Faptili 3
3
Petrul Vindicã Dicunjarlu Shcljiop
1Petrul sh-Ioanul ma s-alina deadun tu templu tu oara trei dupã prãndzu tu chirolu a rugãciuniljei. 2Aclo eara un om shcljiopu di cãndu s-eara amintat, tsi lu adutsea cathi dzuã shi lu alãsa aproapi di usha a templui, tsi s-acljima “Mushata”, tra s-cãfta dicunji atsilor tsi intra tu templu. 3Elu, cãndu vidzu cã Petrul sh-Ioanul ma intra tu templu, lã cãftã dicunji. 4Atumtsea Petrul cu Ioanul, mutrinda cãtrã nãsu tu oclji, lji dzãsirã: “Nã mutrea!” 5Sh-elu ma lã mutrea cu cãshtigã, nãdãinda cã va loa tsiva di la nãshi. 6Ma Petrul dzãsi: “Mini nu am nitsi asimi, nitsi furii, ma atsea tsi am ma ts-u dau. Tu numa al Isus Hristos Nazareanlu scoalã-ti sh-imnã!” 7Deapoea Petrul lu acãtsã di mãna atsea ndreapta sh-lu sculã pri cicioari. Tu oara atsea lji si nvãrtushirã cicioarili sh-noadili. 8Sh-cu unã ansãriturã si sculã pri cicioari sh-apãrnji s-imnã. Intrã cu nãshi tu templu imnãnda, ansãrãnda sh-alãvdãnda Dumnidzãlu. 9Tutã lumea lu mutrea imnãnda sh-alãvdãnda Dumnidzãlu. 10Elji cãndu lu cunuscurã cã eara atsel tsi shidea nãinti di poarta atsea Mushata a templui sh-cãfta dicunji, s-thãvmãtisirã shi s-ciudisirã trã atsea tsi lji avea undzitã a lui. 11Atumtsea shcljioplu cai eara vindicatã stãtea ndupirat la Petrul sh-la Ioanul. Tutã lumea ciudisit fudzi troarã dupã elji la porticlu tsi s-acljima al Solomon.
Zborlu al Petru
12Cãndu lu-vidzu Petrul aestã, lji grãi a popului: “Bãrbats Israelits, cãtse vã ciudisits di aestã? Cãtse nã mutrits ashã canda noi cu putearea a noastrã di singur sh-cu dumnidzãsirea s-aveam faptã tsi aestu om s-imna? 13Dumnidzãlu al Abraham, al Isac sh-al Iacov, Dumnidzãlu a pãrintsãlor a noshtri lu ari multumãritã huzmichearlu a lui Isus, tsi voi lu prideadit la Pilat sh-lu alipidat nãintea a lui, cu tutã cã elu avea apofãsit s-lu sãlãghea. 14Voi lu alipidat atsel Sãmtul sh-Ndreptul shi cãftat s-vã sãlãgheascã un vãtãmãtor. 15Voi vãtãmat Dãtãtorlu a banãljei, tsi Dumnidzãlu lu ari nyeat dit mortsã. Trã aestã noi him martirii. 16Voi lu cunushtets aestu om shcljiopu tsi videts. Elu pistipsi tu numa al Isus sh-aestã l-nvãrtushi. Pistea tsi yini di la Isus lji deadi a lui aestã vindicari ntreagã nãintea a voauã tuts. 17Mini tora u-shtiu, frats, cã voi u-avets faptã di nishtirea, ashã cum au faptã sh-mãrlji a voshtri. 18Dumnidzãlu ari mplinitã ashãtsi atseali tsi avea dzãsã cu gura a prufitsilor a lui, cã Hristolu va si s-munduia. 19Trã atsea mitãnjiusits-vã sh-turnats-vã la Dumnidzãlu s-vã ashteargã amãrtiili a voastri, 20shi s-yin chirolu a diznjirdariljei di Domnu, sh-ashãtsi elu vã pitreatsi Hristolu tsi easti Isusul, arãdãpsit ma nãinti trã voi. 21Tserlu prindi s-lu aproachi pãnã tu oara a ntiniririljei a tutulor trã cai Dumnidzãlu ari grãit prit gura a tuts sãmtsãlor prufits a lui di tu ahurhita a etiljei. 22Moisiul ari dzãsã: ‘Domnul, Dumnidzãlu a vostru, va scoatã trã voi namisa di fratslji a voshtri un prufit ca mini. Ascultats-lu tu tuti zboarili tsi va s-vã dzãcã! 23Caitsido tsi nu va lu ascultã aestu prufit, va si s-ashteargã dit populu.’ 24Tutashã tuts prufitsilji di la Samuel sh-n'coa au grãit sh-li au hãbãrsitã aesti dzãli. 25Voi hits hiljilji a prufitsilor sh-a pisti-ligãturiljei tsi featsi Dumnidzãlu cu pãrintsãlji a noshtri, dzãcãnda al Abraham: ‘Tu dupãyinitura a ta va s-ghinicuvãnteadzã tuti fãrili a loclui.’ 26Dumnidzãlu, dupã tsi lu-nyie huzmichearlu a lui Isus, vã-lu pitricu ma nãinti a voauã tra s-vã ghinicuvãnteadzã, dipãrtãnda cathiun di voi di la cãljurili a voastri atseali arali”.
