मर्कूस 4
4
बीया बुउइयक बारेम आहान
मत्ती १३:१-९; लूका ८:४-८
1फेदोस्र येशू गालील समुद्रक ढिक्वम मनैन सिखाइलग्ल। उ ठाउँम धेर मनैन्हक भीड जम्मा हुइल्। उहओर्से येशू लाऊम चिहुर्ल, ओ मनैजुन समुद्रक ढिक्वम रलह।#लूक ५:१-३ 2उ ठाउँम येशू मनैन धेर आहानम असिक सिखाइलग्ल:
3“सुनो! एकठो किसान बीया ब्वाय निक्रल्। 4बुइटीबुइटी आकुर बीया डगरिम परल, ओ चिरैँचुरुङ्गन आक खाडर्ल। 5आकुर बीया पत्थ्राहा जग्गम परल, जहाँ धेर माटी नैरह। उहओर्से उ बीया झट्ट जामल्। 6तर घामकमार उ झट्टहेँ सुख्गैल्, काकरकि वाकर जर टरसम जाइ नैस्याकल। 7आकुर बीया कँटाहा जग्गम परल। उ बीया जम्ना त जामल, जम्लसे फे काँटकमार, उटमुटाक बाह्र नैपाइल। उहओर्से उहिँम फारा नैफरल। 8तर आकुर बीया मलगर जग्गम परल। उ बीया जामल, बाह्रल, ओ तीस गुणा, साठी गुणा, ओ सय गुणासम फरल।” 9अन्तम येशू कल, “ज्याकर सुन्ना कान बा, यी बात उह बुझी।”
आहानक उद्देश्य
मत्ती १३:१०-१७; लूका ८:९-१०
10जब येशूकसँग बाह्र जन चेलावँ ओ गोटगाट और जन केल रलह, तब हुँक्र उहाँह आहानक बारेम पुछ्ल। 11तब येशू हुँकन कल, “टुँहन परमेश्वरक राज्यक बारेम प्रकट नैहुइल् बात बुझ्ना मौका देगैल् बा। तर म्वारम विश्वास नैकर्ना मनैनभर, मै आहानम केल सिखैठुँ, 12ताकि धर्मशास्त्रम लिखल बात पूरा ह्वाए:
‘हुँक्र हेर्ना त हेर्ठ, तर देख्बो-देख्बो नैकर्ट।
हुँक्र सुन्ना त सुन्ठ, तर बुझ्बो-बुझ्बो नैकर्ट।
नकि त हुँक्र बुझ्नेरलह,
ओ आपन पापमसे घुम्क क्षमा पैनेरलह।’”#यशै ६:९-१०
आहानक अर्थ
मत्ती १३:१८-२३; लूका ८:११-१५
13“टुह्र म्वार कहल यी आहानक अर्थ नैबुझ्टो कलसे, और धेर आहानक अर्थ झन् कसिक बुझ्बो? 14बीया बुउइया किसान कलक परमेश्वरक वचन प्रचार करुइया हुइट। 15डगरिम पर्ना बीया कलक ओसिन मनै हुइट: हुँक्र वचन सुन्ठ, तर सुन्टीकि, शैतान आक हुँकन्हकमसे वचन लैजिठा। 16अस्तक पत्थ्राहा जग्गम परल बीया कलक ओसिन मनै हुइट: हुँक्र जब वचन सुन्ठ, तब खुशीसे ग्रहण कर्ठ। 17तर हुँक्र वचनह आपन मनम गहिँरसम जर ट्याक नैदेट। उहओर्से हुँक्र टनिक दिनसम केल विश्वास कर्ठ। सतावट या समस्या अइटीकि ढलजैठ। 18कँटाहा जग्गम परल बीया कलक ओसिन मनै हुइट: हुँक्र वचन सुन्ठ, 19तर पाछ जीवनक बारेम चिन्ता, मनैन लोभैना धनसम्पत्ति, ओ और चिजिक ल्वाभलालचले वचनह उट्मुटादेठा। उहओर्से हुँकन्हकम फारा नैफरट्, 20तर मलगर जग्गम परल बीया कलक ओसिन मनै हुइट: हुँक्र वचन सुन्क ग्रहण कर्ठ। हुँक्र मलगर माटीअस कुई तीस गुणा, कुई साठी गुणा, ओ कुई सय गुणा फारा फरैठ।”
दियक आहान
लूका ८:१६-१८
21 #
मत्ती ५:१५; लूक ११:३३ तबदोस्र येशू कल, “कौनोजन दिया बार्क पाथीले छोप्ठ या खट्टेक टर ढर्ठ का? दिया बार्क त सामदानम पो ढैजिठा।#४:२१ दिया: येशू सायद आपन वचनह दिया कहट। (भजनसंग्रह ११९:१०५ म उहाँक वचनह दिया कैगिल् बा)। 22नुकाक ढैल् सब चिज छर्लङ्ग देखपर्नेबा। गोप्यम रहल सब बात खुलस्त पारजैनेबा।#मत्ती १०:२६; लूक १२:२ 23ज्याकर सुन्ना कान बा, यी बात उह बुझी।”
