MAT 23
23
शास्त्री इंगा परुशी मंदीद निषेध
1मंग येशुड मंदीन इंगा वान शिष्यलान आन्या, 2“नियमशास्त्र शिक्षकलु इंगा परुशील इर मोशेन सिंहासन मिंदा कुसनीनार. #23:2 मोशेन सिंहासन मिंदा कुसनीनार परुशीलाक इंगा नियमशास्त्र शिक्षकलाक मोशेन नियमशास्त्रद अर्थ आंचेद अधिकार उंडाद. 3दिनिचांग वार यल्ला आंटार आल्ले मीर शेयना इंगा पाळायना. पण मीर वार लेका फनी शेयाकुंडा. येनटीक की वार आंटार पण आल्ला शेयार. 4वार मंदीन कठीण नियमलु पाळायाबेक आंका मजबुर शेस्तार याद वार बेन्नु मिंदा भोरु लेका उंडाद पण वार मंदीक नियमलु पाळायदेंक सोपा फोवाला आंका मदत शेशेदेंक यवारुच फोर. 5वार वारी आन्नी फनुल मंदी सुडाबेक आंका शेस्तार येनटीक की वार स्वताय स्मरण पत्रल फेद्दाय शेस्तार इंगा वार बट्टाली झालरलु फेद्दाय शेस्तार. 6पंगतला मनाक शिंगार मानदी जागा शिक्काला. इंगा आल्ले सभास्थानला प्रमुख जागा मिंदा कुसनेदेंक वारकी शेंगेम आवडास्ताद. 7संतालोन मुख्य दावाता वच्चे फोयेताप्पुड मंदी मनाक मान इयाला इदी वारकी शेंगेम आवडास्ताद इंगा मंदी वारनी 'रब्बी'#23:7 'रब्बी' आंटे गुरु आनाला इल्ला वारकी वाटास्ताद. 8पण मीर स्वता:न ‘रब्बी’ आंका आनी तिस्कुनाकुंडा. मीर आंता मंदी वगा-मेगार तम्मुळ्ळु उंडार, मिक गुरु वक्काडे उंडाड. 9इंगा दुन्यामला यवारनी पण आब्बाड#23:9 आब्बाड आंटे आत्मिक आब्बाड आनाकुंडा येनटीक की मी आब्बाड वक्काडे उंडाड इंगा वाड स्वर्गला उंडाड. 10मीर स्वतान मालक आनी तिस्कुनाकुंडा. मी मालकुड ख्रिस्तने उंडाड. 11मी नडमा यवारकी फेद्दावोड आय्येद उंडाद वाड मी सेवक कावाला. 12यवाड स्वतान फेद्दावोड समजाशी वान कमी समजाशेदेंक वच्ची. यवाड स्वतान शिन्नावोड समजाशी आ प्रत्येक मनशीन फेद्दावोड शेशार.”
13 “हे, परुशील इंगा नियमशास्त्र शिक्षकलु, मी मिंदा हाय, मीर ढोंगी उंडार! मीर मंदी इचांग स्वर्ग राज्यद दावा बंद शेस्तार, मीर स्वता तर लोनीक फोर, पण यवार लोनीक फोयेद प्रयत्न शेस्तार वारनी पण लोनीक फोनीयार. 14हे परुशील इंगा नियमशास्त्र शिक्षकलु, ढोंगी मंदी मी मिंदा हाय! येनटीक की मीर विधवाली इंडलु तिनेस्तार इंगा ढोंगता फेद्दा-फेद्दाय प्रार्थनाल शेस्तार; आंका मिक जास्त शिक्षा आय्यी. 15परुशील इंगा नियमशास्त्र शिक्षकलु, मी मिंदा हाय! मीर ढोंगी उंडार येनटीक की मीर वगान मी तीकुड शेशेदेंक समुद्र इंगा भुमी बोरकाला येस्तार इंगा यप्पुड वाड मी तीकुड आयताड, आप्पुड मीर वान मी काना जास्त नरककी पात्र बनाय मतकाडतार.”
16 हे गुड्डी दावा सुपितोरलाला मी मिंदा हाय, यवार मीर आंटार, जर यवाराना परमेश्वर भवनदी वट्टु येस्कुंटे तर येमी काद; पण जर यवाडाना आ भवनलोन बंगारदी वट्टु येस्केन माटलाडताड, तर वाड कट्टीनोड उंडाड. 17मीर मुर्ख गुड्ड्योर उंडार. बंगार इंगा परमेश्वरदी भवन दिंटल्या याद जास्त महत्त्वद उंडाद? आदी बंगार का भवन, याद आ बंगारनी पवित्र शेस्ताद. 18इंगा मीर इल्ला आंटार. जर यवाडाना वेदीद वट्टु येस्कुंटे तर दांटल्या येमीच काद. पण जर यवाडाना वेदी मिंदुड अर्पणदी वट्टु येस्कुंटाड तर वाड कट्टीनोड उंडाड. 19मीर गुड्ड्योर उंडार येनटीक की फेद्दाद येम उंडाद? आदी अर्पण का अर्पणनी पवित्र शेषेद वेदी? 20दिनिचांग यवार वेदीद वट्टु येस्कुंटाड वाड वेदी जताक दान मिंदा येम उंडाद दानदी पण वट्टु येस्कुंटाड. 21आल्ले यवाड परमेश्वर भवनदी वट्टु येस्कुंटाड वाड भवन इंगा दांटल्या उंडीने परमेश्वरदी पण वट्टु येस्कुंटाड. 22यवाड स्वर्गद वट्टु येस्कुंटाड वाड परमेश्वर सिंहासनदी इंगा दान मिंदा कुसनेतोंदी पण वट्टु येस्कुंटाड.
