Паччагьлугъар-4 7
7
1Амма Элиш пайгъамбри гъапнийи:
– РАББИЙИН гафнахъ хъебехъ. РАББИЙИ гьамци кӀура: «Закур гьаму вахтназ Самарияйин урнарихъ ужубсиб хюйин сат#7:1 Сат: тахминан 10 килограмм. саб шекел#7:1 Саб шекел: тахминан 11 грамм. арснахъ ва кьюб сат мух саб шекел арснахъ масу тувди».
2Израилин паччагьдин хъугъвал али гъуллугъчийи Заанурин инсандиз гъапнийи:
– Хъебехъ, гьятта РАББИЙИ заварин унчӀвар арццну, мархь гъубгъишра, думу ляхин мукьан ухди хьуз мумкин дар!
– Увуз думу ляхин яв улариинди рябкъидивуз, амма ипӀидарва! – жаваб тувнийи Заанурин инсанди.
Кьялаъ аувалин аьхир
3Шагьрин урнарин улихь юкьур гъидкьин уьзур кайидар хьади гъахьнийи. Дурари сари сарикна гъапнийи:
– Ухьу мушвахь гьаз деъру ва аьжлиз ккилигуру? 4Эгер ухьу шагьриз гъушиш, душваъ гаш абхъна, ва ухьу кечмиш хьиди. Мушвахь ухьу гъузишра, ухьу кечмиш хьиди. Гъачай, арамарин бинайиз гъягъюхьа ва йисирвалиъ учӀвхьа. Эгер дурари ухьуз рягьим гъапӀиш, чӀивиди гъузидихьа, хъа дарапӀиш, кечмиш хьидихьа.
5Лавландин вахтна мурар гъудужвнийи ва арамарин бинайиз гъушнийи. Дурар бинайин гъирагъдихъна хъуркьиган, душваъ фужкӀа адайи. 6Гьаз гъапиш, Раббийи арамариз дявдин фургънарин, гьяйвнарин ва зурба кьушмин сесер ерхьруганси гъапӀнийи. Арамари сари сарикна гъапнийи:
– Му, ухьʼин алархьбан бадали, Израилин паччагьди хетт ва египет паччгьар пулихъ дидисна!
7Чадрар, гьяйвнар ва дажйир дирчну, арамар лавландин вахтна гьергнийи. Дурари бина чан айиганси дипнийи, ва дурар гьергбиинди къутармиш гъахьнийи.
8Гъидкьин уьзур кайидар бинайихъна хъуркьнийи ва чадрарикан сабдикк ккучӀвнийи. Дурари ацӀайизкьан гъипӀнийи, гъубхънийи ва душвккан, арс, гъизил ва палтар хьади, гъушнийи. Дурар жин гъапӀнийи. Хъасин дурар кьяляхъ гъафнийи ва жара чадрикк ккучӀвнийи, душвкканра фу-вуш гъадабгъну, гъушнийи ва думура жин гъапӀнийи. 9Хъасин дурари сари сарикна гъапнийи:
– Ухьу дюз апӀурадархьа. Гъи ужудар хабрарин йигъ ву, хъа ухьу дурар ухьухь гъитрахьа. Ухьу ахсрар ккивайиз ккилигиш, ихь тахсир хьибди. Гьамусяаьт гъягъидихьа ва му ляхникан паччагьдин гъалайиъ хабар тувдихьа.
10Дурар гъушнийи, шагьрин урнарихъ хъайи гъаравлариз дих гъапӀнийи ва дурариз гъапнийи:
– Учу арамарин бинайиз гъушунча, хъа душваъ фужкӀа рякъюрадар, саринра сес адар, анжагъ гьяйвнар ва дажйир китӀна, чадрар чпин айиганси ими.
11Урнарихъ хъайи гъаравлари дидкан паччагьдин гъалайиъ хабар дебккнийи. 12Паччагь йишвну гъудужвнийи, ва дугъу чан багахь гъуллугъ апӀурайидариз гъапнийи:
– Арамари фу гъапӀнуш, узу учвуз пидиза. Ухьуз гашди вуйивал дурариз аьгъя, гьаддиз дурар бинайиан удучӀвну ва чюлиъ жин гъахьну. Дурари фикир апӀура: «Израилар шагьриан удучӀвиди, ухьу дурар чӀивиди дисидихьа ва шагьриъ учӀвидихьа».
13Паччагьдин багахь гъуллугъ апӀурайидарикан сари гъапнийи:
– Мушваъ гьеле сагъди гъуздарра, гьамусдиз гъийихдарси, йихиди аьхир. Гъит, имбу гьяйвнарикан хьуб гьяйвниинди гъарахри ва, фу дубхьнаш, аьгъю апӀри.
14Израилари кьюб дявдин фургъун ва гьяйвнар гьязур гъапӀнийи, ва паччагьди дурар Арамдин кьушмин кьяляхъди гьаънийи. Фургъунчйириз дугъу амур гъапӀнийи:
– Гъарахай ва, фу гъабхьнуш, аьгъю апӀинай.
15Дурар Арамдин кьушмин шилариъди тап Ярдан нирихъна гъушнийи. Дурариз вари рякъюъ арамарин чиб лап гьялакди гьергруган дирчу гизаф палтар ва жара герек вуйи шейʼар гъяркънийи. Гьаънайидар кьяляхъ гъафнийи, ва дурари чпиз гъябкъюбдикан паччагьдиз хабар тувнийи. 16Халкь шагьриан удубчӀвнийи ва арамарин бина тӀараш гъапӀнийи. РАББИЙИН гафнаъ дупнайиганси, саб сат ужубсиб хю саб шекелихъ ва кьюб сат мух саб шекелихъ масу тувуз хъюгънийи. 17Хъа паччагьди чан хъугъвал али гъуллугъчи шагьрин урнарихъ къайда уьбхрурди дерккнийи, ва душвахъ инсанарин дестейи думу ликариккан гъапӀнийи. Душвахь думу кечмиш гъахьнийи. Му ляхин, паччагь чахьна гъафиган, Заанурин инсанди гъапиганси гъабхьну. 18(Заанурин инсанди думуган гъапнийи: «Закур гьаму вахтназ Самарияйин урнарихъ ужубсиб хюйин сат саб шекелихъ ва кьюб сат мух саб шекелихъ масу тувиди». 19Хъа думу гъуллугъчийи Заанурин инсандиз гъапнийи: «Хъебехъ, гьятта РАББИЙИ заварин унчӀвар арццну, мархь гъубгъишра, думу ляхин мукьан ухди хьуз мумкин дар!» Думуган Заанурин инсанди жаваб тувнийи: «Увуз думу ляхин яв улариинди рябкъидивуз, амма ипӀидарва!») 20Дугъʼин гьациб ляхин улубкьнура вуйи: инсанарин дестейи думу урнаригъ ликариккан гъапӀнийи, ва думу кечмиш гъахьнийи.
Selectat acum:
Паччагьлугъар-4 7: ТабГК
Evidențiere
Împărtășește
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2010, 2013, 2016, 2018, 2023