YouVersion
Pictograma căutare

កណើត ពដិះ គ្រែ 2

2
1អ៊ែ គ្រែ វ៉ា ពដិះ កគ់ ចឹស លែក ប្លូច ឡើយ ប៊ិច ហ្នដឹប សនឺ សប់ លភិ សប់ លផាត់ ដិ។  2#កញ. ២០:១១; ហប. ៤:៤,១០និះ ប៊ឹះ តង៉ៃ ទី ប៉ឹះ លែក ឌី កាន គ្រែដៃ ឡា បើម អ៊ែ ចឹស ឡើយ។ ណាគ់ ពឹង តង៉ៃ ទី ប៉ឹះ អ៊ែ គ្រែដៃ ហ ង៉ូក តា ពឹត យ៉ាវ។  3គ្រែដៃ កគ់ ពដាយ តង៉ៃ ទី ប៉ឹះ អ៊ែ អាំ ហ អ្យាគ់ រ៉ូម ឌីខង ទឹង តង៉ៃ ប៉ឹះ អ៊ែ ហ ង៉ូក តា ពឹត កាន ពឝ៉ើត តវឹរ នែវ តគ់ នែវ នែ យ៉ាវ។ 
4នែ ឡើយ ឡា តណើម កណើត គ្រែ វ៉ា ពដិះ សាគ់ ឋួរៗ ពឋើម គ្រែដៃ ឡា ពឝ៉ើត អ៊ែ។ 
កឡ វ៉ា កទ្រី កនុង សួន មឺរ អ៊ែឌែន
5សាគ់ គ្រែដៃ ឡា ពឝ៉ើត ពដិះ អ៊ែ តា ប៊ិច ឆិ ហួន ឞឹះ កគ់ តា ប៊ិច បាត់ ប្រ៊ី នែវ ឆិ ហួន ឞឹះ ពទឺ ឌីខង គ្រែដៃ តបើម ឞ៊ឺ ពឹង ពដិះ ឞឹះ អ៊ែ កគ់ តា ប៊ិច បនិះ ឆិ ឡា ម៉ា ពពឹត បបើម ឞឹះ។  6ប៊ិច ឡូវ ក្រហ៊ូយ ញឺស តើម ឝឹត ពដិះ ដាក មឹត សើម ពឺង ពដិះ កាស អិះ។  7គ្រែដៃ ចក់ ហអង ពដិះ ម៉ាន បើម បនិះ មូយ រ៉ា។ ដូវ អ៊ែ ហ ក្លូម តមុត កយឺវ តូយ ត្រម មុះ តើម ពឹង អ៊ែ ហ ប៉ិន #១ករ. ១៥:៤៥បនិះ ឡា ដូវ ហាប់ កាន ញិវ។ 
8ដូវ អ៊ែ គ្រែដៃ បើម សួន មឺរ មូយ ហ៊ឹ អ៊ែឌែន ចំឞ៊ែង តូយ ម៉ាត់ តង៉ៃ ឡិច ហ ប្រ៉ៃ បនិះ ហ ឡា ម៉ាន អ៊ែ គូ ហ៊ឹ មឺរ អ៊ែ។ 
9គ្រែដៃ បើម អាំ ពដិះ ហួន លែក ត្រំ ឌី តណើម ឡង ឡា រ៉គ់ សំ ឆំ តក វ៉ា តណើម ឡង ជុ ផឿ បើម ប៉ិន ចណា ឍឺ។  #បព. ២:៧; ២២:២,១៤តណើម ឡង ឡា បើម អាំ ញិវ វ៉ា តណើម ឡង មូយ ឋាវ្គ ឡា បើម អាំ ណោះ សឝ៉ាវ កាន យូច ត្រ ទឹង អ្នឌី សួន មឺរ អ៊ែ ពទឺ។ 
10ប៊ិច ដណៃ មូយ លូះ ញឺស ឝឹត អ៊ែឌែន ឈ្រីប អាំ ហ សើម សួន មឺរ អ៊ែ ដូវ អ៊ែ លូះ តើម ពឹង អ៊ែ ប៊ិច ពួន ច្រឡះ។  11ទី មូយ ម៉ាត់ «ពិស៊ុន» ដណៃ ឡា លូះ ឆវែង ពដិះ ហាវីឡា ឡា ប៊ិច ឆៀង 12ឆៀង ឝឹត ពដិះ អ៊ែ ឆៀង ឡា អ្យាគ់ កគ់ ប៊ិច ហ្នដឹប ឆារ់ ឡង ឡា សអម វ៉ា គែវ ឡា អ្យាគ់ ដិ។  13ទី បារ ម៉ាត់ «ឝីហ៊ុន» ដណៃ ឡា លូះ ឆវែង ពដិះ គូស។  14ទី ពែ ម៉ាត់ «ហ៊ីឌែគែល» ដណៃ ឡា លូះ រ៉ិ ហ្មិះ ចំឞ៊ែង តូយ ម៉ាត់ តង៉ៃ ឡិច ពដិះ អាសសួរ។ អ៊ែ ដណៃ ទី ពួន ម៉ាត់ «អើប្រ៉ាត»។ 
