१ कोरिन्थी 11
11
1मै ख्रीष्टक देखासिकी करलअस टुह्र म्वार देखासिकी करो।#१ कोर ४:१६; फिलि ३:१७
आराधना सम्बन्धी निर्देशन
2टुह्र सड्डभर महीह सम्झलक ओ म्वार सिखाइल शिक्षा मन्लकओर्से मै टुन्हक प्रशंसा कर्ठुं।
3तर टुह्र का जानल मै चहठुँ कलसे, हरेक मनैयक शिर ख्रीष्ट हुइट। गोसिन्येक शिर हुँकहार गोस्या हुइट, ओ ख्रीष्टक शिर परमेश्वर हुइट। 4आपन कपार छोप्क प्रार्थना कर्ना या अगमवाणी बोल्ना मनैया आपन शिर ख्रीष्टक बेइज्जत कर्ठ। 5आपन कपार बिना छोप्ल प्रार्थना कर्ना या अगमवाणी बोल्ना जन्नीमनैया आपन गोस्यक बेइज्जत कर्ठी। उ त हुँकहार लाग कपार खौरल बराबर हो। 6यदि कौनोजन्नीमनैया आपन कपार नैछोप्टी कलसे, ऊ आपन भुत्ला काट पर्ठा। तर यदि भुत्ला कटैना या खौरैना जन्नीमनैयक लाग शर्मक बात हो कलसे, ऊ आपन कपार छ्वाप पर्ठा।
7पुरुष मनैया आपन कपार छ्वाप नैपरट्, काकरकि ऊ परमेश्वरक स्वरूप ओ गौरव हो, तर जन्नीमनैया आपन गोस्यक गौरव हो।#उत १:२६-२७ 8काकरकि पैल्ह पुरुष जन्नीमनैयकमसे सृष्टि कैगिल् नैहो, तर जन्नीमनैया पुरुषमसे सृष्टि कैगिल् हो।#उत २:१८-२३ 9पुरुष जन्नीमनैयक लाग सृष्टि कैगिल् नैहो, तर जन्नीमनैया पुरुष मनैयक लाग सृष्टि कैगिल् हो। 10यी कारण ओ स्वर्गदूतन्हक कारण जन्नीमनैया आपन गोस्यक अधीनम बाटुँ कैक देखाइक लाग आपन कपार छ्वाप पर्ठा।
11तर फे प्रभुक सामुन्नेम गोस्यक लाग गोसिन्या, ओ गोसिन्यक लाग गोस्या आवश्यक बा। 12काकरकि पैल्ह जन्नीमनैया पुरुषमसे बनल हो, तर हरेक पुरुष जन्नीमनैयकमसे जन्मठ। ओ सब चिज सृष्टि करुइया परमेश्वर जो हुइट। 13टुह्र अपन्हे विचार करो, का जन्नीमनैया आपन कपार बिना छोप्ल परमेश्वरह प्रार्थना कर्ना सुहैठा? 14पुरुष नम्मा भुत्ला पालल् कलसे, उ वाकर लाग शर्मक बात हो कैक टुह्र स्वाभाविक रूपले नैजन्टो का? 15नम्मा भुत्ला रना त जन्नीमनैयक लाग गौरवक बात नैहो का? काकरकि नम्मा भुत्ला कपार छ्वापक लाग हुँकहीन देगैल् हो। 16तर यदि कुई यी विषयम वाद-विवाद कर चहठा कलसे, यी बाहेक हमार और चलन नैहो, ओ परमेश्वरक और मण्डलीन्हक फे यहीसे फरक चलन नैहुइटन।
प्रभुभ्वाज
