Roˉma‸ li‸ 11
11
Cawˬ taˍ sheˍ ve Iˉsaˍreˍlaˆ chaw hui awˬ lawn
1Hkʼe te leh ngaˬ na nyi ve, Gʼuiˬsha yawˇ ve chaw ceuˬ hta‸ baˬ taˉ peuˬ laˇ. Maˇ baˬ taˉ taˬ. Ngaˬ htawˇ Iˉsaˍreˍlaˆ chaw hpeh‸ leh, Aˍbraˍhanˍ ve awˬ yaˇ awˬ duˬ awˬ hkʼaw lo Beˍyaˍmenˍ ve awˬ ceuˬ awˬ hkʼaˇ teˇ gʼaˇ hpeh‸ ve yoˬ. 2Awˬ gʼuˇ suhˍ htaˇ ka‸ Gʼuiˬsha shiˍ taˍ ve, yawˇ ve chaw hui hta‸ yawˇ baˬ taˉ ve maˇ heˆ. Eˇliˇya‸ lehˬ Gʼuiˬsha mehˆ gʼuˇ suhˍ Iˉsaˍreˍlaˆ chaw hui awˬ hkʼoˆ venˇbaˆ taˍ leh kʼoˆ ve, 3Jawˇmawˇ-oˬ, nawˬ ve tcuh kaˍ paˍ hui hta‸ yawˇ hui tiˇ pehˍ peuˬ. Nawˬ hta‸ tanˇ kuiˬ teˇ hpaˍ hta‸ ka‸ yawˇ hui duˇ baˬ peuˬ. Ngaˬ teˇ gʼaˇ tiˉ cawˬ taˉ leh, ngaˬ hta‸ ka‸ tiˇ pehˍ tuˬ yawˇ hui ca chehˇ ve yoˬ teh‸, Li‸ hpu hkʼaw bvuh‸ taˍ ve hta‸ nawˬ hui maˇ shiˍ laˇ.#1Jm 19:10 4Ya‸ hkʼaˇ, Gʼuiˬsha yawˇ hta‸ hkʼaˬ hkʼe kʼaw‸ kʼoˆ piˇ ve le. Baˍlaˆ shaˉ ho‸ mehˆ gʼuˇ suhˍ hkui tcuhˉ maˇ teh ve chaw suhˍ hinˉ gʼaˇ ngaˬ awˬ pon ngaˬ teh taˍ sheˬ ve yoˬ teh‸ kʼaw‸ kʼoˆ piˇ ve yoˬ.#1Jm 19:18 5Chi hkʼa shuˍ shuˍ, chi beu‸ awˬ yanˇ awˬ hkʼaw lo htawˇ, awˬ bon hta‸ pa taw leuˆ yuˬ taˍ ve chaw a ciˉ cawˬ taˍ sheˍ ve yoˬ. 6Awˬ bon hta‸ pa taw leuˆ yuˬ ve kʼo, kanˉ te ve hta‸ maˇ kʼaw‸ caˉ da‸. Kanˉ te ve hta‸ caˉ da‸ ve kʼo, awˬ bon oˇ ve lehˬ, awˬ bon maˇ kʼaw‸ hpeh‸ ve yoˬ.
7Hkʼe te leh, hkʼaˬ hkʼe le. Iˉsaˍreˍlaˆ chaw hui lehˬ, yawˇ hui ca ve hta‸ maˇ gʼa. Leuˆ yuˬ ve chaw hui ceh tiˉ gʼa leh, maˇ leuˆ yuˬ ve chaw hui lehˬ, nyi ma heh kʼai ve yoˬ. 8Li‸ hpu hkʼaw kʼoˆ ve hkʼe, Ya‸ nyi hkʼa gaˬ zuh‸ muiˉ jo ve nyi ma maˇ kʼoˆ, maˇ mawˬ puiˉ ve mehˆ shiˍ maˇ kʼoˆ, maˇ kaˇ puiˉ ve naˍ paw maˇ kʼoˆ, Gʼuiˬsha yawˇ hui hta‸ piˇ ve yoˬ, teh‸ kʼoˆ taˍ ve yoˬ.#Bon 29:4 9Daˍviˆ htawˇ kʼoˆ ve,
Yawˇ hui ve hti caˇ hti dawˬ ve lehˬ,
yawˇ hui awˬ pon pehˍ htaw taˍ ve,
va htaw taˍ ve, ce lo‸-e tuˬ paˆ te taˍ ve leh,
yawˇ hui gʼa hkanˍ cawˇ ve ciˍ yanˍ tuˬ kʼaw‸ hpeh‸ la piˇ-oˆ.
