1 Piɛl 5
5
Pusɔ́m pú posíósíó
1Ninuan yaakala é peepe pɛ́nyɛɛ́ posíósíó káánɔ́ kɔ ɔlɔŋ. Ínyɛ osíósíó ɛlɛɛ́ panúɛ; Ínyɛ etétúnyí é muyu mú Kilíis yoond imbian niap á nukanyi núkeényípítíínyi. 2Énuendésí embúl Támbák mɛɛ́nútɛ́k á wɔ, nutikííká wɔ ɛlɛɛ́ páánúkúta, maná na anyamɔ́ kɔ́ ɔtɛ́m ɔ́ kuɔyɛt kú Támbák, pútipá ɛ́ɛ́ núpúta, maná púpá káánɔ́ é kupíéki. 3Nutimaátán epi pɛ́nyɛɛ́ káánɔ́ á kipia, maná ánupá pulinsí pú embul. 4Aká efuŋ u peekííkí kanyáasiám, nukatáŋap nulandany nú nukanyi nútiányípá núlunen.
Kupíseli na kupílúndɛn á kuátap
5Yá anakáánɛ́, paápayɔ́ piɔmfɔ́, ɔ́nuɔ́pínɔ́n posíósíó. Panɔ́ peem, énupíselésí káánɔ́ ɛ́ kikɛtɛ́kɛtɛ́ɛ, á kiákí Támbák tipá waátapan epi pépíméketesie, maná epi pépíselesie, weékeekenyi pɔ́ peseé wɛɛyɛ́. 6Énupíseli kɔk kɔ́ ɔmbɔk ú pukaaka ú Támbák, ɛ́ɛ́ á kisikɛl umaásɔmb, únúméketi; 7Ánupítúúná kɛ́ɛ́yɛ́ insíkíl síánɔ́ kitikit, á kiákí wɔɔ́kɔ́lɔn kisikɛl naanɔ́. 8Ánupá iŋuɛ́lí, nuɛ́ndɔk, á kiákí inyɔli i pikána ɔ́ɔ́pɔŋɔ ɛlɛɛ́ aŋuali úfúkenée, úpɔŋɔ, waámba ewú únyɛɛ́ kulafɛt. 9Nutipíyapɛ́n okóyikoyi, ánupílúndɛ́n á kuátap, numenyen ɛ́ɛ́ muɛ́tɛ muyú múmoómí, pákúánɔ́ ɔ́ɔ́kɔɔ́pikɔn na muɔ kúúsí kitikit. 10Támbákɛ́ɛ u peseé, úmaánúpílíkɛ́n kɛ́ɛ́yɛ́ á nukanyi nú teeníík é Kilíis, áányáand enútényikenyi wɔ́ muɛ́t, kɔ́ɔk numámaná kuɛ́n muyu ɔ́ muɔ́nɔ́ u kisikɛl; Weényínúlúndi, weényínúkúnyinyi, unúák indimb. 11Wɔ́ unyɛɛ́ na pukaaka é teeníík ne níík, anakáánɛ́.
Imbíkélie
12Silifɛŋɛ, iŋɔ́lɔnɛ́ɛ aná andimán áámɛ u nulátát umɔnyiŋɔ́ŋínɔ́n muɔ́nɔ́ɔ́n u ɔmbɔp ewe ímányinútúmɛ́n, á kunúák kutáam na kunútían ɛ́ɛ́ púnyɛ é kémuémue peseé u Támbák nunyɛɛ́ pakútá á wɔ. 13Embúl ú peétépí únyɛɛ́ Papilɔn Támbák maáyɔ́ɔ́n ɛlɛɛ́ panúɛ, nɔ kinɔ́k kíámɛ Malakus ménupíkéliti. 14Énupíkélínyíkélínyí panúɛ na panúɛ, nukɔ́linɔn pisas. Ɛ́ɛ́ kiyeéwe pá naanɔ́ panɔ́ peem nuɔ́pɔninɛ́ɛ Kilíise.
© 2026, CABTAL