Iŋɛ́nínɛ yi Isáaŋ 18
18
Pámákatá Papilóon
1É kélém kúɛ́yɛ́ yɛɛ́n Éŋele olotí uselenin mɛnɛ́mɛnɛ́ɛ. Pukaaka púɛ́yɛ́ mapá kiandákáand, nuúmu núɛ́yɛ́ núapunya e kúúsí. 2Waánsɛt mɔkɔ́n, wɔ́ ɛ́ɛ́: «Papílóon, pálɛ́k wɔɔkɔ́n mékulukut ooo, umékulukut; umɛ́ɛ́yí ninyɔ́l ní pilɔk pí piliínditíe, nipínɛmb ní piliínditíe pí iŋunú no munoní muum múnyɛɛ́ kitɔ́k nɛ mɛnyɛnyɔ́. 3Ó pusíó ɛ́ɛ́ weéwúnsényí pitɔŋ pí kúúsí piim makɛ́p mí iŋɛnd síɛ́yɛ́ sí musɔm wóónyíyóóŋó na sɛ́ɛ. Pɔkɔ́n pɔ́ pitɔŋ pí kúúsí ɛ́ɛndɛ́ wɔ́ isɔm, peelí endunyée pé kúúsí ɛ́ɛ́yɛ́ɛn inɛ́m kɛ́ɛ́yɛ́ á nulíka nú maandá mé muenyí.» 4Yɔɔ́p ekelú olotí óólonin mɛnɛ́mɛnɛ́ɛ, wɔ́ɔyɔ ɛ́ɛ́: Panɔ́ nunyɛɛ́ páámɛ, ánúámán á pálɛ́k ukáánɛ́, emenyí nukɔ́l niap ɔ́ kilɔk kíɛ́yɛ́ kí kusɔ́t ne é muyú múpéétenyée wɔ́. 5Á kiákí ɛ́ɛ́ kilin kíɛ́yɛ́ kí pifal áámákatan kuám mɛnɛ́mɛnɛ́ɛ; Támbákɛ́ɛ tɛ ɛ́ɛ́ úpíeliti pilɔk píɛ́yɛ́ pí meelíe. 6Ɛ́nuɛl wɔ́ yá aná wɛ́ɛ́nyɛ́ɛ́l pɔsɔ́k, núondinyi wɔ́ káandɛ́ é puum wɛ́ɛ́nyɛ́ɛ́l. Ónuwóónyí ikɔ́pɔ yɛ́ɛ́yɛ́ na makɛ́p mɛ́nyɛɛ́ pukaaka káandɛ́ é méemé wéényíwúnsényí pɔsɔ́k. 7Énuénésí wɔ́ iŋɛ́n, nutúúkan wɔ́ muyú á kitáám kí nuúmu uményipíékényí na nulíka núɛ́yɛ́ nú maandá mé muenyí. Ó pusíó ɛ́ɛ́ wɔɔ́kɔɔyɔ kɛ́ɛ́yɛ́ kɔ́ ɔtɛ́m ɛ́ɛ́: «Yaákaŋimat asɛ akáandɔ́ unyɛɛ́ ɔkɔ́n u kitɔŋ, indipá kisík, muyú tiányiŋɔɔ́n tɛ puɔ́s.» 8Á kiákí ɛ́ɛ́ waákála anakáánɛ́, muyú múpéétenyée wɔ́ áákuanɛn wɔ́ ɔ́ puɔ́s táŋ púmoómí; muyú mukáánɛ́ múú múnyɛɛ́ ɛ́ɛ́: manúma mɔɔkɔ́n mɔ́ɔ́nɔninɛ́ɛ, insíkíl ne ensil; yiik kepikesi wɔ́ wɔ́ɔ́s. Á kiákí ɛ́ɛ́ Ɔkɔ́n Támbákɛ́ɛ úményiséésítényí wɔ́ nyɛ na pukaaka. 9Aká pɔkɔ́n pɔ́ pitɔŋ pí kúúsí pɛ́mɛɛ́ndɛ́ wɔ́ isɔm póond pɔ́ɔ́kɔ́lɔn niap kɛ́ɛ́yɛ́ ɔ́ kusɔ́t kuukɔ́n ɛ́nyɛɛlɛ́ pɛ́ɛ́nɛn inyóki sí yiik ímeépikésí pálɛ́k, páányípaŋa, pɛ́sɛɛnɛ. 10Puwaá pú muyú múmaákɔɔ́n pálɛ́k ɛ́ɛ́nyɛ́ɛl ɛ́ɛ́ pápínyáŋɛt wɔ́, pɛ́ɛ́nyɛ́ɛl ɛ́ɛ́: «Ɛɛ́ɛ́! Ɛɛ́ɛ́! Papílóon, pálɛ́k wɔɔkɔ́n, pálɛ́k unyɛɛ́ na pukaaka, kikulɛ́ táŋ kímoómi mɛ́ɛ́síkɛ́n ɛ́ɛ́ muyú kukɔɔn!» 11Peelí endunyée pé kúúsí áápaŋa, pányɛ ká ambaŋɔ́ kɛ́ɛ́yɛ́ ó pusíó, á kiákí ɛ́ɛ́ tɛ mɔɔnd utikápá waand kuɔ́ndɔ maandá mɔ́ɔ́p: 12kóol ne muenyí, atányí yé muenyí nɛ mɛlɛŋ, insunú sí lɛ́ɛŋ na sí tupilitupilɛ símuɛnyɛ, insunú sí muenyí; punyamatíɛ mátiányípá méteke, na maandá kutek matúánán á pipaŋ pí inso, á matɛ́ mé muenyí, ɛ́ tuɛy kúnyáanɛ piínyí; 13malukɔ́, peelepínde, pulɔ; makɛ́p nɛ kisɛŋ, ekuŋ ú kuɛlɛn pilɛ́ɛt ne pelé, inday na pitúúmbɛ́ɛ, pikapilɛ́ na pikálɛ́t, piɔ́lí ni iŋólí. 