Kalát 4
4
Peétépi tikápá piɔ́lí pí kikotí, maná paán pá Támbák
1Epú yaambanɛ́ɛ kuɔyɛt púnyɛ ɛ́ɛ́: aká ewú úmányitáŋáp kiséé manyɛɛ́ kiendine unyɛ ɛlɛɛ́ kiɔ́lí, tɛ upa kɔk muɛ́t kiséé. 2wɔ́ kɛ́kɛ́ɛ́yɛ́ unyɛ nɛ pɛɛnd pápianɛ́ɛ wɔ, póond péendesi maandá mɛ́ɛ́yɛ́ meem kuám á kisikɛl síí maásɔ́mb. 3púnyɛ pilɔŋ pímoómí naasɔ́, aká tumaápá paápayɔ́ tumapá piɔ́lí pí peépé pápianɛ́ɛ pukaaka pú kúúsí. 4Maná aká kisikɛl kí Támbák mɛɛ́sikɛn, waatɔ́m muɔ́nɔ́ wɛɛyɛ́, akáandɔ́ weepien wɔ, péekelepe wɔ́ yá aná pikotí pí Pɛyúútɛn óónyonyée, 5ɛ́ɛ́ wááŋɔn epé pámaápá pɔ́sɔ́tɔn ó pikotí, ɛ́ɛ́ túpá paán pá Támbák. 6É kutiínyi ɛ́ɛ́ kémuémue nunyɛ paán pɛ́ɛ́yɛ́, Támbákɛ́ɛ waanútúmɛn Emfún ú Muɔ́nɔ́ wɛɛyɛ́, úkálanɛ́ ekelú mɛnɛ́mɛnɛ́ɛ ɛ́ɛ́: «Ápa, Taat!» 7Nutikápá Kɔk piɔ́lí, maná nukanyi paán pɛ́ɛ́yɛ́; aná nunyɛɛ́ paán pɛ́ɛ́yɛ́, Támbák áányínúfá kiséé ekí unɛkinɛnɛ́ɛ paán.
Indúmútén í Póol ó pusíó pú punya Kalát
8Insúá, aká numaápa numanyi nutimenyi Támbákɛ́ɛ, numapá piɔ́lí pí pa Támbákɛ́ɛ pɛ́mɛɛ́l pɛ́tiɛlɛ́ pa Támbákɛ́ɛ é kémuémue. 9Ninuán kɔk ewú núményimenyí Támbákɛ́ɛ, Támbák númenyen peseéképese, tiɛkíɛ́ nunyɛɛ́ kuand kuond ɔ́ pilɔk pí piliínditíe pikaánɛ́ pítiányípá tɛ na pukaaka, píi andíkɛ́k ɔsɔk. Nuákaamba kuand kuond ni inúú ɔ́ kukɔtɔn pɛ́ɛ a? 10Nuósol kuákan ɔ́ niɔlɔ́ mɔɔ́si mómotí, á pisikɛl pímotí, siólí símotí nɔ tuɔŋ túmotí! 11Yaápian puwaá ɛ́ɛ́ puólí yáányímán kuɛlɛ káánɔ́ ó pusíó áám sɛ́kísɛ́k! 12Paandimán páámɛ, yoónúpísókolonyi, ɛ́nuɛlɛ́ niaŋ níámɛ, ɛ́ kuɛlɛ́ ɛ́ɛ́ imɔpíkɔ́l niaŋ níánɔ́ nutiányípá Pɛyúútɛn. Nutimiŋɛl tɛ puandá pú kilɔk. 13Panɔ́ muɛ́t nuémenyen peseé ɛ́ɛ́, kisikɛl kíkutúan ɛ́ɛ́ ínútián insɔ́m yi indámb mapá aká imaápá inúma. 14Tɛ aná kunúma kúámɛ maápá mɛnyɛnyɔ́ káánɔ́ ó pusíó, nutimiŋúŋɛt tɛ kuuyɛɛnɛt, maná nuuŋɔl ɛlɛɛ́ Éŋele u Támbák, kúnyáánɛ ɛlɛɛ́ Yésus Kilíise wɔ́ muɛ́t. 15Kiandá kí anyamɔ́ numaápá na wɔ́ á kisikɛl imaánúmá nyɛ naánɛ́? Púkanyi tiɛkíɛ́ naanɔ́? Inyi kunúpíákinan itóy ɛ́ɛ́, á kisikɛl kikáánɛ́, kipán siákápá nusíɔ́písɔ́kɔ eŋis yáánɔ́ nuuŋekenyi. 16Nínuán kɔk imɛ́ɛ́yí okóyikoyi waanɔ́ ó pusíó ɛ́ɛ́ yɔɔ́núɔ́yɔn kémuémue á? 17Pɛɛnd pakáánɛ éépíekenyi káánɔ́ kɔ́ɔ́m ɛ́ɛ́ pánúnyáánɛn, maná imbítáákítɛ́n síɔ́p tipá peseé, puɔ́p páambanɛ́ɛ nyɛ ɛ́ɛ́ núpíátɔn naamɛ, núpílat nɔɔpɔ́. 18Kupíekenyi é púúpú púnyɛɛ́ peseé nyɛ peseé, maná púɛ́kɛɛsikɛnɛn kupá kɔ́ ɔtɛ́m peseé á pisikɛl kitikit, kútipá yá aká inyɛ́ naanɔ́. 19Piendine píámɛ, yɔɔ́kɔ́pikɔn kukɔ́ɔ́sikɔ́siɛ káánɔ́ ó pusíó ɛlɛɛ́ akáandɔ́ nupíén ményipul wɔ. Yɛɛ́nyɛ́ɛ́nɛn iŋɛ́n anakaánɛ́ kuám aná puɛ́nyɛ́nikɛ́ɛ ɛ́ɛ́ Kilíis kanyi káánɔ́ ɛ́ kikɛtɛ́kɛtɛ́ɛ. 20Ɔtɛ́m wáámɛ ɔ́lɔɔ́ŋɔ ɛ́ɛ́ á kisikɛl ekie insí imapá naanɔ́ ɛ́ɛ́ yáand eséndi kilémbi á kunukálan, á kiákí ɛ́ɛ́ indipá imenyen aná yɛ́ɛlɛɛ́ naanɔ́.