10Yawˇ hui mehˆ maˇ mawˬ tuˬ,
yawˇ hui ve mehˆ shiˍ naˆ ho‸ lehˍ hpeh‸ piˇ lawˬ-o‸.
Yawˇ hui ve caw‸ htawˇ hkʼaˬ htaˇ ka‸ kʼaw‸ lehˍ hpeh‸ piˇ lawˬ-o‸, teh‸ kʼoˆ ve yoˬ.#Chi 69:22-23
Buiˇ shaˆ aˉ naˆ chaw hui htaiˍ hkʼaw‸ ve hta‸ gʼa ve
11Hkʼe te leh ngaˬ na nyi ve, Iˉsaˍreˍlaˆ chaw hui lehˬ, paiˍ htaˇ hkʼa gaˬ hkui htiˇ poˬ ve laˇ. Maˇ heˆ taˬ. Ya‸ hkʼaˇ, Iˉsaˍreˍlaˆ chaw hui ya‸ ve jiˆ ve hta‸ pa taw buiˇshaˆaˉnaˆ chaw hui lehˬ, htaiˍ hkʼaw‸ ve hta‸ gʼa ve yoˬ. Chi lehˬ, Iˉsaˍreˍlaˆ chaw hui hkawehˉ ve nyi ma cawˬ la tuˬ awˬ pon hpeh‸ ve yoˬ. 12Yawˇ hui ya‸ ve jiˆ ve teˇ ceuˬ lehˬ, miˬguiˬ yaˇ hui hta‸ paw sha la piˇ lawˬ leh, yawˇ hui shonˇ ve teˇ ceuˬ lehˬ, buiˇshaˆaˉnaˆ chaw hui hta‸ paw sha la piˇ lawˬ ve kʼo, awˬ moˍ awˬ hkʼaw lo yawˇ hui hkʼa biˇ lo‸ la htaˇ, chi a‸ kehˉ leuˉ leh hkʼaˬ ma kʼaw‸ paw sha la piˇ lawˬ tuˬ ve le.
13Hkʼe te leh, nawˬ hui buiˇshaˆaˉnaˆ chaw hui hta‸ ngaˬ chi hkʼe kʼoˆ laˇ ve yoˬ. Ngaˬ buiˇshaˆaˉnaˆ chaw hui awˬ pon tcuh yaˇ hpeh‸ leh, kanˉ chi ve hta‸ ngaˬ taˍ uiˍ taˍ mvuh ve yoˬ. 14Ngaˬ kanˉ chi ve hta‸ taˍ uiˍ taˍ mvuh ve lehˬ, ngaˬ ve chaw ceuˬ hkawehˉ ve nyi ma cawˬ la leh, yawˇ hui teˇ hpaˍ hpaˍ htaiˍ hkʼaw‸ ve hta‸ gʼa tuˬ ngaˬ te ve yoˬ. 15Awˬ lawn kʼo, Iˉsaˍreˍlaˆ chaw hui hta‸ baˬ taˍ ve pa taw, miˬguiˬ yaˇ Gʼuiˬsha hta‸ kʼaw‸ cawˇ da‸ hui da‸ la ve kʼo, Iˉsaˍreˍlaˆ chaw hui hta‸ kʼaw‸ ha‸ yuˬ ve teˇ ceuˬ lehˬ, suh kuiˬ lo kʼaw‸ te‸ tu la ve hkʼe hpeh‸ ve maˇ heˆ laˇ.
16Awˉ lawˉ tanˇ piˇ ve hkaoˍmonˇ awˬ tcuhˇ teˇ diˬ ehˉ da‸ kehˬ ve kʼo, hkaoˍ monˇ teˇ diˬ lonˉ hkʼa peu-eˬ ka‸ da‸ kehˬ ve yoˬ. Awˬ geu teˇ hpaˍ htawˇ da‸ kehˬ ve yoˬ.#Heh 15:19-21 17Awˬ kʼaˉ teˇ hpaˍ hta‸ tawˆ baˬ leh, nawˬ hui shaˍlonˍ awˬ hteunˍ ve awˬ kʼaˉ hpeh‸ ve htawˇ, shaˍlonˍ meuˇ cehˬ hta‸ nawˬ hui caˉ da‸ leh, awˬ kaˍ awˬ nu awˬ kʼaˉ teˇ hpaˍ geh awˬ tcuhˇ hta‸ gʼa caˇ ve kʼo, tawˆ baˬ taˍ ve awˬ kʼaˉ teˇ hpaˍ awˬ hkʼoˆ hta‸ nyi ma taˇ uiˍ. 18Nawˬ hui nyi ma uiˍ ve kʼo, chi hta‸ dawˇ nyi sheˍ. Nawˬ awˬ geu hta‸ kanˬ chiˇ taˍ ve maˇ heˆ, awˬ geu nawˬ hta‸ kanˬ chiˇ taˍ ve yoˬ.
