1 PETERUS 1
1
1Cen Peterus, lawa Yesus Keristus:
Palaʹ mung diaʹ Allah ban lemileʹ, diaʹ mudip tutang, diaʹ muʹo tai purat petat kaʹ tanaʹ Puntus, ngan kaʹ Galatia, ngan kaʹ Kapadukia, ngan kaʹ Asia, ngan kaʹ Bitinia. 2Ban Allah iaʹ Amai Bioʹ tengangan ne lemileʹ ikem bayaʹ ban kimet te, idi hem tai nuyan kelunan buheʹ kuʹun Berua ha, apan ncem tudep bayaʹ dau Yesus Keristus, ngan tai buheʹ kuʹun dahaʹ a.
Awaʹ pe pengelesau ue ngan udip iaʹ tadan kenai un pit un pit palaʹ ikem.
Tebelum iaʹ mudip
3Nyuaʹ ne tiga saheʹ palaʹ Allah, Amai Tuhan le Yesus Keristus. Moʹ bioʹ ban pengelesau ue nganak ilu neng ca udip mading, kuʹun puyan ne iaʹ pudip Yesus Keristus cen patai ie. Dalem diaʹ pekina, un tebelum iaʹ mudip neng ilu. 4Idi le ke alaʹ tulat iaʹ Allah petuket ke naʹ me diaʹ anun ne, iaʹ ia pedemun kedalem surga. Kaʹ ina abeʹ e senteng ketai tasaʹ, ngan abeʹ e ketai jaʹat, abeʹ e ketai menyo. 5Allah iaʹ petubo ho mikem man penyukat te, moʹ ban kuʹun pengelan ncem neng ia. Mentung ngkem pekena udip kem dalem Tuhan iaʹ lepa ban tenup kenai luhaʹ tegoʹ tai kuʹo udip ini ʹo.
6Neng puyan ini, bangen ne ikem, naʹ pia nuat le ikem tisen tekaʹ bahat kimet, moʹ tekep kem ngihen neng kadoʹ naʹan pengeten lete. 7Moʹ kuʹun pengeten ina, idi ie ke peluhaʹ diseʹ lan lan ban pengelan ncem. Buk le pekata ha neng mat, ina ca inu iaʹ ke salai kusun tanaʹ ini, dulu ke ten ne pe man luten. Pekina kata neng puyan pengelan ncem, iaʹ lapa tiga neng ʹo mat, atek ke ke sihoʹ pengeten lete, apan ne luhaʹ seʹ salet pengelan ncem. Cen puyan ina, ikem ke un dau padangan serema peniga ngan selama tegoʹ Tau ke kenai Yesus Keristus luhaʹ ʹo. 8Abeʹ lepe ikem taʹan ia, un ne ban malaʹ kem neng ia. Naʹ pe ikem abeʹ un taʹan ia naʹkini, un ne ban ncem ngelan ia. Ina ukoʹ kem bangen tawai, moʹ un ca bangen iaʹ bioʹ, iaʹ ban nai cen serema peniga Allah, iaʹ ilu are mencam ke badaʹ. 9Ina ne penading ngkem tisen tekaʹ ban sin pengelan ncem, iaʹ ina puyan iaʹ pudip berua hem dalem Tuhan.
10Neng puyan iaʹ pudip kelunan ini, diaʹ pegawa cen naʹaʹ nemek ke mita ngan nyituk ke. Ida diaʹ ban badaʹ kimet Allah neng pengencai iaʹ ia ke naʹ mikem. 11Seʹ de ubaʹ ke ngetisen midan jakaʹ a, ngan ke kumpin seʹ puyan ke kenai ie ʹo. Moʹ Berua Keristus iaʹ un dalem ida, tugen dau neng iaʹ naʹkini, ngan nekena badaʹ neng penuyen iaʹ ke sihoʹ Keristus, ngan serema peniga iaʹ petuk kenai luhaʹ bayaʹ a. 12Allah iaʹ petisen diaʹ pegawa dina, abeʹ de pegayeng bang mida tengen le, di lareʹ seʹ de pegayeng mikem, moʹ de penco tiraʹ iaʹ lan, iaʹ ikem ban alaʹ naʹkini. Moʹ naʹkini diaʹ lawa Injil penco katuk dalem penyukat Berua Buheʹ, iaʹ Allah ban cuk nai cen surga. Ida iaʹ badaʹ tiraʹ iaʹ lan mikem, ngan ubaʹ pe melikat ke tisen kidi.
