌlaj bꞌey caw ey milagro* jix yunne. Caxcꞌal caw ey milagro jix el yunen snan xol ebꞌ tituꞌ, caw ma snaꞌ sbꞌa scꞌul ebꞌ yin spenail. Yuxan jix yal Naj jaxca tiꞌ:

21—Chi wal ey jex an, jex a Corazín, caw okꞌbꞌal jex cꞌule. Cꞌal jex a Betsaida, okꞌbꞌal jex pax cꞌule. Kꞌinaloj ta jaꞌ bꞌey Tiro yetoj bꞌey Sidón jix yun wan milagro jix txꞌoxle je xol tiꞌ, maꞌitax mi jix yaoc ebꞌ wan eel coẍtal spichiloj. Yetoj stikꞌakꞌil taan maꞌitax mi jix yaatoj ebꞌ yin sjolom yu xeclonen el ebꞌ tol caw chi cus scꞌul ebꞌ yu spenail.#11:21 Eel coẍtal spichil yetoj stikꞌakꞌil taan; il tzet chi yal bꞌey diccionario. 22Yuxan, jaꞌ yet oj jul jun cꞌual yet chi snaꞌoc Dios yin ánima, yel xacꞌal miman syaꞌtajilal oj je chaꞌ yintaj ebꞌ a Tiro cꞌal ebꞌ a Sidón. 23Jacꞌalaꞌ jex a Capernaúm, che naꞌ tol je moo je yapni satcan, caw cꞌamaj, tol jaꞌ bꞌey syaꞌtajilal oj jex tojcanoj. Ta jaꞌ bꞌey conobꞌ Sodoma* jix wun wan milagro jaxca wan jix wun je xol tuꞌ, jix mi snaꞌ sbꞌa scꞌul ebꞌ yin spenail, ey mi ecꞌ sconobꞌ ebꞌ tuꞌ tinaniꞌ. 24Yuxan chi wal ey jex, jaꞌ yet oj jul jun cꞌual yet chi snaꞌoc Dios yin ánima, yel xacꞌal miman syaꞌtajil oj je chaꞌ yintaj ebꞌ a Sodoma tuꞌ, ẍi Jesús tet ebꞌ.

Jaꞌton Naj Jesucristo Chi Cu Akꞌon Xewoj

(Lucas 10:21-22)

25Jaꞌ yet jun tiempoal tuꞌ, jix txali Jesús. Jix yal naj yin xa jaxca tiꞌ:

—Mamin, yaaw jaach bꞌey satcan, cꞌal bꞌey yul yibꞌankꞌinal tiꞌ, chi wal watxꞌ kꞌane ey jaach an, yutol jix ja webꞌa el wan tiꞌ tet ebꞌ jelan, cꞌal tet ebꞌ caw jelan yul sat ebꞌ yet animail. Jal ebꞌ cꞌam yeloc apnoj yul sat ánima xin, jix ja wakꞌ yotajne el ebꞌ. 26Queytuꞌ jix ja wute jaxca tuꞌ, Mamin yutol queytuꞌ jix ẍaꞌ ja cꞌul, ẍi Jesús tet Dios. 27Jix lawi jun tuꞌ xin, catuꞌ jix yalon Jesús tet ebꞌ ánima jaxca tiꞌ:

—Jaꞌ Naj jin Mam an, jix yakꞌ can masanil tzettaj yetal yul jin kꞌabꞌ. Cꞌam junoj mactxequel otajnen jin, jain Cꞌaale jin tiꞌ an. Asan jin Mam tuꞌ otajnen jin an. Yetoj pax oj, cꞌam mac comon cꞌal chi otajnen el jin Mam an. Asan jin, jain Scꞌaal jin tiꞌ an, wotaj an, yetoj pax tet mac chi yal jin cꞌul chi wakꞌ otajnele el an. 28Yuxan, titanwej ey jin je masanil an, jex chex cꞌuumbꞌi yu mulnail, cꞌal yu yalil je yijatz, oj jex wakꞌ xew an. 29Iꞌwej jun ijatz oj wakꞌ ey jex an. Cuywanwej wintaj an, yutol jain tiꞌ, yin watxꞌcꞌulal chin chaꞌ ánima. Yeynajil chi wute jin bꞌa an, catuꞌ oj je chaꞌon xewbꞌal je pixan. 30Jaꞌ jun ijatz chi wakꞌ je yij tiꞌ an, man al oj, catuꞌ man pax yaꞌtaj oj jin je yakꞌon servil, ẍi Jesús tet ebꞌ.

Selectat acum:

Mateo 11: knj

Evidențiere

Împărtășește

Compară

Copiază