Versete biblice populare din TITO 3

Împărtășește

Yöś ućhumnakakiś thëśićha śuma qamaña ućhum Liwrïñi Yöśki nïź śuma quśmi niźaśa nïź oqśñi quśmi thëśićha thapa źoñinakźta, Yöśki ućhum liwrïchićha ana ućhumnak śuma pätikiśtanqaś, ućhumnak oqźku. Ućhumnak liwrïtaćha ana śum quś axwźintaćha Yöś Espíritu Santuźtan, Yöśki ućhum liwrïchićha wilta math qatchićha ew śuma qamaña thächićha. Ućhum Liwrïñi Jesucriśtu Yöśki thapa ućhumnakakiś nïź Espíritu Santu ana miraña thächićha, ućhumnak anaź tanś wakiśatćha Yöś Ephki ućhum qhawśićha, niźaśa ućhum kuytićha neqhśtan wiñayax źeti thewźa.

Kirïchi źoñinakźkiś khuñsqatakićha ninakaki watha irpiñi niźaśa jilirinakami kaś wakiśićha ninakź mantukiś śuma qamś wakiśićha, niźaśa śuma iyawkhiñi ćhhulu päśxapami. Anaź anawali jëkhźtanami chiyasaćha, niźaśa llanu śuma quśśiś khiśtanćha, thapa źoñinakźtan amu quś thëśtanćha.

Ana mitiśa ni sumsu ch'äsñinakźkiś, ni tukita achchi ephnakź kintunaka nonśkiśtan saraqakićha, anaź ch'äras wakiśićha ni Moisés thaxintikiśtan, thapa ni ana wali parlitanakaki inaqaśśa niźaśa anaź wakiśićha.

Niźaśa xaqhsilta źoñit Yöś kirïchi jila kullakinaka t'aqaćhaxa, xalla ni źoñi qhawźnakićha neqhśtan chïźinakićha tshi piśk wiltami, amiź chïźinta anaź nonźnakiź nïki, ni Yöś kirïchi jila kullakinakźkiśtan chhatqattaź khekićha