Ca pengin neng udip buheʹ
13Petenup ne kimet cem, ngan jagaʹ lemuto-uto. Nyalet ne ketoʹ tebelum ngkem neng peniga iaʹ Allah ke naʹ mikem tegoʹ Yesus Keristus kenai luhaʹ ʹo. 14Tiga hem tunuk bayaʹ dau Allah. Ayen bayaʹ layen asam pengubaʹ usa hem iaʹ cen naʹaʹ, dalau hem ban turan are. 15Di lareʹ tiga hem tai buheʹ dalem mung puyan pengudip kem, koʹ baʹan ban pengebuheʹ Allah iaʹ ban mengin ikem. 16Moʹ lepa un dalem Kitap Tuhan: “Atek kem ke buheʹ, moʹ keʹ buheʹ.”
17Dalau hem lemameʹ neng Allah, ikem ngamai ie, ngan ia iaʹ pebetep ukum iaʹ abeʹ un selepeʹ neng mung kelunan, telit bayaʹ ban puyan singket usa le. Buk pekina, tiga hem takut neng ia ngajan ncem mudip kusun tanaʹ ini. 18Tisen te ikem neng suaʹ iaʹ ukoʹ Allah ban pawang ikem kelap cen puyan udip iaʹ abeʹ un semantet seʹ, iaʹ ban cen tepun ncem are. Abeʹ e kuʹun ca suaʹ iaʹ laho salai, koʹ baʹan pirak ngan mat are. 19Di lareʹ ban man suaʹ dahaʹ Keristus iaʹ atek tiga, koʹ baʹan dahaʹ anak dumba iaʹ abeʹ un penginteʹ ngan pengejaʹat. 20Allah lepa petuman Keristus kena usun tanaʹ ini ke nuyan, ngan naʹkini tegoʹ ke bayaʹ udip, Allah ban peluhaʹ ia moʹ kuʹun ncem. 21Moʹ ban kuʹun Keristus, ikem ngelan neng Allah iaʹ ban pudip ia cen patai, ngan naʹ serema peniga mia. Ina ukoʹ pengelan ncem ngan tebelum ngkem tai dapit palaʹ Allah.
22Naʹkini seʹ kem lepa muheʹ penawai hem uban ncem tudep bayaʹ katuk iaʹ telit, ngan tisen pengemalaʹ iaʹ abeʹ un nyelibo neng cenganak kem dalem Tuhan. Moʹ ina, tiga hem pali kuʹo malaʹ neng ikem selepeʹ, man mung tekaʹ keluʹung kimet cem. 23Moʹ lepa ne ikem nai ngeliwet pempet neng ca udip iaʹ mading, abeʹ e cen tuʹa iaʹ ketai salai, di lareʹ cen tuʹa iaʹ abeʹ senteng ketai salai, iaʹ ina tiraʹ Allah iaʹ mudip ngan iaʹ un pa pa majan. 24Koʹ baʹan dau Kitap Tuhan:
“Mung kelunan koʹ baʹan udu.
Mung peniga re koʹ baʹan piu udu are.
Udu ina ketai maʹang, ngan piu ue ketai lero.
25Un sepuʹo tiraʹ Allah atek un pa pa majan.”
Tiraʹ ina ne iaʹ ban nai palaʹ ikem kuʹun Denga Injil.
Atualmente Selecionado:
1 PETERUS 1: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.
