2 YAYA 1
1
1Cen Yaya iaʹ tuʹa dalem Mpun diaʹ ngelan Tuhan:
Palaʹ Tinen le iaʹ Allah nyelum, pemung ngan anak ke iaʹ atek akeʹ malaʹ dalem katuk iaʹ telit. Abeʹ e bang ca akeʹ tuaʹ le, un sepuʹo mung diaʹ ban tisen katuk iaʹ telit, diaʹ malaʹ ikem pe. 2Uban katuk telit un ngelineʹ dalem ilu, ngan ia ngelineʹ pemung ngan le pabeʹ bayaʹ.
3Awaʹ pe Allah iaʹ Amai Bioʹ, ngan Yesus Keristus, Anak Amai ina, ke naʹ pengemalaʹ ngan naʹ pengelesau ngan udip iaʹ tadan milu. Awaʹ pe ilu nganun puyan dini bayaʹ neng puyan katuk telit ngan puyan malaʹ.
Katuk telit ngan puyan malaʹ
4Bioʹ tekaʹ bangen nceʹ petegoʹ ngan kudaʹ usa diaʹ anak koʹ are, diaʹ ban mudip dalem katuk iaʹ telit, kuaʹ baʹan dau pengecuk Amai Bioʹ neng ilu are. 5Ahaʹ Tinen le mung, dau heʹ nyat neng ikoʹ, tiga le mung malaʹ neng ilu semaheʹ. Abeʹ ini katuk ukum iaʹ mading iaʹ akeʹ nyurat mikoʹ ne, bang katuk ukum iaʹ lepa un neng ilu cen tading tading nge. 6Dau heʹ pisiu neng puyan malaʹ idai are, un sen ne: ilu nemek mudip badaʹ dau mung katuk ukum Allah. Koʹ baʹan dau katuk ukum iaʹ ikem lepa kenahan cen tading tading nge are, ini ie: tekep kem mung pebulung mudip dalem puyan malaʹ ina.
7Lepa kadoʹ ne ketai diaʹ pelingu dulu libut neng usun tanaʹ ini. Abeʹ de tuman dau bayaʹ uban Yesus Keristus lepa nai neng puyan usa kelunan lan. Kelunan iaʹ pekina ne iaʹ pelingu dulu, ngan ia pe atek Bunoʹ Keristus. 8Tuman ina, jagaʹ ne singket usa hem, malap tai pelo-lo ne penyanget gayeng ngkem. Un sepuʹo penco ne ikem alaʹ mung bang ngkem neng penyukung nge.
9Aheʹ kelunan iaʹ duncau neng katuk Keristus ngan abeʹ un temek dalem katuk ina, kelunan ina abeʹ e dapit neng Allah. Aheʹ kelunan iaʹ temek dalem katuk ina, atek dapit neng Amai Bioʹ, peging ngan Anak ke pe. 10Tuman ina, buk aheʹ kelunan iaʹ nai kata ikem, iaʹ abeʹ un ngkin katuk ini, ayen alaʹ ia kedalem amin ncem. Ayen selama dau neng ia. 11Uban aheʹ iaʹ nyelama ia ketai ie pekebulung dalem puyan pengejaʹat te.
Dau nyaheʹ
12Un kadoʹ naʹan iaʹ akeʹ ubaʹ ke badaʹ mikem, un sepuʹo abeʹ keʹ ubaʹ ke nyurat man keletat ngan telang tinta. Akeʹ nebelum kenai naʹat ikem, ngan pisiu peseripa ngan ncem, apan le ke pelepek tekaʹ pengebangen saheʹ le uʹo.
13Mung anak cenganak leto ho iaʹ Allah nyelum ini badaʹ tiga saheʹ de mikem.
Atualmente Selecionado:
2 YAYA 1: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.