1 Timoté 2
2
Imbítíínɛ kí ímbisókólí
1Insúŋɛ yaamɛ itúánanɛ́ɛ yíi inyɛɛ́ ɛ́ɛ́: peétépí ɔ́ɔ́ŋɔn Támbákɛ́ɛ, pópísókolonyi wɔ, pɛ́yɛ́pɛn wɔ, pélémbesi wɔ ó pusíó pú pɛɛnd peem, 2Ónupísókólónyí andíkɛ́k ó pusíó pú pefuŋ ne epi kitikit pɛ́nyɛɛ́ na pukaaka pú ɔŋɔmɔn, ɛ́ɛ́ túsɔ́tɔn é kiyeéwe, kati inséésítényí, kí indɛ́ndɛ́nɛ ne kupílétileti Támbákɛ́ɛ. 3Púúpú púnyɛɛ́ peseé táásɛ ke eŋis yá Támbák osótí waasɔ́ púond púɛlɛ wu peseé. 4Waákaamba ɛ́ɛ́ úsoti pɛɛnd kitikit póond pémenyi kémuémue. 5Ó pusíó ɛ́ɛ́ Támbák nyɛ táŋ ómoómí yá aná kinɔn nyɛ táŋ kímoómí kilatanɛ́ɛ Támbákɛ́ɛ nɛ peend, kinɔn kikáánɛ nyɛ mɔɔnd wɔ, kisiɛ́n kíɛ́yɛ ɛ́ɛ́ Yésus Kilíise. 6Umaátáp ɛ́ɛ́ úkú é kutúkun punya pɛɛnduɛ. Nikú níɛ́yɛ́ mapá pulinsí púmeétíínyényí á kisikɛl Támbák mɛɛ́tikɛn, ɛ́ɛ́ waákaamba kusóti pɛɛnd kitikit. 7Ó kuól kúkémé insɔ́m ikáánɛ́ Támbák miíndɛ́k asɛ oŋónyóonyi ne etúmí, wuumfá puólí pú kuól kúónyónyí piɛ́nɛ́ɛ́n pítiányípá Pɛyúútɛn epú pɛ́ɛ́sikɛnɛnɛ́ɛ kuátap ne epú púnyɛɛ́ kémuémue; indipá imbúle kémuémue yɔɔyɔnɛ́ɛ.
Etényí ú pɛnúmɛndɔ́ na pakáandɔ́ ɔ́ kiɔp
8Yaákaamba kɔk ɛ́ɛ́ pɛnúmɛndɔ́ písókolonyi kɔɔ́mɔ kitikit, péetukenyenyi mɛnɛ́mɛnɛ́ɛ imbɔk kati kipalalá, kati ilópi kɔ ɔtɛ́m, tɛ imbítáákitɛ́n sí ɔŋgɔmɔn. 9Yaákaamba andíkɛ́k ɛ́ɛ́ pakáandɔ́ pílɛŋɛ peseé, pilaá kindiken piáyí pí nuɔ́l akáandɔ́ ɛ́ɛsikɛnɛn kunɛmbɛn. Kisɔnɔ́ kíɛ́yɛ́ tiɛlɛ́ kí muenyí, kulat kú kɛ́ɛ tiɛlɛ́ muyu. Kunɔk kúɛ́yɛ́ kú tuúnye tiɛlɛ́ muyu; pótipípótósí nɛ mɛlɛŋ mó kóol tɛ insunú sí muenyí; 10Maná, pakáandɔ́ ɛ́ɛ́kɛɛsikɛnɛn kutíínyenyi kusɔ́t kúɔ́p ne meelínyée me peseé, anakáánɛ́ púɛsikɛnɛnɛ́ɛ na pakáandɔ́ pɛ́ɛ́lɛnɛ́ɛ ɛ́ɛ́ pɔ́ɔ́kɔɔyɔ Támbákɛ́ɛ. 11Kisikɛl póónyonyée, akáandɔ́ ɛ́ɛ́kɛɛsikɛnɛn ɛ́ɛ́ úlúŋ yeéwú, úpítɔ́likɔn nɔ kuɔ́pɛn kɔ́ ɔtɛ́m. 12Indipá yaátapanɛn akáandɔ́ ɛ́ɛ́ wóónyonyi, tɛ ɛ́ɛ́ úpian ɛnúmɛndɔ́; wɛɛ́kɛɛsikɛnɛn ɛ́ɛ́ úlúŋ yeéwú. 13Púnyɛ ɛ́ɛ́, Átamɛ Támbák maátúán waalɔŋ wɔ, maná é kélém kúɛ́yɛ́ waalɔŋ Ífɛ. 14Andikɛ́k ɛ́ɛ́, utipá Átamɛ pémeépúlit wɔ, akáandɔ́ wúú Sáátan mɛɛ́lɛ́ úmeépulit wɔ waakua kikotí, tɛ ɛ́ɛ́ wɔ́ɔ́pɛn Támbákɛ́ɛ. 15Tɛ nɔ, á paán upíénenée Támbák óonyísóti wɔ́ índɛ usiésepenyi á kuátap, ɔ́ kuɔyinɔn na kupínyáŋa kusɔ́t kutiányípá peseé ke eŋis yá Támbák, epíselésí.
© 2026, CABTAL