MAT 28
28
येशुनदी पुनरुत्थान — 28:1-20
येशुनदी पुनरुत्थान
1मंग शब्बाथ आयनेंका हफ्ताद पहिला दिनमु आयतोर नाबद फद्दु फुट्टीन नग्रेम मग्दालिया नगरदी मरीयाद, याकोब इंगा योसेफ इर आम्मा मरीयाद कबर सुशेदेंक आंदुक फोईर 2आप्पुड सुडना, आंदु फेद्दाद भुकंप आय्या. येनटीक की परमेश्वर दुत स्वर्ग लोन्केल दिगी आंदुक वच्या. वाड कबर मुती मिंदुडदी राय बाजुक दोब्या इंगा दान मिंदा कुसन्या. 3वानदी रूप चमकाशे विजलेका इंगा वानी बट्टाल बर्फ लेका तेल्लांग उंड्या. 4लक्ष फेटेतोर सैनिकलु यरस्केन थरथर नडगेदेंक आंटीर इंगा वार सच्चीने मन्सुला लेका आय फोईर. 5स्वर्गदुत आ आंड्योरनी आन्या, “यरस्कुनाकुंडा, येनटीक की नाक यरका उंडाद की, यवान क्रुस मिंदा लटका मतीनीर आ येशुन मीर फुडकुतुनार. 6पण वाड इंदु लेड येनटीक की वाड आनीन्या, आल्ले वान परमेश्वर सच्चीनोर लोन्केल जिवंत शेशीनाड. दांडा इंगा यंदु वान फेटनीर आदी जागा सुडना. 7इप्पुड लग्गान फोंडा इंगा वान शिष्यलकी शपना, वाड सच्चीनोर लोन्केल जिवंत आयनाड इंगा सुडना, वाड मी मुंदारकी गालील प्रांतकी फोयतुनाड इंगा मीर वान आंदु सुशार. सुडना, निन मिक शपकाडनान.” 8आप्पुड आ आंड्योर येरस्कुनीर तरी पण फेद्दा आनंदता कबर लोन्केल लगेच यल्लीर इंगा वान शिष्यलकी इदी बातमी शप्पेदेंक वार फारका फोईर. 9मंग सुडना; येशुड वारकी भेटाशा इंगा वाड वारनी आन्या, “शांती उंडाला!” वार वान देगार वच्चीर. वार वानी काळ फट्टीर इंगा वान मोक्कीर. 10आप्पुड येशुड वारनी आन्या, “यरस्कुनाकुंडा, फोंडा, ना तम्मुळ्ळाक शपना की वार गालील प्रांतकी फोवाला. वार आंदु नन्नु सुशार.”
11वार आंड्योर शिष्यलकी शप्पेदेंक फोईर. आप्पुड कबर मिंदा लक्ष फेटेतोर सैनिकलाला काही मंदी नगरलोंग फोईर इंगा वार आयनेद आंता मुख्य याजकलाक शप्पीर. 12आप्पुड याजकलु फोई आब्बागार जताक भेटाशीर इंगा वार वगा योजना शेशीर. वार सैनिकलाक शेंगेम दुडलु इच्ची इल्ला आनेदेंक शप्पीर. 13वार आनीर, “मंदीक इल्ला शपना की, मिम फंडकेन फोयन्याप्पुड येशुन शिष्यल वच्चीर इंगा वार वानदी शरीर दासका फोईर. 14इंगा इदी माटा जर राज्यपाल गुम्मा नंताक फोया तर मिम वानकी समजाय मत्याम इंगा मिक येमीच कानीयाक फोयाम.” 15मंग सैनिकलु दुडलु तिस्कुनीर इंगा याजकलु शप्पीर आल्ले शेशीर इंगा इदी माटा यहुदी मंदीला इबद नंताक माटलाडतार.
महान आज्ञा
16इप्पुड अकरा शिष्यल गालील प्रांतला येशुड वारकी शप्पीने कोंडा मिंदीक यल्ली फोईर. 17इंगा वार वान सुशीर आप्पुड वार वानदी आराधना शेशीर. पण काही मंदीक शक वच्या. 18आप्पुड येशुड वार देगार वच्या इंगा आन्या, “स्वर्गला इंगा पृथ्वी मिंदा आंता अधिकार नाक इच्चेदेंक वच्चीनाद. 19दिनिचांग मीर फोंडा इंगा आन्नी जातीटोर मंदीन ना शिष्यल बनाय मतना. आब्बाड, कोडकु इंगा पवित्र आत्मा इर फेरता बाप्तिस्मा इंडा. 20इंगा येम पण निन मिक नेरपुतीन आदी आ मंदीक पाळायदेंक नेरपुना इंगा सुडना, युगदी शेवट आय्यी नंताक निन नेहमी मी जताक उंडान.”
Atualmente Selecionado:
MAT 28: WNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