Pulinsí pú Agaal nɛɛyɛ́ na Saalá
21Panɔ́ nuambanɛ ɛ́ɛ́ kikotí nuendesi, ɔ́nuŋɔyítɛn, nutipá nuɔ́pɔn epú kikotí kikáánɛ́ ɔ́ɔ́yɔɔnɛ́ɛ á? 22Púnyɛ puɔ́ŋɔ́ nɔ́ ɛ́ɛ́ Ápilaháamɛ weepíén paán páandɛ́, omoómí na Agaal umaápá kiɔ́lí, olotí na Saalá umaápa iŋɔlɔ yɛɛyɛ́. 23Maná muɔ́nɔ́ pémeépíén no kiɔ́lí, umepíén ɔ́ kuɔyɛt kú emekú, ewú pémeépíén ni iŋɔlɔ yɛɛyɛ́, umepién kí indán i Támbák. 24kiluúme kikáánɛ áápian indíínye ilotí inyɛɛ́ kuyuum. Pakáandɔ́ pakáánɛ páandɛ́ nyɛ ɛlɛɛ́ akál áandɛ́, Nímoómí níólinonée kɔ́ ɔkɛ́l ú Sinayí éépíéne piɔ́lí, níi nínyɛɛ́ Akáalɛ, maná paán pá nikál nikáánɛ́ nyɛ piɔ́lí. 25Á kiákí ɛ́ɛ́ Akáal nyɛ ɛlɛɛ́ ɔkɛ́l únyɛɛ́ kisiɛ́n ɛ́ɛ́ Sinayí únyɛɛ́ ɔ́ kitɔŋ kí Alapíi. Akáalɛ kɔk nyɛ ɛlɛɛ́ pálɛ́k u Yelúsalɛm u ínanɔ unyɛɛ́ ɔ́ puɔ́lí na paán pɛ́ɛ́yɛ́. 26Maná kɔk Yelúsalɛm u mɛnɛ́mɛnɛ́ɛ tipá ɔ́ puɔ́lí, wɔ́ unyɛɛ́ yóótíé waasɔ́: 27á kiákí ɛ́ɛ́ púnyi puɔ́ŋɔ́n kí imfíɔ́ŋ sí Támbákɛ́ɛ: «Yayaapa, aŋúɛ kikíl, aŋúɛ ɛmɛɛ́l etipíén, aákanɛ́ tupéképéké aŋúɛ ewú amapásíɛ́ ɔtiɔ́p kutɛ́ɛ́ ku nupíén, á kiákí ɛ́ɛ́ paán pá akáandɔ́ ɔnɛ́m ményeené wɔ áányípá kutek kupíányɛn pí iŋɔlɔ yɛɛyɛ́.» 28panɔ́ kɔk paandimán páámɛ, nunyɛ paán péményipíén pɔ́ kí indán i Támbák niaŋ ní Isáak. 29Maná yá aná ewú pémeépíén wɔ́ kí imekú meénesí ewú pémeépién wɔ́ ké emfún u Támbák iŋɛ́n, yá aná puányípáanɛ́ɛ nínúan káánɔ́ ó pusío. 30Maná púnyɛ puɔ́ŋɔ́n kí imfíɔ́ŋ sí Támbákɛ́ɛ: «Kúúŋɛ́t kiɔ́lí nɔ muɔ́nɔ́ wɛɛyɛ́, á kiákí ɛ́ɛ́ muɔ́nɔ́ u kiɔ́lí tipá wɛɛsikɛɛnɛn kupia niap é kisée nɔ muɔ́nɔ́ u iŋɔlɔ». 31Kúúkɔ́ paandimán, tutipá paán pá akáandɔ́ unyɛɛ́ kiɔ́lí, tunyɛ paán pa akáandɔ́ utiányípá kiɔ́lí.
Selectat acum:
Kalát 4: yav
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
© 2026, CABTAL