Iŋɛ́nínɛ yi Isáaŋ 22
22
1Éŋele wuundíínyi andíkɛ́k awaŋ ú moomb méekenyée kusɔ́t, mɛ́fuɛ́yɛ asɛ kiláas, másíla mááminan kí indáŋa i Támbák nɛɛyɛ́ nɔ Mɔnɔ́ kitúúmbɛ́ɛ. 2Awaŋ wɛɛ́tɛ ááfula kɔ́ ɔtɛ́m u ɔɔ́nd wɔɔkɔ́n ú pálɛ́k. Putɛ́ púekenyée kusɔ́t mapá siki kiáyɛ́ kí awaŋ, púómo masamɔ́ káát na káandɛ́ ɔ́ yɔɔŋ, anakáanɛ́ kunyɛɛ́ ɛ́ɛ́ kómoómí siki oólíe; piányi píɛ́yɛ́ nyɛ puanyɛ́ púpúkanɛ́ɛ pɛɛnd pé kúúsí. 3Inyɔmɔ tiákandá apa. Indáŋa i Támbák nɛɛyɛ́ nɔ Mɔnɔ́ kitúúmbɛ́ɛ kapá á pálɛ́k, kɔ́ɔk peelímoólí pá Támbák koónyóómokosi wɔ́, 4pɛ́ɛ́nɛn pusíó púɛ́yɛ́, kisiɛ́n kíɛ́yɛ́ kiɔ́ŋɔ́ kɔ́ɔ́p á tupɔl. 5Putúk tiányandá apá, mɔɔnd tiányandá apá ni insaná i yiik í ilámba tɛ kisie kí ɔɔ́ny, á kiákí ɛ́ɛ́ Ɔkɔ́n Támbák éényíteekenyi pɔ́ ne kisie kíɛ́yɛ́, póond é pufuŋ pú teeníík.
Kuosiondó kú Yésus
6Éŋele wɛɛ́tɛ ɛ́ɛ́pí káámɛ ɛ́ɛ́: «Tukál tukáánɛ́ nyɛ kémuémue, tuɛ́kɛɛsikɛnɛn ɛ́ɛ́ mɔɔnd áák tú ɔ́ niɔlɔ́. kúúkɔ́ Ɔkɔ́n, Támbákɛ́ɛ utúúnené tukál é peémímekélíe mɛ́ɛ́yɛ́, áányítɔ́m Éŋele wɛɛyɛ́ é kutíínyi peelímoólí pɛ́ɛ́yɛ́ epú púkɛɛ́nyɛ́ɛ́kɛt púpíɛ́lɛ́.» 7Yésus ɛ́ɛ́pí ɛ́ɛ́: «Ɔ́nupítɔ́líkɛn, kuupɔ ekue yáasiám! Peseé ne epé páákanɛ́ɛ ɔ́ niɔlɔ́ mekélíe má Támbák mɛ́nyɛɛ́ á kálatɛ ewe.» 8Iŋúɛ Isáaŋɛ, yɔɔ́p yoond yɛɛ́n maandá makáánɛ́. Imɛɛlɛ́ ímɔ́ɔ́p, ímɛ́ɛ́n, Éŋele ewú umiíndíínyí mɛɛ́tɛ maandá, yeesukin wɔ́ tunúú ó kuómokosi wɔ́. 9Wɔ́ káámɛ ɛ́ɛ́: «Ɛɛ́y, ɛtiɛl pɔ́, atúkɛn! Inyɛ eŋelípuólí ɛlɛɛ́ aŋúɛ, ɛlɛɛ́ paandimán pááwɔ pɛ́nyɛɛ́ peémímekélíe má Támbák, ɛlɛɛ́ peem epé páákanɛ́ ɔ́ niɔlɔ́ tukál tú kálatɛ ewe. Támbákɛ́ɛ wɛɛsikɛnɛnɛ́ɛ no kiómoko.» 10Wɔ́ káámɛ andíkɛ́k ɛ́ɛ́: «Ɛtinɛmbɛ́n pɛɛnd tukál tú Támbák túnyɛɛ́ á kálatɛ ewe, túú túfáanɛ́ɛ kumenyi kú maandá móóloné, á kiákí ɛ́ɛ́ kisikɛl kí mɔ́ kanyi mekúye. 