2 Timoté 1
1
Imbíkélie
1Niiŋú, Póole, inyɛ etúmí u Kilíis Yésus, ɔ́ kuɔyit kú Támbák. Yaápian pusɔ́m pú kukéme kusɔ́t Támbák maátuakin indán á kuɔ; kusɔ́t kukáánɛ tupianɛ́ káásɔ á nipílat ne Kilíis Yésus.
2Timoté muɔ́nɔ́ áámɛ u iŋɔyɔ, aŋúɛ iŋuɔ́ŋɔnɛ́. Ɛnyiɛ́ Támbákɛ́ɛ Síí wasɔ́ ne Yésus Kilíis, Ɔkɔ́n wasɔ́ kutíínyi ɔtɛ́m peseé wɔ́ɔ́p, nɛ niɛ́nɔsúkɛ niɔ́p póondɔ pákufá kiyeéwe!
Póol mélémbí Támbákɛ́ɛ
3Yeélémbesi Támbákɛ́ɛ ewú inyɛ eŋelípuólí wɛ́ɛ́yɛ́. Yɔkɔtɔn wɔ́ nɔ ɔtɛ́m afúman yáana pesí páamɛ píínsuá mɛɛ́lɛ. Yeélembesi wɔ́ aká ímánikupítaakit kisikɛl imbísókolonyié nene putúkú nɔnɔ puɔ́s tɛ kupiɔ́yit 4Aká imbitákanɛ́ andilí yáawɔ, yaápiana insana táasi ɛ́ɛ́ yáanda ɛkuɛ́n ɛ́ɛ́ imbá owónon na anyamɔ́. 5Yaápitaka kuátap kú indɛ́ndɛ́nɛ apianɛ́. Kú maapá kúkanyi kú imbámba waawɔ Loyís no nikóoti Enís, kuátap kukáaní nyɛ káawɔ kákáwɔ, yaákaátapan nɔ.
Póol akaakan Timoté ílundɛ ó puólí
6Tɛ ɔɔ́kɔɔ́pɔn yeékupítékesi ɛ́ɛ́: apianɛ enyesi nupoo nú Támbák á maápiá aká imaákutál imbɔ́k kɛ́ɛ ɛtu. 7Ɛ́ kuɛ́nɛ, Emfúnu Támbák maátufá tipá útúákan tɔɔ́li tɔɔ́li. Maná wúatúfáan pukaaka, ni iŋɔyɔ nɛ kupiɛ́tikɛn ɔtɛ́m. 8Atipiá kɔk ɛtɔ́ kunúá é kutétunyenyi ó pusíó pú Ɔkɔ́n waasɔ́, tɛ káámɛ ó pusíó, niiŋú inyɛɛ́ á kiansi kí imbíne kɛ́ɛ́yɛ́ ó pusío; maná, ɔ́píkɔ́n naamɛ ó pusíó pú insɔ́m yi indámb á pukaaka pú Támbák. 9Tambák motusóti woond wa túpílikini ɛ́ɛ́ túpá pɛ́ɛ́yɛ́. Utimɛɛl nɔ́ káásɔ́ é melínyíélinyié, maná ɛ́kuɛlɛ́ ɛ́ɛ́ u masɔ́mb. Inyi imfáan isɛ́kísɛ́kí u mɛɛ́tuɛlɛ́ é Yésus Kilíis nɛkɛtɛ́ɛ, kɔ́ɔk Támbák manyi utipundɔ́ kúúsí. 10Níinúán, imfáan ikáani yɛsiɛ́níkí talutalu aká Osótí waasɔ́ Kilíis Yésuse, meépítínyí. wɔ́ u meélí pukaaka pú nikú, woondu wetíínyi kusɔ́t kútiányípá kúkuen ni insɔ́m yi indámb. 11Támbák miimfá pusɔ́m pú kukéme insúmu yi indámb ikáanɛ ɛlɛɛ́ etúmí, yóond yónyonyi yɛ́. 12Púpukáanɛ yɔɔ́pikɔnɛ́ nínúán, maná indipá yɔɔ́pɔn ɛtɔ́ kunua. Á kiákí, yeémenyien ewú indálanɛ́ ɛtɔ́ kɛ́ɛ́yɛ́. Yond imenyen pesé ɛ́ɛ́, Tambák nyɛ na pukaaka pú ku kíkíka epú kitikit umiímfá kuám ɔ puɔ́s pukusukin. 13Kɔ́lú pulinsí á tukála tu indɛ́ndɛ́nɛ etu ɔmɔɔ́pin káámɛ. Ɔmɔkɔ́l tú á kuátap ni iŋɔyɔ eyi Kilíis Yésus túfáanɛ́. 14Pányi pakufááná kiták kí punɛ́m. Kííká pú na pukaaka pú Emfúnukufúúmɛ ú lɔpɔnɛ́ káasɔ́.
Pukúlu pú kémuémue
15Eémenyen ɛ́ɛ́, epé kitikit pɛ́nyɛɛ́ é kiénsi kí kúúsí kí Así nyɛ piiyɛkɛ́n, yaakamba kuɔyit ɛ́ɛ́, Fisɛ́ɛlɛ na Ɛlimosɛn nyɛ embulu nɔɔpɔ́. 16Ínyiɛ́ Ɔkɔ́n tíínyi peseé wɛɛyɛ́ é nikúli ni Onesifɔ́ɔl. Waákifán malúnda kisikɛl kitikit andíkíki utipá wɔɔ́pɔn ɛtɔ́ kunuá naami aká inyɛɛ́ á kiansi kí imbíne. 17Ɛ́ kuɛ́nɛ, imɛɛlɛ́ yasiámán Lóma, wuŋamba kɔɔ́mɔ kitikit woond wuŋɛn. 18Inyiɛ́ Ɔkɔ́n ɛɛl ɛ́ɛ́ Támbák ɛnɛ wɔ ɔsɔ́k ɔ́ puɔ́s pú ikata. Andíkíkí masɔm kitikit u mɛ́ɛlɛ́ káámɛ ó pusíó á pálɛ́k wu Efɛ́ɛs eémenyen mɔ́ kutápɔk mɔɔnd kitikit.
© 2026, CABTAL