14Peelí endunyée ɛ́ɛ́pí á pálɛ́k ɛ́ɛ́: «Maandá kitikit emé máányípá mɛ́kuɛlɛ peseé kɔ ɔtɛ́m áákupíátɔ́n, mɔ́ɔ́kupínɔn kaáyɛ́ɛ. Amááyɛn punɛ́m púáwɔ na maandá meem máányípá mókupótokosi. Tɛ puɔ́s pátiányandá kuɛ́n mɔ́.» 15Peelí endunyée, nionyí níɔ́p na pálɛ́k ukáánɛ́ mééyí pɔ́ inɛ́m, páányípaŋa, pɛ́sɛɛnɛ; páányípínyáŋɛt pálɛ́k u Papilóon kaáyɛ́ɛ, pétííne ɛ́ɛ́ muyú mú pálɛ́k ukáánɛ́ tipíkɔ́ɔ́tɛ́n pɔ́ kɔ́kɔɔ́p; 16pɛ́ɛ́nyɛɛl ɛ́ɛ́: «Ɛɛ́ɛ́! Ɛɛ́ɛ́! Káyɛ́ muyú múmányikɔɔ́n pálɛ́k wɔɔkɔ́n, wáanyípá ɛpílɛŋɛ́ kitɛ́fɛk kí insunú i lɛ́ɛŋ, ni insunú sí muenyí tupilitupilɛ, umuɛnyɛ no kóol kɛ́ɛ́yɛ́ ɔ́ nuɔ́l kitikit nɛ mɛlɛŋ mé muenyí á tunamá á tunamɛ́ɛ;» 17kikulɛ́ táŋ kímoómí mɛ́ɛsíkɛ́n ɛ́ɛ́ yiik ééyi kiɛ́tɛ kitáám kí punɛ́m ɔtɔ! Pɛɛnd kitikit pɔ́kɔ́ɔ́kɔnɛ́ɛ é pesitíme, nɛ pɛɛnd péem pɛ́ɛndɛnɛ́ ó pitóóŋ ɛ́ mɛŋɛ́l má pálɛ́k wɛɛ́tɛ, peelímoólí ó pitóóŋ ne peem pópíóyosié ne epú asaá pianɛ́ɛ, peem páapínyáŋɛt pálɛ́k ukáánɛ́ kaáyɛ́ɛ, 18póyooson inyóki sí yiik ímeépikésí Papilóon; pópóko, pɛ́ɛl ɛ́ɛ́: «Pálɛ́k unín wáányípá asɛ pálɛ́k wɔɔkɔ́n?» 19Pépípúŋule e kúúsí, pápaŋa mɔkɔ́n, pɛ́ɛl ɛ́ɛ́: «Wóókó! Wóókó! Pálɛ́k wɔɔkɔ́n punɛ́m púɛ́yɛ́ ényééyí epé pɛ́nyɛɛ́ ne pesitíme ká asaá inɛ́m sí pɛɛnd, kikulɛ́ táŋ kímoómí mɛ́ɛsíkɛ́n ɛ́ɛ́ pálɛ́k ukáánɛ́ pɛk wɔ́ɔs!» 20Mɛnɛ́mɛnɛ́ɛ, yayápá aná pálɛ́k ukáánɛ́ ményikulukut! Naanɔ́ káákáánɔ́, panɔ́ epé nunyɛɛ́ pá Támbák, petúmí ne peémímekélíe má Támbák, ánuyaáyapa, á kiákí ɛ́ɛ́ Támbák óónúpíóndínyí aná wéényíkuusínyí pálɛ́k wɛɛ́tɛ muyú múányíkat wɔ́ wɔ́ɔ́s. 21Éŋele omotí, umaápá na pukaaka, wɛɛsɛmb nitányí, nímaápá ɛlɛɛ́ kinɔ́m kí nitányí pákulanɛ́ɛ moso á nɛ́ɛ, woosóóti ní ká asaá, wɔɔyɔ ɛ́ɛ́: «Yá anɛ póónyísóótonyée, na pukaaka kitikit, Papilóon, pálɛ́k wɔɔkɔ́n, únyím; pátiányandá kuɛ́n wɔ́ tɛ puɔ́s. 22Aŋúɛ kɔk pátiányandá kuɔ́p kuawɔ isak sí peyeéní ɔkɔnyɛ́, peyeéní inselí ni insɛ́p. Tɛ eluŋí kúnyáanɛ enukí puandá, tɛ etúún omoómí útiákand apá kuawɔ. Tɛ ekundú ú nitányí níkulanɛ́ imbɛsɛ tiákandá kuɔ́pɛk kuawɔ. 23Pátiánandá etúm ilámba kuawɔ tɛ puɔ́s, tɛ nuɔ́ndɔ́n nútiákandá apá kuawɔ, ó pusíó ɛ́ɛ́ peelí endunyé pááwɔ mapá piandá pí pɛɛnd pí kúúsí, ó pusíó ɛ́ɛ́ eétemí pitɔŋ píim na maanyɛ́ mááwɔ, 24póond pɛ́ɛ́kɛɛ́n kuawɔ manɔ́ŋ mé peémímekélíe má Támbák, mé péépé pɔ́ɔ́pɔninɛ́ Támbákɛ́ɛ ne mé péépé pɔ́mɔɔ́nɔ́ pɔ́ e kúúsí.»
© 2026, CABTAL