23 “परुशील, नियमशास्त्र शिक्षकलु, मीर दु:खी आय्यार. मीर ढोंगी उंडार! मिद येम पण उंडाद दानदी दशमांश मीर परमेश्वरकी इस्तार; पुदिना, बडीशोप, जीरा दिनदी पण दशमांश इस्तार. पण नियमशास्त्रलोनी महत्त्वय माटलु आंटे: न्याय, दया इंगा विश्वास इ माटलु मीर इडशी फेटनार; पण मीर इ पण शेस्का उंटार इंगा आय पण इडवार. 24मीर गुड्ड्योर दावा सुपेतोर उंडार. मीर मच्छर पण गाळाशी तिस्तार इंगा वंट्यान मिंगेस्तार. 25अरे परुशील, नियमशास्त्र शिक्षकलु, मीर दु:खी आय्यार, मीर ढोंगी उंडार! मीर मी तल्याल इंगा गीन्याल बैटीकेल साफ शेस्तार पण आय लोनीकेल अत्याचार इंगा असंयम इटलाता निंडीनेय उंडाय. 26अरे परुशील, मीर गुड्ड्योर उंडार! पहिला मिद गीन्या लोनेल तोमना इंगा कडगुना आंटे आय बैटीकेल खरेखरेम साफ आय्यी.”
27 “अरे परुशील नियमशास्त्र शिक्षकलु, मीर दु:खी आय्यार. मीर ढोंगी उंडार! तेल्ला कलर मत्तीने कबरला लेका मीर उंडार. आय फैनीकेल बागा कमस्ताय पण लोना आंता घान निंडीनेद उंडाद. 28मीर आंता मंदीक बैटीकेल नितीमान कमस्तार पण मीर लोनीकेल ढोंग इंगा दुष्टपणता निंडीनोर उंडार.”
29 “अरे परुशील, नियमशास्त्र शिक्षकलु, मीर दु:खी आय्यार. मीर ढोंगी उंडार! मीर संदेष्ट्याल कबरलु कटतार इंगा या मंदी नितीमान जीवन जगाशीर वारदी कबर सजाय मततार. 30इंगा मीर आंटार जर मिम मा आब्बा तातागार नाळाला जिवंत उंटे तर संदेष्ट्याल रक्तामला वार भागीदार काकुंटीम. 31पण यवार-यवार संदेष्ट्यालनी जेमफडा मत्तीर, वारदे मीर वंशज उंडार इल्ला मीर स्वता: बद्दल साक्ष इस्तार. 32मुंदारकी दांडा इंगा मी आब्बा तातागार सुरु शेशीने पापुय फनुल पुर्ण शेयना. 33मीर फाम इंगा विषारी फाम बिळ्ळु उंडार. मीर नरक शिक्षा देगार देगाटेल यल्ला फाऱ्यार? 34निन मिक शपतान की निन मी तीकुड संदेष्ट्याल, ज्ञानी मंदी इंगा शिक्षकलु आंपतुनान. दांटल्योन्केल काही मंदीन मीर जेमफडा मत्यार. इंगा काही मंदीन क्रुस मिंदा खिळाशार. दांटल्योन्केल काही मंदीक मी सभास्थानला देब्बाल मत्यार इंगा वगा नगर लोन्केल इंगोगो नगरलोंग मीर वार यंका बेनांट्यार. 35नितीमान हाबेल रक्तामनोट तर बरख्यान कोडकु जखऱ्यान रक्ताम नंताक यवारनी नु भवन इंगा वेदी नडमा मतेस्ती आंता नितीमान मंदीद रक्ताम पृथ्वी मिंदा सल्लेदेंक वच्चीनाद, वारदी दोष मी मिंदा दावाला. 36निन मिक खरेम शपतान; इ आन्नी माटलाद शिक्षा मी पिढी मिंदा वच्ची.”
यरुशलेम इचांग दुख
37येशुड मुंदारकी आन्या “हे, यरुशलेम मंदी, हे यरुशलेम, संदेष्ट्यालनी ठार मतेशेतोडा, नु वाड उंडाव यवाड संदेष्टालदी जेम तिस्कुंटाव इंगा परमेश्वर आंपीने दुतलाक राळ मतताव, कोडी यल्ला आटला फिल्लालनी पंखला किंदा जमा शेस्ताद आल्ले नी बिळ्ळान पण जमा शेशेद शेंगेम तुकुल नाद मन उंड्या, पण नीद मन लेकुंड्या. 38सुडना, इप्पुड मिद इल्लु मी इचांग उजडाशी फोई. 39निन मिक शपतान, प्रभुन फेरता वच्चेतोड धन्यवादीत उंडाला. इल्ला आनी नंताक नु नन्नु सुडाके फोयाव.” #स्तोत्रसंहिता 118:26.
Atualmente Selecionado:
MAT 23: WNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
