1 YAYA 1
1
Tiraʹ Udip
1Ameʹ nyurat mikem neng puyan Tiraʹ Udip. Ia iaʹ un cen tading tading udip. Ameʹ lepa kenahan dau ue, ngan taʹan ia man mata meʹ tengen. Ameʹ lepa nugen ne, ngan tisen ne man ujoʹ meʹ. 2Tegoʹ ban kenai udip ini luhaʹ, ameʹ taʹan ne. Ina ukoʹ meʹ badaʹ tugen neng idi, ngan badaʹ mikem neng puyan udip saheʹ kelineʹ iaʹ ngeriman, iaʹ ban un pemung ngan Amai Bioʹ, ngan nai luhaʹ palaʹ ameʹ. 3Inu iaʹ ameʹ lepa ban taʹan, ngan iaʹ ameʹ lepa ban kenahan, ameʹ penco ho mikem lete, apan ncem ke pebulung ngan meʹ neng puyan iaʹ pebeka tawai le ngan Amai Bioʹ, pemung ngan Anak ke Yesus Keristus. 4Ameʹ ti surat ini apan puyan seʹ pengebangen le ketai sukung.
Allah ne iaʹ Atek Dema
5Ini ne dau katuk tiraʹ iaʹ ban ameʹ lepa kenahan cen Anak Allah ngan badaʹ mikem. Ini ie: Atek dema ne Allah. Nyahut abeʹ un ca ntem pe dalem ia. 6Buk le kuma ha un pebeka tawai le ngan ne, idi petem pe ilu mudip dalau ntem lete, seʹ le palo neng puyan pengisiu le, ngan abeʹ pemuyan le tai telit. 7Buk le mudip neng dema koʹ baʹan Allah iaʹ un mudip neng dema, ina le un pebeka tawai le ca usa ngan ca usa, ngan dahaʹ Yesus iaʹ Anak ke ke muheʹ ilu cen singket penyalaʹ le.
8Buk le kuma ilu abeʹ un penyalaʹ, seʹ le pelingu usa le tengen. Nyahut abeʹ un katuk iaʹ telit neng ilu. 9Un sepuʹo buk le teto ngahaʹ penyalaʹ le palaʹ Allah, ia ke ngkang dau tuket te ngan menco puyan iaʹ teneng, atek ia ke mesau penyalaʹ le lete, ngan muheʹ ilu cen mung pemuyan iaʹ abeʹ un teneng. 10Buk le kuma ilu abeʹ un uyan penyalaʹ lepe, seʹ le naʹ Allah palo, ngan abeʹ un tiraʹ a neng ilu.
Atualmente Selecionado:
1 YAYA 1: KNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Kenyah New Testament © Bible Society of Malaysia, 1984.
