Versete biblice populare din Wiripu 2

Împărtășește

Uiwyriaꞌin yt naku i yt ehegyiꞌat i rakaria ewy eweikupteꞌen. Yt ewetunug teiꞌo -Uito poꞌog eiꞌe hamuat hap neꞌi are. Yt ewetunug neiꞌo -Uito poꞌog e hatno. Poꞌog waku watoineꞌen kurin hatno kahato iraniaꞌin motypot hamo. Yt eweiꞌe teiꞌo eipyꞌa pe -Uito poꞌog mekewat miit kai yt eweiꞌe teiꞌo eiwoꞌope e. Yt erewanetup kaꞌap teiꞌo eimikyꞌesat nug hap kape eimikyꞌesat koꞌi ete. Poꞌog waku watuwanetup aat kaꞌap iraniaꞌin mikyꞌesat nug hap ete.

Poꞌog waku aiwanetup hap Aikaꞌiwat Iesui wanetup hap ewy katupono tuwemohit kahato ihakyꞌeꞌi kahato miit emiit no topyhuꞌat.

Tupana wo toineꞌen Iesui pykai tuwemohit. Saꞌawyꞌi wuat eꞌyian mete toineꞌen Tupana wo. Miꞌi pykai tuwemohit. Tuut ahowawi hawyi yt toꞌe i -Arenug Uito mesuwe Tupana wo yt e i Tupana raꞌyn pykai. Miꞌi hawyi tuwepyi totiat yne mekewat tuweTupana hap koꞌi hawyi tuwemohit miitꞌin eropat hatno. Tuwenug miit no miit sese wo topyhuꞌat. Aipiit ewy kahato topyhuꞌat. Iesui yt tuwemowato hin i maꞌato karãpe Tupana toꞌe -Atikyꞌesat ekuꞌuro hap miitꞌin ehakyeraꞌat hamo miꞌi hawyi toiwesat -Waku Papai e yt tomikyꞌesat ewywuat pykai i. Maꞌato -Atikyꞌesat ekuꞌuro hap ariaꞌyp posak ete e Tupana hawyi -Atunug aru Papai e Iesui.

Are paĩ Tupana tikyꞌesat kahato watunug tomikyꞌesat ewywuat hap. Miꞌi pote ainapin aat kaꞌap aiwanetup hawe kat som kat som waku watunug hap. Karãpe aiwẽ pyi yt watunug neran i imikyꞌesat koꞌi miꞌi hawyi perupꞌi popuo aimuꞌe aiwanetup hawe -Etunug o etunug o e. Miꞌi hawyi meiũran -Waku Uhyt waku Mimi watoꞌe Tupana pe katupono toikyꞌesat kahato tehay upiat watuwat hap.

Tutunug Toꞌywot mikyꞌesat ewy miꞌi pote Tupana timowato kahato Iesui. Miꞌi hawyi iꞌewyte Iesui set toimowato. Miꞌi pote poꞌog yne set kai topyhuꞌat. Meiũran aru yne yne tuwepỹꞌãtutuk Uhaꞌyru kape e ti Tupana. Atipy piaria yne teꞌeruwepỹꞌãtutuk e Uhaꞌyru motypot hamo iꞌewyte yne yi totiaria teꞌeruwepỹꞌãtutuk imotypot hamo iꞌewyte yne yi ywytꞌokpypiaria teꞌeruwepỹꞌãtutuk Uhaꞌyru motypot hamo e ti Tupana. Miꞌi hap eꞌat pe yne yne toꞌe -Pywo ti pywo ti Iesui Tupana Mipoꞌoro Aiporekuat nuat Aikaꞌiwat koro wuat iꞌatuꞌe aru torannia. Tuwemohit kahato saꞌawyꞌi Iesui miꞌi pote ti aru Tupana timowato kahato Aikaꞌiwat. Mekewat eꞌat pe yne yne -Tupana iꞌatuꞌe Emipoꞌoro Aiporekuat nuat Aikaꞌiwat sese hap uruikuap taꞌyn iꞌatuꞌe. Uruimotypot kahato En iꞌatuꞌe. Uruꞌywot sese En iꞌatuꞌe aru. Maꞌato aito aikotã Iesui tuwemohit waku watuwemohit ewy are.

Karapeĩ watuwepotpap Tupana mikyꞌesat nug hap ete waku watuwat sese imikyꞌesat hap upi. Yt naku i watoꞌe -Emikyꞌesat koꞌi yt atikyꞌesat i yt naku i watoꞌe. Iꞌewyte yt naku i watuꞌuka miitꞌin ete are. Karãpe watunug Tupana mikyꞌesat turan yt naku i watoꞌe tope -Yt atikyꞌesat i emikyꞌesat nug hap koꞌi yt naku i watoꞌe. Yt naku i watuꞌuka Tupana mikyꞌesat ete aipyꞌa pe aiwanetup hawe are. Maꞌato yne miꞌi tã imikyꞌesat ewy watunug mote Tupana mepytꞌin wakuaria wo watopyhuꞌat yt kat i saꞌag nug haria wo are. Aikotã aimepyt kurin kat yt tutunug kuap i saꞌag hap ewy watopyhuꞌat waku kape yn aiwanetup hap. Koitywy watoineꞌen yt naku i nug haria pyꞌasetpe iꞌewyte teꞌeruwanetup aat kaꞌap saꞌag nug hap ete yn. Miꞌiria tukupteꞌen aikotã iꞌypyryp we wãtym sese turan wuat ewy yt naku i nug haria yn miꞌiria pote. Maꞌato waku aito Iesui mohey haria waikiru koꞌi ewywuat watopyhuꞌat aikotã waikiru wãtym sese turan hẽtyhot rakaria ewy aikotã waikiru koꞌi aimuꞌe wãtym muo aikope muap toineꞌen aikope waku ahewyry. Miꞌi hap ewy waku watimoherep hoꞌowasat rakaria pe muap Tupana kapiat.

Uhekatuwyriaꞌin uimikyꞌeria kahato eipe. Saꞌawyꞌi areineꞌen eipyꞌasetpe eimuꞌe hamo. Mekewat eꞌat pe worohoꞌonapin kahato kat som kat som Tupana tikyꞌesat ewetunug hap. Miꞌi hap eꞌat pe waku pe eweikupteꞌen. Einapin hap ewetunug yne maꞌato mesup yt areineꞌen i eipyꞌasetpe katupono morekuat woꞌopyhik hawe areineꞌen miꞌi pote yt uwe i uito eipyꞌasetpe. Miꞌi pykai ti atikyꞌesat kahato eweikupteꞌen uhehay upi. Yt uwe i uito itote pykai ewetunug o einapin hap koꞌi are maꞌato poꞌog poꞌog saꞌawyꞌi wuat kai uiꞌe hap ewy atikyꞌesat kahato ewetunug wakuat nug hap koꞌi. Waku eweikenꞌẽ yt naku i nug hap pupi Aikotã aityry hap ewy eikenꞌẽ hap. Waku watunug Tupana mikyꞌesat koꞌi yn Tupana mihakyeraꞌat aito pote. Waku watoineꞌen Tupana mihakyeraꞌat koꞌi wo watopyhuꞌat. Miꞌi hawyi karãpe miitꞌin teꞌeraꞌakasa aiminug wakuat kape hawyi -Pywo iꞌatuꞌe miꞌiria ti Tupana mihakyeraꞌat koꞌi wo iꞌatuꞌe.