1 TIMUTIUS 2
2
Katuk temameʹ me Mpun diaʹ ngelan Tuhan
1Moʹ ina, iaʹ ading ading nge akeʹ petangen dau me mung diaʹ ngelan Tuhan apan pengenyat temameʹ, ngan pengenyat iaʹ ngarap, ngan pekina pe puyan nyuaʹ tiga saheʹ ketai palaʹ Allah me kelunan mung. 2Lemameʹ me diaʹ laja, ngan me diaʹ tuʹa lepoʹ diaʹ ngkang ilu, apan le senteng mudip neng udip iaʹ denaʹ ngan iaʹ tadan seʹ, mentung le temek dalem adet le, ngan daʹam puyan le neng ahang ilu selepeʹ. 3Ina iaʹ tiga, iaʹ sihoʹ neng pengubaʹ Allah: Allah iaʹ Keniga Udip le, 4iaʹ ubaʹ ke pudip kelunan mung, ngan ngkin ida tai tisen neng katuk iaʹ telit. 5Moʹ Allah ne bang ca le. Ngan Laki iaʹ ngkin ilu tai pemung ngan Allah bang ca le. Ia ca kelunan lete, ina ne Keristus Yesus. 6Ia lete iaʹ mencai usa ha suaʹ ke nakau kelunan mung cen iaʹ jaʹat. Iaʹ ina marung sihoʹ tuket te, ban tugen laleʹ puyan Allah ubaʹ ke pudip kelunan mung. 7Moʹ neng puyan ina, Allah ban cuk akeʹ tai lawa Injil, ngan guru palaʹ dulu diaʹ tahaʹ awang Yahudi. Ia cuk akeʹ penco katuk neng puyan ngelan ngan katuk iaʹ telit. Ngan telit lan dau heʹ, abeʹ keʹ palo.
8Pekini pengubaʹ keʹ, mung laki diaʹ buheʹ penawai re, mele kempi kukoʹ de, tiga re lemameʹ ngan mejung ujoʹ de, ngan abeʹ un tekaʹ miʹa ngan dau kuheng.
9Pekina lete pengubaʹ keʹ, mung leto, tiga re pegelam usa re ngan diaʹ daʹam ngan sebelang diseʹ, abeʹ e ngan anyam puk, ngan mat, ngan intan nte, ngan abeʹ pe ia ngan sapai iaʹ mpau beli ie. 10Di lareʹ tiga leto pegelam usa re ngan penyaheʹ iaʹ sebelang, dalem kelayen iaʹ tekep me leto iaʹ temek bayaʹ Allah. 11Un leto ne, tekep de pekalai neng iaʹ belinga dau, ngan ngelibaʹ kimet de. 12Abeʹ keʹ buhaʹ leto pekatuk mpau dau neng ʹo diaʹ laki, di lareʹ tekep le ida ngeringa le. 13Moʹ Adem iaʹ ading Allah uyan, uʹo ina le ia uyan Hawa. 14Moʹ abeʹ e Adem tai sihoʹ lingu. Iaʹ leto iaʹ ading tai sihoʹ lingu iaʹ ngesa adet Allah. 15Moʹ ina ukoʹ leto ne sakit buk de nganak. Naʹ pia pekina, ina re tisen lete iaʹ ke pudip ida dalem Tuhan, buk de tudep neng pengelan nte, ngan malaʹ, ngan buheʹ, mentung daʹam penawai re.
Atualmente Selecionado:
1 TIMUTIUS 2: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.