2 TESALUNIKA 2
2
Laki iaʹ ngkang pungu pengejaʹat
1Ahaʹ cenganak cenganak keʹ, neng puyan ke kenai Tuhan le Yesus Keristus ʹo, ngan neng puyan le ke pempun pemung ngan ne, 2ayen ncem luhai tai bingaʹ ngan tai berawen tekaʹ kimet kuʹun tiraʹ iaʹ kuma ha: “Tau ke kenai Tuhan Yesus iaʹ kedua liwai ie lepa abeʹ.” Masaʹ un kelunan diaʹ pisiu pekina dau. Masaʹ un pe kelunan diaʹ pedenga puyan pekina. Ngan masaʹ un pe kelunan diaʹ kuma ha ameʹ lepa nyurat puyan ina dalem surat meʹ. 3Tuman ina, ayen ncem pedayo ca kelunan mele aheʹ aheʹ pe iaʹ ke pelingu ikem. Ban ne Tau ina, abeʹ e kenai kena un puyan pengekuʹo bioʹ iaʹ ke ngasing perinta. Ngan dalau ina pe laki iaʹ ngkang pungu pengejaʹat ke kenai luhaʹ, kena Allah ke pet ia kaʹ lubang luten. 4Laki ina ke nyakat mung naʹan adet sebayang kelunan iaʹ ida ngelan seleket Tuhan nte. Ngan ia ke ngempau usa ha neng toʹ naʹan puyan dina, pa ha tai madung kaʹ dalem Umaʹ Palan Allah, ngan badaʹ ia iaʹ atek Allah.
5Kumpin, un lepe ikem petawai mung inu iaʹ akeʹ lepa badaʹ mikem dalau heʹ un pemung ngan ncem are? 6Kenuen pia pekina, un ca inu iaʹ mempeng puyan ina kenai luhaʹ naʹkini, ngan ikem tisen aheʹ ina. Tegoʹ ca tau iaʹ Allah lepa petuket, laki iaʹ ke ngkang pungu pengejaʹat ina kenai luhaʹ. 7Puyan jaʹat, iaʹ nuyan ngan selem, lepa un ne naʹkini, un sepuʹo puyan jaʹat iaʹ ke nuyan bayaʹ, abeʹ e ke nuyan kena ketai pesau ia iaʹ mempeng puyan ina. 8Lepa ina laki iaʹ ngkang pungu pengejaʹat ina kenai luhaʹ, ngan Tuhan Yesus ke lematai ia man nyingan iaʹ nai cen paʹ a, mentung nge ke nasaʹ ia man serema peniga ha, tegoʹ Tau ke kenai ie ʹo.
9Laki iaʹ ngkang pungu pengejaʹat are, kenai ie man penyukat Bali Sitan. Ia ke uyan mung naʹan puyan nyingan, ngan tedanaʹ bulen iaʹ palo, ngan puyan iaʹ peketoʹ dulu. 10Ia ke pelingu kelunan diaʹ ketai tasaʹ kuʹun aken ne iaʹ jaʹat ina. Kelunan dina ke tasaʹ, moʹ de leko ke alaʹ katuk iaʹ telit, ngan leko ke malaʹ a, apan nte ke tisen puyan iaʹ ke pudip ida dalem Tuhan. 11Tuman ina Allah naʹ ca penyukat iaʹ ke pelingu kimet de, apan nte ngelan puyan iaʹ lemalo ina are. 12Ketai ke kuʹo ho, mung kelunan diaʹ abeʹ un ngelan katuk telit ina, diaʹ bang malaʹ neng penyalaʹ, ida lete iaʹ ke sihoʹ ukum.
Allah lemileʹ ikem apan ncem un udip dalem Tuhan
13Ahaʹ cenganak cenganak keʹ diaʹ Tuhan malaʹ, tekep meʹ lemuto nyuaʹ tiga saheʹ palaʹ Allah tuman ikem. Allah lepa lemileʹ ikem seleket kelunan iaʹ ading ading un udip dalem Tuhan. Ngan ikem un udip ina kuʹun nyingan Berua ha, ngan kuʹun pengelan ncem palaʹ katuk iaʹ telit. Ina tuman Allah lepa uyan ikem diaʹ anun ne iaʹ buheʹ. 14Allah lepa mengin ikem palaʹ udip ini man Denga Injil iaʹ ameʹ lepa badaʹ mikem are. Tuhan lepa mengin ikem apan ncem ke un tulat neng serema peniga Tuhan le Yesus Keristus, iaʹ ia lepa petulat mikem.
15Tuman ina cenganak cenganak, nekejeng ne ngan salet, mentung ngkem ngkang katuk iaʹ ameʹ lepa badaʹ palaʹ ikem ini, dalem katuk meʹ, pekina pe dalem surat meʹ.
16Awaʹ pe Tuhan le Yesus Keristus tengen, ngan Allah iaʹ Amai le iaʹ ban malaʹ ilu, ngan dalem pengelesau ue ia ban naʹ tangen iaʹ ke ngeriman, ngan ca tebelum iaʹ tiga milu. 17Awaʹ pe ia ke nyangan penawai hem ngan kimet iaʹ tangen, mentung nge ke ngepali ikem, apan ncem senteng ke menco mung naʹan gayeng iaʹ tiga, ngan badaʹ mung tiraʹ iaʹ tiga.
Atualmente Selecionado:
2 TESALUNIKA 2: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.