1 Tesalonik 4
4
Kusɔ́t ku ɛlɛnɛ́ Támbákɛ́ɛ peseé
1Paandimán, tumonúónyítónyi aná nuɛsikɛnɛnɛ́ kusɔ́tɔn ɛ́ɛ́ núpá peseé ké eŋís yá Támbák. púnyɛ nɔ́, nukanyɛɛ́ ɔsɔ́tɔn nɔ. Maná nínúan, tuónúówon tuond tu núpísókolonyi ɛ́ kisiɛ́n kí Ɔkɔ́n Yésus ɛ́ɛ́: ánuand apíkányɛk. 2púnyɛ, ɛ́ɛ́ nuémenyien insúŋɛ esí tumaánúfán ɛ́ kisiɛ́n kí Ɔkɔ́n Yésus. 3Kuɔyit kú Támbák nyɛ ɛ́ɛ́ núpá núpíátúnán na kifal, ɛ́ɛ́ nutiɛlɛ́ piɛŋdɛndɛ. 4Siki mɔɔnd káánɔ́ ɛ́ kikɛtɛ́kɛtɛ menyi ukukɔ́l akáandɔ́ kí indɛ́ndɛ́nɛ yɛɛlɛnɛ́ Támbákɛ́ɛ peseé, 5nutipíyapá ɛ́ɛ́ pilɔk pí pilɔŋɛt núpíányɛn niaŋ ni péépé pátiányípá pémenyien Támbákɛ́ɛ. 6Á puandá pukáanɛ, tɛ mɔɔnd utilɔkɛn andimán kúnyiɛ́ anɛ́ u púlit wɔ, ɛ́kuɛlɛɛ́ Ɔkɔ́n ényísésitenyi epé pɛ́ɛlɛnɛ pilɔŋ pí maandá pikáanɛ́, tuámáná anútían nɔ́ tuond tuanúfá kumenyi: 7Támbák timatúpílikɛn ɛ́ɛ́ túlɔp á pifal, maná umatúpílíkɛn ɛ́ɛ́ túsɔ́tɔn aná wɔɔyɔɔnɛ́ɛ. 8kúúkɔ́ kunyiɛ ɛ́ɛ́, ewú ufénené iŋónyítónyi esie, tipá wombo mɔɔnd, maná wuéféne Támbákɛ́ɛ, wɔ́ ewú unúfáanɛ́ emfúnkufúumɛ.
9Nutipá nupian insana ɛ́ɛ́ pɔ́núɔ́nyin kí iŋɔyɔ i pundiman, á kiákí ɛ́ɛ́ Támbákɛ́ɛ wɔ́ muɛ́t monúónyitónyí ɛ́ɛ́ núɔ́yɔnɛn panúɛ na panúɛ, 10Yɛ́tɛ iŋɔyɔ ikáaní nuɛlɛnɛ́ɛ na paandimán páásɔ́ á Masetuán kitikit; paandimán, tuánúakan kutáam, ɛ́ɛ́ núand asuŋuna. 11Muamba kusɔ́tɔn é kiyiéwué, nú kɔ́lɔn kisikɛl na masɔ́m máánɔ́ má pimuɛ́t, nuond nukɔtɔ ni imbɔ́k síánɔ, yáana tumaánutian. 12Ɛ́ɛ epé pátiányípá pa kilísitɛn áakan kusɔ́t kúánɔ́ ɔ́ niɔlɔ́, andíkɛ́k ɛ́ɛ́ nutiɛlɛ́ kinúá ó pusíó pú pɔsɔ́k.
Támbák ényíenyesi pilúŋ
13Paandimán, tutipá tuamba ɛ́ɛ́ nuleme puandá épupú púyoosonée piku, ɛ́ nutilɔpɔ́ kí insíkíl niaŋ ní pólotí epé pátiányípá no pipíóndínyíɔtɛm. 14Índɛ kɔk tuákaátapan ɛ́ɛ́ Yésus mekú woond wɛnyuk á pilɔ́ŋ, pilɔŋ pímoómí, epé pámaátápán yésuse, Támbák ényíenyi pɔ́ á pilɔ́ŋ ɔlɔŋ nɛɛyɛ́. 15Índí púupue tunúɔyɔnɛ aná nukal nú Ɔkɔ́n ɔyɔnɛ́: pasɔ́ tuányípánɛ́ tumɔɔ́sɔ́tɔn kuam ɔ́ kuosiondó kú Ɔkɔ́n, tutiányítúán é péépé pa maámaná ekúen. 16Á kiákí ɛ́ɛ́, pɛ́nyiɛl pékenyi pulinsí, ne ekelú ú Éŋele wɔkɔn nɔ kipɔ́p kí insiɛɛp i Támbák, Ɔkɔ́n wɔ́ muɛ́t ényisel mɛnɛ́mɛnɛ́ɛ: akáanɛ kɔk epé pemeékúén é Kilíis ányítúanɛ́ kuɛ́nyukɛn; 17Ékélem akáanɛ, pasɔ́ tuányipáanɛ́ tumɔɔ́sɔ́tɔn á kisikɛl kikáan, pɛ́nyítúnyɛ́lunɛnɛ́ ɔlɔŋ nɔɔpɔ́ ɔ́ kilɔndɔ́ é kuelumén nɔ Ɔkɔ́n é kietélíe, akáanɛ tuányípáanɛ́ nɔ Ɔkɔ́n á kisikɛl kitikit. 18Énupíekényí ilúndɛ panúɛ na panúɛ ni iŋónyítonyí eye.
Selectat acum:
1 Tesalonik 4: yav
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
© 2026, CABTAL