11Ewú unyɛɛ́ ɔtɛ́m kilɔk, ɛ́nyɛɛ́ úpílúndɛn ɛ́ kuɛlɛ kilɔk, ewú unyɛɛ́ á kifal ɛ́nyɛɛ́ úpílúndɛn á kusuŋuna na kifal; ewú unyɛɛ́ ɔtɛ́m peseé ɛ́nyɛɛ́ úpílúndɛn nɛ kuɛlɛ peseé, ewú unyɛɛ́ u Támbák úsuŋuna nɔ kukɔtɔn Támbákɛ́ɛ.» 12Yésus ɛ́ɛ́pí ɛ́ɛ́: «Ɔ́nupítɔ́líkɛn, iŋanyi ɛ́ɛ́ yoól! Yoókoólon na pinamá pí mɔɔnd kitikit, píɛsíkɛ́nɛ́n no puólí púɛ́yɛ́. 13Inyɛ Alfa na Oméka, anakáánɛ́ kunyɛɛ́ ɛ́ɛ́ túmínikɛ́ɛ́yɛ ne súkínikɛ́ɛ́yɛ, kitúme na nimanɛ́n.» 14Peseé ne epé pɛ́tɛ́fɛnɛ́ insunú síɔ́p ɛ́ɛ́ pápia pukaaka pú kunyá pusamɔ́ pú putɛ́ púekenyée kusɔ́t, na pú kutápukɛn kɛ́ɛ́yɛ́ ké eŋíít é kupíkin á pálɛ́k. 15Pɛɛnd pɛ́nyɛɛ́ pinyik ɛlɛɛ́ imbua, pɔ́ɔyɔɔnɛ́ɛ piyepú nɛ ɛŋɛnd ú musɔm, epé pɛ́ɛlɛnɛ́ɛ maanyɛ́, pɔ́ɔyɔ nuɔ́nɔnɔ, póómokosi emé mátiányípá Támbákɛ́ɛ, pasupúsɔp ne epé pɔ́ɔyɔnɛ́ kisupɔ́, niɔ́p niap nyɛ kɔ́ ɔɔ́nd! Pátipá pékupíkin á pálɛ́k. 16«Iŋúɛ Yésuse, yaátɔ́m Éŋele waamɛ ɛ́ɛ́ únúɔyitɛn maandá makáánɛ́ móóyoosonée ilɔŋ sí peétépí pé Yésus Kilíis. Inyɛ anana u efuŋ Tafíit, yoótíótio í emfúnupálɛ ímuɛnyɛnɛ́ɛ.» 17Emfúnukufúúmɛ nɛɛyɛ́ nɔ Kiɔŋinɔ kí Mɔnɔ́ kitúúmbɛ́ɛ ɛ́ɛ́pí ɛ́ɛ́: «Óló!» Ɛ́nyɛɛ́ ewú úmɔ́nyɔɔ́p ɛ́ɛl ɛ́ɛ́: «Óló!» Ewú niíta nyɛɛ́ nɛɛyɛ́, ɛ́nyɛɛ́ woól; ewú waambanɛ́ɛ kupúwá moomb méekenyée kusɔ́t ɔ́ɔ́sikɔ́l mɔ́ kati kunamɛ. 18Iŋúɛ Isáaŋɛ, yeekenyée kumenyi á mɔɔnd kitikit úmɔ́nyɔɔ́p nukál nú Támbák núnyɛɛ́ á kálatɛ ewe, núónyípíwóónyi: índɛ mɔɔnd siɔ́yikɛn puandá kɔ́ɔk, Támbák kɔɔ́yikinɛn wɔ́ muyú múnyɛɛ́ múɔ́ŋɔ́ á kálatɛ ewe. 19Índɛ mɔɔnd siéŋi puandá á nukál nú Támbák núnyɛɛ́ á kálatɛ ewe, Támbákɛ́ɛ kɛ́kɛ́ɛ́yɛ́ keéŋi kɛ́ɛ́yɛ́ á niap unyɛɛ́ na nɛ́ɛ á putɛ́ púékenyée kusɔ́t na á pálɛ́k u Támbák mɛ́nyɛɛ́ mɔɔ́ŋɔ́ á kálatɛ ewe. 20Ewú upíákanɛ́ itóy ɛ́ɛ́ maandá eme meem nyɛ kémuémue ɛ́ɛ́pí ɛ́ɛ́: «Ɛ́ɛɛ, iŋúɛ ukáánɛ́ yoólonée, iŋanyi mekúye!» Anakáánɛ́, óló, Ɔkɔ́n Yésus! 21Ɛ́nyɛɛ́ Ɔkɔ́n Yésus núpinúun panɔ́ peem.
© 2026, CABTAL