17आब मै टुँहन और बातक निर्देशन देहबेर मै टुन्हक प्रशंसा कर नैसेक्टुँ। काकरकि आराधना सेवम टुह्र असलसे धेर खराबी कर्ठोजसिन लग्ठा। 18पैल्ह बात, टुह्र मण्डलीम भेला हुइठो त टुन्हक बीचम फूट हुइठा कैक मै सुन्ठुँ, ओ कुछ मात्रम महीह विश्वास फे लग्ठा। 19टुह्रमध्ये ठीक मनै चिह्न्जाइक लाग टुन्हक बीचम फूट हुइना जरुरी फे बा। 20टुह्र भेला हुइठो त, प्रभुभ्वाजक नाउँ पार्क खैलसे फे, उ प्रभुभ्वाज नैरहट्। 21काकरकि टुह्र आपन आनल खैना चिज आपनऽ सुरम खाइ भिर्जैठो। कत्रा जन भुँख्ल रठ, ओ कत्रा जनजुन मत्वार रठ। 22टुह्र आपनऽ घरम खानपिन कर्लसे नैहुइट् का? कि टुह्र परमेश्वरक मण्डलीह तुच्छ सम्झठो? कुछु नैरहल मनैन लाजम पार खोज्ठो? याकर बारेम मै टुँहन का कहुँ? का मै टुन्हक प्रशंसा करुँ? अहँ, याकर लाग मै टुन्हक प्रशंसा कर नैसेक्टुँ।
23काकरकि मै प्रभुसे पाइल शिक्षा टुँहन सुम्पदेरख्नु। प्रभु येशू पक्राउ पर्लक रात उहाँ रोटी लेल, 24ओ परमेश्वरह धन्यवाद देल ओ रोटी खन्टाक कल, “टुन्हक लाग देगैल् यी म्वार शरीर हो, म्वार सम्झनम असिक कर्टीरहहो।” 25ओसहेँक, रोटी खाक सेक्ल त उहाँ अङ्गूरिक मद रहल खोर्या लेक कल, “यी म्वार रगतम बाहान्गैल् लौव बाचा हो। जब-जब टुह्र यी पिबो, म्वार सम्झनम पिहो।”#प्रस २४:६-८; यर ३१:३१-३४ 26याकर मतलब जब-जब टुह्र यी रोटी खैबो ओ यी खोर्यमसे पिबो, हरेक फ्यारा टुह्र प्रभु नैआइट्सम उहाँक मृत्युक प्रचार कर्बो।
27उहओर्से बेठीक हिसाबले प्रभुक रोटी खउइया ओ प्रभुक खोर्यमसे पिउइया प्रभुक शरीर ओ रगतक विरोधम पाप करल हुउइया बा। 28यी रोटी खैनासे ओ खोर्यमसे पिनासे आघ हरेक जन, मै का करटुँ कैक होसियारसे सोचविचार करपर्ठा। 29काकरकि यी रोटी खैना ओ खोर्यमसे पिना मनैया प्रभुक शरीरह आदर नैदेक खैलक ओ पिलक कारणले आपनम दण्ड अनुइया बा। 30उहओर्से टुह्रमध्ये धेर जन कमजोर ओ रोगी बाटो, ओ कत्रा जन त मु फे गैल। 31यदि हम्र खैनासे आघ होसियारसे सोचविचार कर्ली कलसे, हम्र दण्डम पर्ने नैहुइटी। 32तर प्रभु जब हमन सजाय देठ, उ त हमन सुधार करक लाग अनुशासन सिखैलक हो, ताकि हम्र संसारक मनैन्हक सँगसँग दोषी नैठह्राजैबी।
33उहओर्से म्वार भैयौ, टुह्र प्रभुभ्वाज खाइ लग्बो त, एक-औरजहन अश्या लगहो। 34यदि टुह्र भुँखाइल बाटो कलसे, आपन घरम खाइसेक्ठो। तब टुह्र प्रभुभ्वाज खाइ लग्बो त, दोषी नैठह्राजैबो।
और बातक बारेम मै टुन्हकठे अइम त निर्देशन देहम।
Selectat acum:
१ कोरिन्थी 11: thl
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
© 2020, Wycliffe Bible Translators, Inc. All rights reserved.