1 TESALUNIKA 5
5
Petenup ne ukoʹ ke nai Tuhan ina
1Neng puyan dalau ngan midan tau puyan ini ke nuyan cenganak, abeʹ titin meʹ nyurat palaʹ ikem. 2Ikem tengen iaʹ tisen lan, atek kenai Tau Tuhan ina ngan puyan koʹ baʹan puyan kenai kelunan bekelau dalau ngahu. 3Midan dulu kuma ha: “Mung nge denaʹ ngan tiga,” dalau ina kenai ca puyan iaʹ ke necu nasaʹ ida. Nyahut de senteng ketai kelap ne. Kenyarem me koʹ baʹan puyan ca leto ke sakit nganak.
4Un sepe ikem cenganak, abeʹ kem mudip dalau ntem. Abeʹ tekep Tau Bioʹ ina ke necu ikem koʹ baʹan puyan kelunan bekelau. 5Mung ngkem, kelunan diaʹ nganun serema, diaʹ nganun naʹ tau. Abeʹ ilu iaʹ nganun ngahu diaʹ mudip dalau ntem. 6Tuman ina, abeʹ le tekep ke luntoʹ koʹ baʹan dulu diaʹ ca are, di lareʹ tekep le mengaʹ ngan sebelang-belang tawai le. 7Tegoʹ ngahu, kelunan luntoʹ. Tegoʹ ngahu lete, dulu mabuk. 8Un sepuʹo ilu dini kelunan diaʹ mudip naʹ tau, tekep le sebelang-belang tawai. Tekep le ke kanan pengelan ngan pengemalaʹ, seleket le un ca besunung. Ngan tebelum le neng puyan iaʹ pudip ilu dalem Tuhan, seleket beluko le.
9Allah lemileʹ ilu, abeʹ e apan le ke sihoʹ kenca ha, un sepuʹo apan le ke un puyan iaʹ ke pudip ilu kuʹun Tuhan le Yesus Keristus. 10Ia iaʹ lepa matai tuman ilu, apan le senteng ke mudip pemung ngan ne dalau ke kenai ie ʹo, naʹ pe ilu caʹ mudip, naʹ pe ilu lepa matai, tegoʹ ke kenai ie ʹo. 11Tuman ina, petangen ikem peselepeʹ, ngan pepo ikem ca usa ngan ca usa, koʹ baʹan iaʹ ikem lepa ban uyan naʹkini are.
Kudaʹ katuk neng pemuyan, ngan dau Paulus badaʹ nyaheʹ
12Pengenyat meʹ neng ikem cenganak cenganak, apan ncem nugen ngan nyelama ida diaʹ pegayeng neng ahang ikem, ban ne ida iaʹ Allah lepa lemileʹ ke mampin ikem ngan ke pekatuk ikem. 13Tiga hem pekimet ida man bioʹ tekaʹ selama ngan pengemalaʹ kem neng ida, ban tuman gayeng nte. Ngan ikem mung uyan tadan puyan udip neng ahang ikem.
14Laʹa dau meʹ ngelapen pekatuk ikem cenganak cenganak, apan ncem pejagaʹ dau me kelunan diaʹ leko, ngan petangen kelunan diaʹ saʹe, ngan mepo kelunan diaʹ lemaʹ, ngan pedenaʹ laset palaʹ dulu mung. 15Nawai ne ikem, ayen buhaʹ ca usa, mele aheʹ neng ahang ikem, ke naʹ puyan jaʹat suaʹ puyan jaʹat. Di lareʹ nengayet cem lemuto uyan tiga neng ahang ikem, ngan pekina pe palaʹ dulu mung.
16Bangen bangen ne ikem lemuto. 17Ayen ncem beto lemameʹ. 18Nyuaʹ tiga saheʹ neng toʹ puyan inu. Pemuyan ini ne iaʹ Allah ubaʹ ikem ke uyan dalem pengudip kem iaʹ pebeka ngan Yesus Keristus ini.
19Ayen ncem lemataʹ Berua Allah. 20Ayen ncem muau isiu iaʹ nai badaʹ seluhan kimet Allah. 21Mile ngan ten ne mung pemuyan, ngan kanan ne isiu iaʹ tiga. 22Ngan ngecoʹ ne mung puyan iaʹ jaʹat.
23Allah iaʹ naʹ udip iaʹ tadan milu. Awaʹ pe ia ke uyan ikem kelunan diaʹ buheʹ neng singket naʹan, ngan ke nubo berua, ngan tawai, ngan usa hem mung, apan abeʹ un inu iaʹ jaʹat neng ikem tegoʹ kenai Tuhan le Yesus Keristus ʹo. 24Ban Allah iaʹ mengin ikem ini, ia iaʹ ke pedaʹam puyan ini, moʹ ia iaʹ semamet.
25Ahaʹ cenganak cenganak, tiga hem ngkin ameʹ dalem temameʹ kem lete.
26Badaʹ tiga saheʹ me mung diaʹ cenganak le, man puyan paʹoʹ koʹ baʹan iaʹ tekep diseʹ ilu diaʹ pecenganak are.
27Akeʹ ngelapen nyat ikem man penyukat Tuhan le Yesus Keristus, baca ne surat ini me mung cenganak cenganak le diaʹ lepa ngelan.
28Pengelesau Tuhan le Yesus Keristus ke un ngan ncem mung. 10
Atualmente Selecionado:
1 TESALUNIKA 5: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.