Ehokora 7
7
Anu o 144,000 awa a pakire Nyambi etamba
1Munyima thzeyo, na monine tungeru tune o ku tu nemana mu mambango ane o kaye, o ku tu na ñaña mipepo thzine thzo kaye ku yapithsa ci kwa pepa mupepo pa kaye nji pa diwate nji pa thsitondo thsipi nji thsipi. 2Ngou na monine kangeru kamweya o ku ka tunda ku muvo o ku ka na shimbi thsiramatera thsa Nyambi oyu yoya. Kethsire ko diywi dyodikuru tuya tungeru tune otu twa piwire okoro o kwipithsa kaye no diwate. 3Ka ambire ci: “Mwepithsa kaye, nji diwate, nji etondo, shime o ku tu na mana ku paka etamba pa rupara rwapika Nyambi wetu.” 4Ngou na yuvire taro thzowa a pakiwire etamba ya Nyambi, a kwanine 144,000 ku tunderera mu mikuta thzothzihe thza Isiraele.
5Mu mukuta wa Juda nedi 12,000, mu mukuta wa Rubeni nedi 12,000, mu mukuta wa Gadi nedi 12,000, 6Mu mukuta wa Asere nedi 12,000, mu mukuta wa Nafetali nedi 12,000, mu mukuta wa Manase nedi 12,000, 7mu mukuta wa Simioni nedi 12,000, mu mukuta wa Livi nedi 12,000, mu mukuta wa Isakare nedi 12,000, 8mu mukuta wa Zabuloni nedi 12,000, mu mukuta wa Josefa nedi 12,000, mu mukuta wa Benjamini nedi 12,000.
Mungi oukuru wanu ku tunderera mu kaye kokahe
9Munyima thzeyi, na kengire no ku mona mungi wanu oukuru o kukana ku twethsa munu ku tara awa tundererire mu matunga oahe, mu mishovo thzothzihe, mu mambunga oahe, no mu manjimi oahe. Emanine pa rupara ro ngunja no pa rupara rwa Dinguana. A vatire evata yoikenu, karo a kwatererire mite thzo makaka mu moko o. 10A kuererire ko diywi dyodikuru ci:
“Kuyoyithsiwa kwetu kwaa tunda kwa Nyambi oyu nekara pa ngunja,
karo kwaa tunda kwa Dinguana.”
11Tungeru totuhe twemanine ku thzinguruka ngunja nakuru no yumbiwa ine yoiyumi. A wire pashi ku furumana pa rupara ro ngunja no ku yemekera Nyambi. 12A ambire ci:
“Ameni! Kushangara no kutethzima nonyanyami
nokanderero no direma nofumu
nokoro ikare kwa Nyambi wetu
diyere na diyere. Ameni!”
13Yumweya kwakuru wa ni purire ci: “Adye awo anu a na vata yoikenu, karo aa tunda kupi?”
14Na mu tawire ci: “Ñathsire wange, yowe o na dimuka.”
Wa ni amberire ci: “Awa wodiyo na tundu mu dikarara dyoshokuru, na yoo evata yo no ku i kenithsa munyinga wa Dinguana.
15“Mweyo, a nemana pa rupara ro ngunja thza Nyambi,
no ku mu kwamena mu Tembere thzenthzi mutenya nothsiku.
Oyu nekara pa ngunja
kenge a ku tunga peuru thzo.
16Mbera ka fu karo nthzara,
karo mbera ka fu dinotwa.
Diyuwa mbera ka di wa tumeka karo,
nji ku tumekiwa ku ngara kupya.#Isa 49.10.
17Inene oyu Dinguana oyu di pa kaci ko ngunja
kenge mba ekara Mudithsani wo.
Kenge mba a wa tangerera ku manowa o meyu o mwoyo,
karo Nyambi kenge mba a porora mihothzi thzothzihe ku meho o.”
Selectat acum:
Ehokora 7: mho
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
©2023 The Seed Company
