IBERANI 5
5
1Singket Detaʹu Bioʹ ilu malai lemileʹ cen ahang ilu kuaʹ kelunan. Ilu nyalet ia neng gayeng Allah tuman kelunan, apan ne ke ngkin pengencai ngan liwa kuʹun penyalaʹ le palaʹ ia. 2Usa ha tengen tisen lemaʹ neng kadoʹ naʹan, ina ukoʹ o mencam denaʹ tawai neng kelunan diaʹ turan ngan diaʹ ti salaʹ. 3Tekep lete ia mencai liwa tuman penyalaʹ kelunan kadoʹ. Abeʹ e bang pekina tuaʹ le, un sepuʹo tuman penyalaʹ a tengen lete pe, uban ia tengen iaʹ lemaʹ. 4Abeʹ un ca usa iaʹ alaʹ selumuk mia tengen, lemileʹ ia nuyan Pengebioʹ Detaʹu. Bang kuʹun pengin Allah ca kelunan ketai nuyan Pengebioʹ Detaʹu, kuaʹ baʹan Harun sihoʹ pengin Allah cen naʹaʹ are.
5Pekina lete abeʹ Keristus alaʹ selumuk mia tengen ketai nuyan Pengebioʹ Detaʹu. Un sepuʹo Allah iaʹ pisiu ia kuma:
“Ikoʹ ne Anak keʹ.
Tau ini akeʹ ne iaʹ Amai hoʹ.”
6Un dau ue laʹa neng ca naʹan jo surat kuma ha:
“Ikoʹ iaʹ ke nuyan Detaʹu pa majan ʹo,
bayaʹ tuk puyan detaʹu Makisidik.”
7Dalau Yesus mudip kusun tanaʹ ini, ia lemameʹ ngan nyat palaʹ Allah, mentung nge bioʹ dau lengap ngan tange, moʹ Allah iaʹ senteng pubo udip pe malap pe matai laho. Allah iaʹ ngeringa dau ue uban ne tunuk ngan libaʹ kimet palaʹ ia. 8Kenuen pe ia Anak Allah, ia pekalai puyan tudep bayaʹ dau, kuʹun puyan penuyen ne. 9Tegoʹ Yesus lepa nuyan daʹam are, ia penco nuyan atek puʹun puyan iaʹ pudip kelunan neng udip saheʹ kelineʹ iaʹ ngeriman, iaʹ ina me kelunan diaʹ tudep bayaʹ dau ue. 10Ngan Allah iaʹ badaʹ ia iaʹ Pengebioʹ Detaʹu bayaʹ tuk puyan detaʹu Makisidik.
Katuk mulen ilu pubut
11Kadoʹ isiu ilu ubaʹ ke badaʹ neng puyan ini, un sepuʹo miat tekaʹ meʹ ke peluhaʹ sen ne mikem, uban penisen ncem malun. 12Lepa sukat ne pengemajan ncem mencam pekatuk kelunan, un sepuʹo petem ngkem mengaʹ kelunan iaʹ ke pekatuk ikem neng iaʹ ading dalem katuk Allah. Abeʹ kem uman kanen lan, bang telang iteʹ iaʹ tekep mikem. 13Kelunan iaʹ tekep ke nisep telang iteʹ, petem ca anak iʹut lepe ia, uban abeʹ e un mencam nugen tuk iaʹ teneng ngan iaʹ salaʹ. 14Ca naʹan kelunan diaʹ lepa bioʹ, uban ida ke uman kanen lan. Ida lepa pekalai, ngan un tekaʹ iaʹ ukoʹ de ke nugen iaʹ tiga ngan iaʹ jaʹat.
Atualmente Selecionado:
IBERANI 5: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.