24येशू फेदोस्र हुँकन कल, “म्वार बातम ध्यान देओ। जौन नापले टुह्र देबो उह नापले पैबो। टुँहन आउर धेर देजिनेबा।#मत्ती ७:२; लूक ६:३८ 25ज्याकरठे बा, ओहीह आउर धेर देजाई, ओ ज्याकरठे नैहो, वाकरठे रहल डान्चे फे अछिन्जाई।”#मत्ती १३:१२; २५:२९; लूक १९:२६
जम्ना बीयक आहान
26येशू फेदोस्र आहानम कल, “परमेश्वरक राज्य असिन हो: एकठो मनैया आपन जग्गम बीया बुइठा, 27ओ उ मनैया चाह सुत, चाह उठ, चाह दिनभर और कुछु काम कर, उ बीया अपन्हे जम्ठा ओ बहर्ठा। तर कसिक बहर्ठा कैक उ मनैया नैजानट्, 28काजेकलसे जग्गा अपन्हे बाली फरैठा: पैल्ह अँख्वैठा ओ जम्ठा, दोस्र पत्या लग्ठा, ओ बाल निक्रठा, तब बालम पूरा गुडा भर्ठा ओ पक्ठा। 29जब बाली पक्ठा, तब उ मनैया हँस्यले बाली काट भिर्ठा।”#योए ३:१३
राईक दानक आहान
मत्ती १३:३१-३२; लूका १३:१८-१९
30येशू भीडक मनैन कल, “मै, परमेश्वरक राज्य कसिन चिजसे तुलना करुँ? कौन आहानम याकर बयान करुँ? 31जसिन कि जग्गम बोजैना बीयामध्येम राईक दाना सबसे छुटी रठा, 32तर उ दाना बारीम बुइना हो कलसे सागपातमध्येम सबसे ढ्याङ ओ झङ्ल्यार हुइठा। वाकर डैँह्यक छैँह्यम चिरैँचुरुङ्गन बैस्ठ ओ ठाँट लगैठ।”
33हुँकन्हक बुझ्ना क्षमता अनुसार येशू हुँकन आउर फे धेर बात आहानम सिखैटीरल। 34हुँकन सिखाइबेर, येशू जब फे आहानम ब्वालँट्, तर आपन चेलन्हकठे भर, सक्कु आहानक अर्थ खोलदेहँट्।
आँधीबौखह ठम्हैलक
मत्ती ८:२३-२७; लूका ८:२२-२५
35उह दिन सन्झ्याक येशू आपन चेलन कल, “आब हम्र समुद्रक उपार जाई।” 36येशू ओ चेलावँ मनैन्हक बगालमसे विदा हुइल। जौन लाऊम येशू रलह, उह लाऊम चेलावँ फे चिहुर्ल ओ समुद्रक उपार जाइलग्ल। औरजन्हक लाऊ फे उहाँहुँकन्हक सँगसँग गैलन। 37तब जाइबेर, एकचोट्टे समुद्रम बराभारी आँधीबौखा आइलागल, ओ पानीक छल्का लाऊह धक्का देहलागल। यिहाँसम कि लाऊ पानीले भर लागल ओ बुर्नाअस करलागल। 38येशूजुन सिह्रनी लेक लाऊक पाछक भागम निन्दाइल रलह। चेलावँ डरले हड्बडैल ओ येशूह असिक कह्टी उठैल, “गुरुजी, हम्र बुरलग्ली। का अप्न हमार वास्ता नैकर्टी?”
39तब येशू उठ्क आँधीबौखह हप्कैल ओ छल्कह कल, “ठम्जा! शान्त हो!” अत्रा कह्टीकि, आँधीबौखा ठम्ह्गैल्, ओ जातसे शान्त होगैल्।
40दोस्र येशू चेलन कल, “टुह्र काकर असिक डरैठो? का आम्ही फे म्वारम टुन्हक विश्वास नैहो?”
41तब हुँक्र जातसे डरागैल ओ अप्न-अप्न कहलग्ल, “यी कसिन मनै हुइट? आँधीबौखा ओ छल्का समेत हिँकहार कहल मन्ठ।”
Selectat acum:
मर्कूस 4: thl
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
© 2020, Wycliffe Bible Translators, Inc. All rights reserved.