15គ្រែដៃ ចក់ បនិះ កឡ ហ ឡា ពឝ៉ើត អ៊ែ ម៉ាត់ ហ អដាម រ៉ិ ជុ ហ៊ឹ សួន មឺរ អ៊ែឌែន ប្រ៉ៃ ហ ពពឹត បបើម វ៉ា រង់ហៃ រ៉ាង សួន មឺរ អ៊ែ ប្រើយ។  16គ្រែដៃ ហាយ ឌី ហ រៀន៖ «សៃ ម៉ា ចា ប្ល៉ៃ ឡង លែក អិះ កនុង សួន មឺរ នែ ដូវ តាម រូគ 17ហាក់ឌី ហ ឡា តណើម ឡង ឡា បើម អាំ ណោះ សឝ៉ាវ កាន យូច ត្រ អ៊ែ សៃ ញ៉ង ប៉ិះ ចា ប្ល៉ៃ ហ អ៊ឺម យ៉គ! ប៉ាគ់ ឌី តង៉ៃ ឆិ សៃ ចា ប្ល៉ៃ អ៊ែ សៃ ម៉ា ត្រ គែត ម៉ាត់ ម៉ាត»។ 
18គ្រែដៃ ប៊ិច ប្រម៉ាង រៀន៖ «បនិះ នែ គូ មរ៉ា ហ អ៊ែ តា ឃឺ អ៊ឺម។ អៃ ម៉ា បើម ប៊ិច មូយ រ៉ា ឋាវ្គ ជុ ឝ៉ឹនឌី ផឿ ឆួយ ហ»។ 
19គ្រែដៃ ចក់ ពដិះ ម៉ាន លែក ឌី សនឺ ឈឹង ពួន វ៉ា ហ្នដឹប ជែម លែក អ៊ែ រ៉ិ តៀត ហ៊ឹ អដាម បក់ឌី អាំ ណោះ ហ ម៉ា ជុ ម៉ាត់ នែវ ឆិ។ អ៊ែ ម៉ាត់ ឆិ អដាម ឡា ជុ លែក ត្រំ សនឺ ជែម ចណាយ អ៊ែ ហ ប៊ិច ម៉ាត់ ពអ៊ែ ឡើយ។ 
20អដាម ហ ជុ ម៉ាត់ អាំ ត្រំ លែក ឌី សនឺ ស្រ៊ុក សនឺ ប្រ៊ី វ៉ា ជែម ប៉ារ់ នឹង បូយ លែក អ៊ែ ឡើយ ហាក់ឌី តា តៃ ប៊ិច មែ ឆិ ឡា រែប ទឹង ហ បក់ឌី បើម ឝណូប ឆួយ ហ ពតាក់ ឞឹះ។  21អ៊ែ គ្រែដៃ បើម អាំ អដាម ហ្ងាន់ លិប យឹប ដូវ អ៊ែ ហ ចក់ កឌឺង ចអ មូយ អ៊ែ ពស៊ិរ ម៉ាត ឋាវ្គ។  22កឌឺង គ្រែដៃ ឡា ចក់ ឝឹត អដាម នែ យ៉ាគ់ គ្រែដៃ តវឹរ បនិះ កទ្រី មូយ រ៉ា អ៊ែ ឡើយ ហ តៀត កទ្រី អ៊ែ រ៉ិ ហ៊ឹ អដាម។  23អដាម កគ់ ម៉ាង រៀន៖ «នែ ឡើយ កឌឺង ឝឹត កឌឺង អៃ ម៉ាត ឝឹត ម៉ាត អៃ។ អៃ ម៉ា ជុ រៀន “បនិះ កទ្រី” ឌីខង ចក់ ឝឹត បនិះ កឡ»។ 
24 # មថ. ១៩:៥; មក. ១០:៧,៨; ១ករ. ៦:១៦; អភ. ៥:៣១ ពអ៊ែ ឡើយ ឌី បនិះ កឡ ម៉ា វីះ តាក់ មឺគ បើគ ហ រ៉ិ គូ អរែង វ៉ា ទ្រី មិញ អ្មប្រា អ៊ែ ម៉ា កើត ចាក់ ដៃ កាស មូយ។ 
25អ៊ែ ចនែក អដាម វ៉ា ទ្រី ហ ណាគ់ ហ្មប្រាត មិៗ តា ប៊ិច ណោះ ឆក កូត អ៊ឺម។ 

Evidențiere

Partajează

Copiază

None

Dorești să ai evidențierile salvate pe toate dispozitivele? Înscrie-te sau conectează-te

YouVersion folosește cookie-uri pentru a îți personaliza experiența. Prin utilizarea site-ului nostru web, accepți utilizarea cookie-urilor așa cum este descris în Politica noastră de confidențialitate