ЭхкъечӀун 25
25
Гьалтунин Алачух патал садакьаяр
(ЭхкъечӀун 35:4-9)
1Реббиди Мусадиз лагьана: 2«Исраилдин рухвайриз Зун патал садакьаяр кӀватӀ авун патал эмир це: гьар садан рикӀиз низ вуч кӀанзаватӀа, гьам гурай. 3Ихьтин садакьаяр кӀватӀ ая: къизил, гимиш, буьруьнж, 4вили, мичӀи яру ва икьи яру рангунин гъалар, кьелечӀ куш ва цӀегьрен сар, 5гьерен табагъ авур хамар ва гьуьлуьн кицӀин хъицикьар, акӀаж кӀарас, 6чирагъар патал зейтундин чӀем, гуьцӀун ва кун патал гъиликдай ягъадик кутадай хуш ни галай шейэр, 7чпелди чухва ва хуруган чӀагурун патал шагьам къванер ва къерехра твадай багьа къашар. 8Исраилдин рухвайри Зун патал ибадатхана эциграй, ва Зун гьабурун арада аваз жеда. 9Куьне ибадатхана ва ана жедай вири затӀар дуьм-дуьз За ваз къалурдай тегьерда туькӀуьрун лазим я».
Икьрардин сандух
(ЭхкъечӀун 37:1-9)
10Реббиди давамарна: «АкӀаж кӀарасдикай кьведни зур кьуьнтуьн яргъи, садни зур – гьяркьуьвал ва садни зур кьакьанвал алай сандух туькӀуьр авурай. 11Ам къенепатайни къецепатай михьи къизилдалди кӀев ая ва къерехдай фенвай къизилдин цӀарцӀелди яхъ.
12Къизилдикай кьуд гьалкъа ая ва абур сандухдин кьуд кӀвачик кукӀур ая: кьвед – сандухдин са патахъай, кьведни – муькуь. 13АкӀаждикай паяяр гьазура, абур къизилдалди кӀева 14ва ам, паяйрихъ акална тухун патал, сандухдин кьве патахъайни галай гьалкъайрай суха. 15И паяяр сандухдин гьалкъайра датӀана туна кӀанда – абур анрай акъудна виже къведач. 16Сандухда вуна За вав вугудай Икьрар кхьенвай къванер эцигда.
17Сандухдиз кьве кьуьнтни зур яргъивал алай ва садни зур гьяркьуьвал алай, „Гунагьар алудзавай чка“ лугьудай михьи къизилдин къапсах гьазура. 18Къапсахдин кьве къерехдал къизилдикай гатанвай кьве херупӀ туькӀуьра: 19сад са къерехдихъай, муькуьди – маса. Абуру къапсахдихъ галаз чӀур тежедай битаввал арадал гъун лазим я. 20Сад садан чина акъвазна ва къапсахдиз килигиз, абуру адан винел чпин лувар экӀягъун лазим я.
21Къапсах сандухдин винел эциг ва адан къенени За вав вугудай Икьрар эциг. 22Анал, сандухдин къапсахдин винел, кьве херупӀдин арада, валай Исраилдин рухвайрив Жуван тӀалабунар агакьарун патал вахъ галаз чин-чинал акъваздай вахтунда, Зун жеда».
Реббидин вилик жедай фу эцигун патал экӀягъан
(ЭхкъечӀун 37:10-16)
23Реббиди давамарна: «АкӀаж кӀарасдикай кьве кьуьнт яргъивал алай, са кьуьнт гьяркьуьвал алай ва садни зур кьуьнт кьакьанвал алай экӀягъан раса. 24Ам михьи къизилдалди кӀева ва къерехдай фенвай къизилдин цӀарцӀелди яхъ. 25Адан къерехар тирвал са капан юкьван кьакьанвал алаз цал хкажа ва и цал къизилдин цӀарцӀелди яхъ. 26-27ЭкӀягъандин чка дегишун герек атай чӀавуз абурай паяяр сухун патал къизилдин кьуд гьалкъа ая ва абур экӀягъандин кьуд пипӀик кӀвачерин винелай кукӀура. Гьалкъаяр къерехра хьун лазим я. 28ЭкӀягъан ялун патал акӀаждикай паяяр раса ва абур къизилдалди кӀева. 29Михьи къизилдикай курар, кавчаяр ва къурбанддин иличунар патал гичинарни жемер туькӀуьра. 30И экӀягъандал вуна, Зи вилик жедайвал, ара датӀана фу эцигун лазим я».
Чирагъган
(ЭхкъечӀун 37:17-24)
31Реббиди давамарна: «Михьи къизилдикай гатанвай чирагъган раса. Адан танди, хилери ва къабухри – къабухрин пунари ва цуькведин пешери – сад тир битаввал арадал гъун лазим я. 32Чирагъгандал ругуд хел хьана кӀанда: пуд са патахъай, пудни – муькуь патахъай. 33Ругуд хилекай гьар садал бадамдин цуьк хьтин, пун ва цуькведин пешер квай, пуд къабух алайди. 34Чирагъгандал вичел лагьайтӀа, бадамдин цуьк хьтин, пун ва пешер ва пешер квай, кьуд цуьк алайди. 35Хилерин сад лагьай жуьтуьнин кӀаник – къабухдин бине, кьвед лагьай жуьтуьнин кӀаникни – къабухдин бине; пуд лагьай жуьтуьнин кӀаникни – къабухдин бине; гьа икӀ вири ругуд хилен кӀаникни хьунухь лазим я. 36Гьам къабухрин бинейри, гьам хилери – чирагъгандихъ галаз санал сад тир битаввал арадал гъун лазим я; вири гатанвай михьи къизилдикай расна кӀанда. 37Ирид чирагъ расна абур адан вилик квай мензил экуь авун патал чирагъгандал эциг. 38Багъар патал хехер ва хекендазар михьи къизилдинбур хьана кӀанда. 39Чирагъган ва ам патал герек вири шейэр туькӀуьрун патал михьи къизилдин са киккар ахъая. 40Килиг гьа, вири ваз дагъдал къалурай тегьерда дуьм-дуьз ая».
Selectat acum:
ЭхкъечӀун 25: ЛезПК
Evidențiere
Împărtășește
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2010-2024