19Ngaˬ awˬ cehˬ hta‸ gʼa caˉ da‸ tuˬ, awˬ kʼaˉ teˇ hpaˍ hta‸ tawˆ baˬ peuˬ teh‸, nawˬ kʼoˆ tuˬ yoˬ. Cawˇ ve yoˬ. 20Yawˇ hui maˇ yonˍ ve pa taw tawˆ baˬ ve hta‸ gʼa hkanˍ ve yoˬ. Nawˬ lehˬ yonˍ ve hta‸ pa taw yeˬ chehˇ ve yoˬ. Hkʼe te leh, nyi ma taˇ uiˍ. Kawˆ ve nyi ma cawˬ piˇ-oˆ. 21Awˬ lawn kʼo, Gʼuiˬsha lehˬ shaˍlonˍ meuˇ awˬ kʼaˉ hta‸ maˇ teh taˍ piˇ ve kʼo, nawˬ hta‸ htawˇ teh taˍ laˇ tuˬ maˇ heˆ. 22Hkʼe te leh, Gʼuiˬsha ha kʼaˉ ve teˇ ceuˬ leh yawˇ hehnˇ chaweh te ve teˇ ceuˬ hta‸ dawˇ nyi sheˍ. Paiˍ taˍ ve chaw hui hta‸ yawˇ hehnˇ chaweh te ve yoˬ. Ya‸ hkʼaˇ, yawˇ ve ha kʼaˉ ve teˇ ceuˬ awˬ hkʼaw lo nawˬ chehˇ taˍ ve kʼo, nawˬ awˬ hkʼoˆ yawˇ ha kʼaˉ ve teˇ ceuˬ cawˬ taˍ ve yoˬ. Yawˇ ve ha kʼaˉ ve teˇ ceuˬ awˬ hkʼaw lo nawˬ maˇ chehˇ ve kʼo, nawˬ hta‸ htawˇ tawˆ baˬ laˇ tuˬ yoˬ. 23Chaw oˇ ve teˇ hpaˍ htawˇ, maˇ yonˍ ve awˬ hkʼaw lo maˇ kʼaw‸ chehˇ tcuhˉ taˍ ve kʼo, awˬ cehˬ hta‸ teˇ pawˆ kʼaw‸ caˉ da‸ piˇ tuˬ yoˬ. Awˬ lawn kʼo, yawˇ hui hta‸ teˇ pawˆ kʼaw‸ caˉ da‸ piˇ tuˬ Gʼuiˬsha te puiˉ ve yoˬ. 24Awˬ lawn kʼo, awˬ liˇ maˇ heˆ htawˇ, shaˍlonˍ cehˬ awˬ hteunˍ awˬ hkʼaw lo nawˬ hta‸ tawˆ yuˬ leh, shaˍlonˍ meuˇ cehˬ hta‸ caˉ da‸ piˇ ve kʼo, shaˍlonˍ meuˇ awˬ kʼaˉ teˇ hpaˍ lehˬ, a shu yawˇ ve shaˍlonˍ meuˇ cehˬ hta‸ leuˉ leh kʼaw‸ caˉ da‸ piˇ tuˬ maˇ heˆ laˇ.
Iˉsaˍreˍlaˆ chaw hui hta‸ kʼaw‸ ha‸ yuˬ tuˬ ve awˬ lawn
25Awˬ viˉ awˬ nyi teˇ hpaˍ-oˬ, nawˬ hui a shu yawˇ ve cuˇ yiˍ hta‸ maˇ gʼa cuˇ tuˬ, faˉ taˍ ve awˬ lawn chi nawˬ hui hta‸ shiˍ piˇ lawˬ gaˇ ve yoˬ. Buiˇ shaˆ aˉ naˆ chaw teˇ hpaˍ lo‸ la maˇ biˇ sheˍ ve ceh ceh, Iˉsaˍreˍlaˆ chaw teˇ hpaˍ hpaˍ nyi ma heh chehˇ ve yoˬ. 26Hkʼe te leh, Iˉsaˍreˍlaˆ chaw hui hkʼa peu-eˬ htaiˍ hkʼaw‸ ve hta‸ gʼa tuˬ yoˬ. Li‸ hpu hkʼaw bvuh‸ taˍ ve hkʼe,
Ponˬ piˇ shehˍ hpaˇ lehˬ, Ziˉonˍ awˬ hkʼaw lo tawˆ la leh,
Yaˍkoˆ awˬ ceuˬ awˬ hkʼaw lo haiˬ ve teˇ ceuˬ hta‸ yawˇ yuˬ baˬ tuˬ yoˬ.
