Epelé 4
4
1Indán Támbák maátúákɛ́n é kupíkin kɛ́ɛ́yɛ́ ɔ́ kupíɔyɛt mapása, ɔ́nukɔ́l kisikɛl kɔk ɛ́ɛ́ mɔɔnd káánɔ́ kɔ́ ɔlɔŋ tipítáákɛ́t ɛ́ɛ́ wɔɔ́lɔpɔ́ é kélém. 2Á kiákí tumatáŋáp insɔ́m yi indámb ɛlɛɛ́ pɛɛnd pakáánɛ́, maná nukál pɔ́mɔɔ́p timɛɛl pɔ́ tɛ puandá, á kiákí patimatáŋap núú na kuátap. 3Pasɔ́ tumaátáp tuépíken ɔ́ kupíɔyɛt kú Támbák umɔɔyɛ́t ɛ́ɛ́: Aná imaásɔ́mb kiansɛ́ kí ilópi nɛkɛtɛ́ɛ: Tukɛɛ́n indɛ pékepíkin káámɛ ɔ́ kupíɔyɛt, akáánɛ́ kɔk ɛ́ɛ́ umámaná puolí púɛ́yɛ́ á nipundín ní kúúsí. 4Á kiákí pɔ́mɔɔyɛ́t ɔ́ puɔ́s pú kátíndatɔ́ neémue: Támbákɛ́ɛ wɔɔpíɔyɛt puɔ́s pú kátíndatɔ́ neémue ó puólí kitikit umɛɛ́lɛ. 5Támbák ákaand akála ɛ́ɛ́: Pétiényípíkín káámɛ ɔ́ kupíɔyɛt. 6Akáánɛ́, aná púnyɛɛ́ ɛ́ɛ́ pólotí píkin, naánɛ́ kɔk ɛ́ɛ́ pákutúan pámaátáŋáp isɔ́m yí indámb tiényipíkín á kiákí pɛ́mɛɛlɛ́ pitúkɔ́l, 7Támbákɛ́ɛ waand atán puɔ́s puukɔ́si, upílanɛ́ ɛ́ɛ́ ínanɔ umésíén úkálɛ́t é kélém, kɔ́ ɔmbɔp Tafíit meésíén wɔ́ɔ́ŋɔ úkanyɛɛ́: Ínanɔ ewe, indɛ nusiɔ́p ekelú wɛ́ɛ́yɛ́, nutilúndí itɛ́m síánɔ́. 8Índɛ Yosue mayɔɔ́k nɔ kitɔŋ ɔ́ kupíɔyɛt, Támbák tisáánd akála é kélém akáánɛ́, nɔ puɔ́s púlotí. 9Puɔ́sí pú kupíɔyɛt pú paán pa Támbák manyɛ pupɔ́kɔ́, puɔ́s pukáánɛ́ áámanan puɔ́s pú kupíɔyɛt pú kátíndatɔ́ neémue. 10Á kiákí ewú usiépíkin kɛ́ɛ́yɛ́ ɔ́ kupíɔyɛt, ɔ́ɔ́píɔ́yitɔn kɛ́kɛ́ɛ́yɛ́ no puólí púɛ́ɛ́, yá aná Támbák mɔɔ́píɔyɛ́t nɛ púɛ́yɛ́. 11Túpɛkɛtɛ kɔk é kupíkin ɔ́ kupíɔyɛt kukáánɛ́, ɛ́ɛ́ tɛ mɔɔnd utikuá aná pɔsɔ́k pákutúan mɛɛ́lɛ́ ɛtɔ́ kulal. 12Nukál nú Támbák nyɛ nɔ kusɔ́t, nuwóónón na pukaaka, nutɛ́ɛ́kɛ́ piáyí piim píandɛ́ ɛlɛɛ́ yɔɔ́nɔnɔ́ í pitíí. Núépíken núátuna pumuundɛ ne emfun, piluŋɛ́n no pikóókó. Núósososi nuketi ni imbítáákítɛ́n sí ɔtɛ́m. 13Tɛ kiluŋaluŋa kímoómí tipá kupínɛmb kɛ́ɛ́yɛ́ ké eŋis; Puum nyɛ putambíkán kɛ́ɛ́yɛ́ ó pusíó, iyoósínín yɛɛyɛ́ ɔ́ɔ́kɔɔsúnɔ́ puum. wɔ́ tuɛsikɛɛnɛnɛ́ túɔ́yɔn wu puum.
Yésuse afunúfɔn wɔɔkɔ́n
14Tuapiana afunúfɔn wɔɔkɔ́n u imbekí, umasaápɛ́n mɛnɛ́mɛnɛ́ɛ, Yésuse muɔ́nɔ́ u Támbák, akáánɛ́ túnɛkɛn ni imbekí epú tuátapanɛ́ɛ. 15Afunɔ́fɔn wɔɔkɔ́n tupianɛ́ áápian imbekí ikukɔ́l niap naasɔ́ káásɔ́ é muyu. á kiákí ɛlɛɛ́ pasúɛ, waápiá muɔ́pítɛ́n tunamá kitikit maná utimɛ́ɛ́l kifal. 16Túyuukan kɔk no pipíóndínyí ɔtɛ́m kitikit kí indáŋa i Támbák unyɛ owóónón ne peseé, ɛ́ɛ́ tútáŋap niɛ́nɔsúkɔ ní Támbák túond túpia peseé, ɛ́ɛ́ túpia iŋɔ́yikinɔ ɔ́ kinɔ́k kí kisikɛl.
© 2026, CABTAL