1 PETERUS 5
5
Mpun dumba Allah
1Ini ca katuk keʹ me mung diaʹ tuʹa Mpun diaʹ un ngan ncem, moʹ akeʹ pe ca tuʹa Mpun pekuaʹ ngan ncem. Akeʹ iaʹ badaʹ tugen neng penuyen Keristus, ngan kahum pe akeʹ dalem serema peniga iaʹ kenai luhaʹ ʹo. 2Pengenyat ceʹ neng ikem: manan ne Mpun dumba iaʹ Allah naʹ mikem. Petubo ne ida man pengejaya hem bayaʹ pengubaʹ Allah. Abeʹ e ngan taten tekaʹ kimet cem. Ngkang gayeng ngkem ngan tekaʹ tangen tawai hem, ngan ayen ti ie ngan kimet iaʹ ubaʹ mita bang. 3Ayen ncem ngempau usa hem neng diaʹ ikem petubo, di lareʹ tiga hem nuyan ca kata me Mpun dumba dina. 4Midan kenai iaʹ Pengebioʹ Manan Dumba ina luhaʹ ʹo, ikem ke alaʹ bang peniga iaʹ menyerema pabeʹ bayaʹ.
5Pekina pe ikem demanai, tiga hem tunuk palaʹ diaʹ lataʹ. Tiga hem mung man tekaʹ libaʹ kimet cem mepo ngan petubo ikem selepeʹ. Koʹ baʹan dau Kitap Tuhan: “Allah ke nyekang diaʹ balang tawai, un sepuʹo ia ke naʹ pengelesau ue ngan lebang palaʹ diaʹ libaʹ kimet.” 6Ina ukoʹ o tiga hem ngelibaʹ kimet cem kentaʹ ujoʹ Allah iaʹ bioʹ penyukat ina, apan ne ke ngempau ikem tegoʹ tuket te ʹo. 7Pelek ne mung tekaʹ pengejanga tawai hem palaʹ ia, moʹ ia le iaʹ nyingo ikem.
8Jagaʹ ne kimet cem, ngan tiga hem lemuto tenup tekaʹ, moʹ un bunoʹ kem Bali Jaʹat ina, koʹ baʹan ca lencau iaʹ lemuto nyanam ngan ngahang mita aheʹ iaʹ senteng ia ke nyeloʹ. 9Salet le ikem dalem pengelan ncem, ngan nyekang ne ia. Moʹ tisen te ikem ban mung cenganak kem dalem Tuhan, iaʹ un pa libut usun tanaʹ ini, nco pe ida sihoʹ tuyen koʹ baʹan ikem lete. 10Moʹ tai lepa hem tisen tekaʹ sihoʹ tuyen iaʹ abeʹ un majan, Allah tengen iaʹ ke pedaʹam udip kem, ngan ke pedengkep ikem, ngan ke ngepali ikem, ngan ke nyalet ikem ʹo. Allah iaʹ atek puʹun mung pengelesau iaʹ mengin ikem ke pebeka dalem peniga Keristus iaʹ menyerema pa pa majan. 11Palaʹ ia ne ketai penyukat pa pa majan ʹo. Amin.
Nyaheʹ ne
12Akeʹ uyan surat iaʹ buʹet ini palaʹ ikem man ujoʹ Suanus, moʹ keʹ kuma ia ca cenganak le iaʹ semamet. Kimet ceʹ ubaʹ ke petangen ikem, ngan badaʹ ban ini iaʹ lan lan ne pengelesau Allah. Tiga hem salet nekejeng kidi.
13Un Mpun cenganak kem kaʹ lepoʹ Babil, iaʹ Allah ban lemileʹ koʹ baʹan ikem are, badaʹ tiga saheʹ palaʹ ikem. Pekina pe cen anak keʹ Markus. 14Tiga hem nyelama ikem selepeʹ, man puyan paʹoʹ ukoʹ baʹan iaʹ tekep diseʹ ilu diaʹ pecenganak are.
Awaʹ pe udip iaʹ tadan ke un ngan ncem mung diaʹ ban pebeka dalem Keristus. 14
Atualmente Selecionado:
1 PETERUS 5: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.