यूहन्‍ना 17

आपन लाग येशूक प्रार्थना

1यी बात कैक सेक्‍ल त, येशू स्‍वर्गओर हेर्ल ओ प्रार्थना कर्ल,

“बाबा, आब समय पुगरहल। मै अप्‍नक छावा अप्‍नक महिमा प्रकट कर सेकूँ कैक म्‍वार महिमा प्रकट कैदी। 2काकरकि अप्‍न महीह सारा मनैन्‍हकम अधिकार देरख्‍ली, ताकि अप्‍न महीह जौन-जौन मनै देरख्‍ली, हुँक्र सबजहन मै अनन्‍त जीवन देह सेकू। 3अनन्‍त जीवन यिह हो, अप्‍न एक्‍कठो सत्‍य परमेश्‍वरह चिह्‍न्‍ना, ओ अप्‍नक पठाइल येशू ख्रीष्‍टह चिह्‍न्‍ना हो। 4अप्‍न महीह जिम्‍मा देहल काम पूरा कैक मै अप्‍नह पृथ्‍वीम उच्‍च पाररख्‍नु। 5बाबा, संसारक सृष्‍टि हुइनासे आघ अप्‍नक सामुन्‍नेम म्‍वार जौन महिमा रह, आब उह महिमा आपन सामुन्‍नेम महीह दी।

चेलन्‍हक लाग येशूक प्रार्थना

6संसारमसे अप्‍न महीह देहल मनैन मै अप्‍नह चिह्‍नादेरख्‍नु। हुँक्र अप्‍नक रलह ओ अप्‍न जो महीह देलही। हुँक्र अप्‍नक वचन पालन कैरख्‍ल। 7अप्‍न महीह देहल सब बात अप्‍नसे जो आइल हो कना बात आब हुँकन थाहाँ बाटन। 8काकरकि अप्‍नक देहल वचन मै हुँकन देरख्‍नु ओ हुँक्र उ वचन स्‍वीकार फे कैरख्‍ल। मै अप्‍नकठेसे अइनहुँ कना बात हुँक्र जाट्‌टीसे बुझरख्‍ल। ओ अप्‍न जो महीह पठैलही कैक हुँक्र विश्‍वास कैरख्‍ल। 9मै हुँकन्‍हक लाग प्रार्थना करटुँ, मै संसारक लाग प्रार्थना नैकरठुइटुँ, तर अप्‍न महीह देहल मनैन्‍हक लाग प्रार्थना करटुँ, काकरकि हुँक्र त अप्‍नक हुइट। 10म्‍वारठे रहल सब अप्‍नक हुइट ओ अप्‍नकठे रहल सब म्‍वार हुइट। हुँकन्‍हकम म्‍वार महिमा प्रकट होरहल।

11आब मै अप्‍नकठे घुम्‍क अइम, मै संसारम धेर रहुइया नैहुइटुँ, तर हिँक्र त संसारम पलरहुइयाबाट। हे पवित्र बाबा, अप्‍न ओ मै एक रहलअस हिँक्र फे एक हुइहीँ कैक आपन नाउँक शक्तिले हिँकन्‍हक सुरक्षा करी, जौन नाउँ अप्‍न महीह देली। 12हिँकन्‍हकसँग रहट्‍सम मै अप्‍नक नाउँक शक्ति पाक हिँकन्‍हक सुरक्षा कर्नु। हिँक्रमध्‍ये नाश हुइपर्ना मनैयह बाहेक मै और कौनोजहन फे नाश हुइ नैदेनु, काकरकि धर्मशास्‍त्रम लिखल वचन पूरा हुइपर्ना आवश्‍यक रह।#भज ४१:९; यूह १३:१८

13तर आब मै अप्‍नकठे घुम्‍क आइक लाग बाटुँ। हिँक्र म्‍वार आनन्‍दले भरिपूर्ण हुइहीँ कैक मै यी बात संसारम रहलम जो कटिबाटुँ। 14मै हुँकन अप्‍नक वचन देनु। मै यी संसारक नैरहलअस, हिँक्र फे यी संसारक नैहुइट। उहओर्से संसारक मनै हिँकन हेल्‍हा कर्ठ। 15अप्‍न हिँकन संसारमसे लैजाइ कैक नाहीँ, तर हिँकन दुष्‍टसे रक्षा करी कैक मै बिन्‍ती करटुँ। 16मै यी संसारक नैरहलअस, हिँक्र फे यी संसारक नैहुइट। 17हिँकन अप्‍नक सेवा करक लाग सत्‍यद्वारा पवित्र बनाई, अप्‍नक वचन सत्‍य बा। 18अप्‍न महीह संसारम पठाइलअस, मै फे हिँकन संसारम पठारख्‍नु। 19हिँक्र आपन जीवन अप्‍नह पूरा रूपले सुम्‍पसेकहीँ कैक मै आपन जीवन अप्‍नह सुम्‍पटुँ।

विश्‍वासीन्‍हक लाग येशूक प्रार्थना

20मै हिँकन्‍हक लाग केल नाहीँ, तर हिँकन्‍हक वचनक कारण म्‍वारम विश्‍वास कर्ना मनैन्‍हक लाग फे प्रार्थना करटुँ। 21हुँक्र सबजन एक हुइहीँ कैक मै प्रार्थना करटुँ। बाबा, अप्‍न म्‍वारम ओ मै अप्‍नकम रहलअस हुँक्र फे हमारम रह्‍हीँ ओ अप्‍न महीह पठैलही कैक संसार बुझ सेकी। 22अप्‍न ओ मै एक रहलअस, हुँक्र फे एक हुइहीँ कैक अप्‍न महीह देहल महिमा मै हुँकन देरख्‍नु। 23मै हुँकन्‍हकम बाटुँ ओ अप्‍न म्‍वारम बाटी। आब हुँक्र पूरा रूपले एक हुइहीँ ओ अप्‍न महीह पठैलही कना बात, ओ अप्‍न महीह प्रेम करलअस हुँकन फे प्रेम कर्ठी कना बात संसार जान सेकी।

24बाबा, अप्‍न महीह देहल मनै म्‍वारसँग रह्‍हीँ ओ अप्‍न महीह देहल महिमा हुँक्र देखहीँ कना म्‍वार इच्‍छा बा, जौन महिमा संसारक सृष्‍टि हुइनासे आघहेँसे अप्‍न महीह प्रेम कर्लक कारण अप्‍न महीह देलही।

25हे सत्‍य न्याय कर्ना बाबा, संसार अप्‍नह नैचिह्‍नट्‍, तर मै अप्‍नह चिन्‍ठुँ ओ अप्‍न जो महीह पठैलही कैक हिँक्र जन्‍ठ। 26मै हुँकन्‍हक बीचम अप्‍न के हुइटी कैक अप्‍नह प्रकट कर्नु ओ आम्‍ही फे प्रकट कर्टीरहम, ताकि अप्‍न महीह करल प्रेम हुँकन्‍हकम फे पलरहहीन, ओ मै फे हुँकन्‍हकम पलरहम।”

Selectat acum:

यूहन्‍ना 17: thl

Evidențiere

Copiază

Compară

Împărtășește