27Ngaˬ yawˇ hui ve venˇbaˆ hta‸ yuˬ baˬ ve teˇ yanˇ,
chi ve lehˬ yawˇ hui geh ngaˬ te tuˬ ve ka ti‸ shaˉ caˆ hpeh‸ ve yoˬ, teh‸ bvuh‸ taˍ ve yoˬ.#Isy 59:20-21, 27:9
28Ha lehˬ ve bon hkawˇ hta‸ caˉ da‸ ve lehˬ, nawˬ hui awˬ bon gʼa tuˬ yawˇ hui Gʼuiˬ sha ve canˇ paˍ hpeh‸ ve yoˬ. Ya‸ hkʼaˇ, Gʼuiˬsha leuˆ yuˬ ve hta‸ caˉ da‸ ve lehˬ, awˬ puˍ lonˉ teˇ hpaˍ hta‸ pa taw, Gʼuiˬsha ha‸ ve chaw hpeh‸ ve yoˬ. 29Awˬ lawn kʼo, Gʼuiˬsha hkʼe leˇ piˇ ve awˬ bon hta‸ yawˇ maˇ kʼaw‸ yuˬ hkʼaw‸. Yawˇ kuˬ yuˬ taˍ ve chaw hta‸ yawˇ maˇ kʼaw‸ dawˇ hpfuhˆ. 30Nawˬ hui awˉ lawˉ htaˇ Gʼuiˬsha hta‸ maˇ na yuˬ ve htawˇ, chi beu‸ nawˬ hui ha kʼaˉ ve teˇ ceuˬ hta‸ gʼa peuˬ. Awˬ lawn kʼo, Iˉsaˍreˍlaˆ chaw hui maˇ na yuˬ ve pa taw yoˬ. 31Chi hkʼa shuˍ shuˍ, nawˬ hui ha kʼaˉ ve hta‸ gʼa ve pa taw, yawˇ hui htawˇ ha kʼaˉ ve hta‸ gʼa tuˬ, chi beu‸ yawˇ hui maˇ na yuˬ ve yoˬ. 32Chaw hkʼa peu-eˬ hta‸ ha kʼaˉ piˇ tuˬ, Gʼuiˬsha lehˬ chaw hkʼa peu-eˬ hta‸ maˇ na yuˬ ve teˇ ceuˬ awˬ hkʼaw lo haw tiˍ taˍ ve yoˬ.
33Gʼuiˬsha ve uiˍ jaˇ maˇ jaˇ ve cuˇ yiˍ maˍ yiˍ leh shiˍ puiˉ ve nyi ma lehˬ, hkʼaˬ ma naˉ jaˇ ve le. Gʼuiˬsha suhˉ taˆ ve teˇ hpaˍ lehˬ, a shu ka‸ ca dawˇ maˇ gaˬ. Yawˇ ve ya‸ kʼaw teˇ hpaˍ hta‸ a shu ka‸ ca maˇ mawˬ.
34Jawˇmawˇ Gʼuiˬsha ve nyi ma hta‸ a shu shiˍ ve le.
Yawˇ hta‸ a shu maˍ piˇ jehˬ piˇ jaw ve le.#Isy 40:13-14
35Gʼuiˬsha awˬ bon kʼaw‸ te hkʼaw‸ laˇ tuˬ,
a shu yawˇ hta‸ awˉ lawˉ awˬ bon te piˇ jaw ve le.#Yba 35:7, 41:11 Awˬ lawn kʼo, hkʼa cawˬ taˍ ve teˇ ceuˬ le le lehˬ,
36yawˇ lo laˬ ve, yawˇ hta‸ pa taw cawˬ la ve leh, yawˇ awˬ pon hpeh‸ ve yoˬ. Co co taiˍ taiˍ yawˇ hta‸ chiˇ uiˍ chiˇ mvuh piˇ-oˆ. A menˬ.
Atualmente Selecionado:
Roˉma‸ li‸ 11: LHBE
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Lahu Bible Edited © Thailand Bible Society and Bible Society of Myanmar, 2010, 2020.
